„კი ევროპას, არა რუსულ კანონს“ – ამ ლოზუნგით ზუგდიდში მორიგი საპროტესტო აქცია გაიმართა. ერთიანი ნაციონალური მოძრაობის ორგანიზებით, აქციის მონაწილეები, ჯერ სკეიტ პარკის მიმდებარე ტერიტორიაზე შეიკრიბნენ, სადაც მათ სიტყვით მიმართეს ოპოზიციური პარტიების ლიდერებმა.
სიტყვით გამოსვლის დროს „გამარჯვების კოალიციის“ ლიდერებმა ერთხელ დაგმეს კანონი „გამჭვირვალობის შესახებ“ და განაცხადეს, რომ ეს კანონი ხელს უშლის საქართველოს ევროინტეგრაციას და საფრთხეს უქმნის ქვეყნის სუვერენიტეტს.
სიტყვით გამოსვლის შემდეგ, აქციის მონაწილეები საყვირებით, ბანერებით, საქართველოსა და ევროკავშირის დროშებით, ზუგდიდში გამსახურდიას გამზირზე მსვლელობა გამართეს და კიდევ ერთხელ მოუწოდეს ხელისუფლებას უკან გაიწვიოს აღნიშნული კანონი.
ოპოზიციური პარტიების განცხადებით, მსგავსი შინაარსის შეხვედრები ყველა რეგიონში შედგება. მათივე ინფორმაციით, ხვალ შეხვედრის მორიგი ლოკაცია იქნება ბათუმი.