ხობის მერი დავით ბუკია ხობელებს ახალ წელს ულოცავს
ხობის მუნიციპალიტეტის მერი დავით ბუკია მოქალაქეებს ახალ წელს ულოცავს:
,,გილოცავთ შობა-ახალ წელს!
გისურვებთ მშვიდობას, კეთილდღეობას, უსაზღვრო შესაძლებლობებითა და გამარჯვებებით სავსე წელიწადს!
ჩემო ხობელებო, ახლა, როდესაც ტრადიციულად შეგვიძლია ერთად შევაჯამოთ გასული წელი, მინდა კიდევ ერთხელ გამოვხატო მადლიერება თქვენი ნდობის, თანადგომისა და მხარდაჭერისათვის, რომელიც უპირობოდ წარმოადგენდა ყველა იმ გამარჯვების უმთავრეს ქვაკუთხედს, რომელიც 2024 წელს ერთად მოვიპოვეთ. სწორედ ერთიანი ძალისხმევითა და თავდადებით შევძელით მეტად საჭირო და მნიშვნელოვანი ინფრასტრუქტურული, სოციალური, ეკონომიკური თუ კულტურულ-საგანმანათლებლო პროექტების წარმატებით განხორციელება: რეაბილიტირდა საჯარო სკოლები, სპორტული მოედნები და გზები, მოეწყო საბავშვო ატრაქციონები, გარე განათებები, ხიდები და ხიდბოგირები. სპორტული ინვენტარით აღიჭურვა სპორტულ-გამაჯანსაღებელი კომპლექსი, აშენდა თანამედროვე სტანდარტების ხელოვნურსაფარიანი სტადიონი, წარმატებით განხორციელდა არაერთი სახელმწიფო და მუნიციპალური პროგრამა. ყველა ეს სასიკეთო ცვლილება შეუძლებელი იქნებოდა, იმ ადამიანების გარეშე, ვინც მთელი წლის განმავლობაში, საკუთარი პროფესიონალიზმითა და თავდადებით, ერთგულად, მუხლჩაუხრელად ემსახურა მუნიციპალიტეტის საუკეთესო ინტერესებს. მადლობას ვუხდი მერის წარმომადგენლებს მუნიციპალიტეტის ადმინისტრაციულ ერთეულებში, საჯარო თუ კერძო სექტორის წარმომადგენლებს, პედაგოგებს, აღმზრდელებს, სამედიცინო სფეროს წარმომადგენლებს – ყველას ვინც საკუთარი წვლილი შეიტანა ხობის განვითარების გზაზე.
გულითადად ვულოცავ დამდეგ ახალ წელს ხობის მუნიციპალიტეტში მცხოვრებ მუსლიმებს, ასევე ჩვენი დიდი ეთნიკური, კულტურული თუ რელიგიური მრავალფეროვნების თითოეულ წევრს, ვისაც ფასდაუდებელი წვლილი შეაქვს ხობის წინსვლაში, ვულოცავ ჩვენს უძვირფასეს უფროს თაობასა და უნიჭიერეს ახალ თაობას – ახალგაზრდებს, რომლებიც მჯერა, არაერთხელ ასახელებენ ჩვენს მუნიციპალიტეტსა და ქვეყანას.
ახალი წელი ახალ იმედებს, გეგმებსა და მიზნებს უკავშირდება, ურყევი რწმენით, რომ ჩვენ აუცილებლად დავიბრუნებთ ერთმანეთს, მინდა მივულოცო ახალ წელი ჩვენს აფხაზ და ოს და-ძმებს! მჯერა, ძალიან მალე დადგება დღე, როდესაც ყველანი ერთად ვიზეიმებთ შობა-ახალ წელს ერთიან და კიდევ უფრო ძლიერ საქართველოში!
ჩემო ხობელებო, კიდევ ერთხელ გილოცავთ დამდეგ 2025 წელს! მშვიდობის, სიკეთის, ერთობისა და წარმატების მომტანი ყოფილიყოს ახალი წელი თქვენთვის, ჩვენი მუნიციპალიტეტისა და ქვეყნისათვის!
ღმერთმა დალოცოს საქართველო!” – წერს დავით ბუკია.
