ამბები სამეგრელოდან

სამეგრელო-ზემო სვანეთის სახელმწიფო რწმუნებულის ადმინისტრაციის შენობაში „ვარდისფერი ოქტომბრის” ფარგლებში ძუძუს კიბოს პრევენციის, რეგულარული სკრინინგისა და ადრეული დიაგნოსტიკის მნიშვნელობასთან დაკავშირებით საინფორმაციო შეხვედრა გაიმართა.

ღონისძიებას სამეგრელო-ზემო სვანეთის სახელმწიფო რწმუნებულის მოადგილეები, პარლამენტის წევრები, ზუგდიდის მერი და თვითმმართველობის წარმომადგენლები დაესწრნენ.

ღონისძიება „ქართული ოცნების“ ქალთა ორგანიზაციის ორგანიზებით გაიმართა. „ვარდისფერი ოქტომბრის“ ფარგლებში ღონისძიებები ქვეყნის მასშტაბით მიმდინარეობს.

მასწავლებლის ეროვნულ დღესთან დაკავშირებით, მარტვილის მუნიციპალიტეტის კულტურის სახლში, ღვაწლმოსილი პედაგოგების დაჯილდოების ღონისძიება გაიმართა.

პედაგოგებს სიგელები საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ, მარტვილის მუნიციპალიტეტის მერმა გიორგი ნაჭყებიამ, მერის მოადგილეებმა ერეკლე ზარანდიამ და ნანა ბირკაიამ გადასცეს.

მრავალწლიანი გამოცდილების მქონე ღვაწლმოსილ პედაგოგებს სიგელებთან ერთად, მერიისგან ფულადი ჯილდო გადაეცათ.

მერმა პედაგოგებს მომავალი თაობების აღზრდაში შეტანილი წვლილისთვის მადლობა გადაუხადა.

„ძვირფასო პედაგოგებო, მინდა, გულწრფელი მადლობა გადაგიხადოთ იმ უდიდესი წვლილისა და ამაგისთვის, რაც ჩვენი მომავალი თაობების აღზრდასა და განათლებაში შეგაქვთ. თქვენი ყოველდღიური, დაუღალავი შრომა სცდება მხოლოდ საგნის სწავლებას, თქვენ აყალიბებთ ჩვენი საზოგადოების მომავალს, ანიჭებთ ახალგაზრდებს ღირებულებებს, ცოდნასა და რწმენას, რაც მათ ცხოვრების გზაზე აუცილებლად დასჭირდებათ. გისურვებთ ჯანმრთელობას და დიდ წარმატებას ამ უმნიშვნელოვანეს საქმეში.“ - განაცხადა გიორგი ნაჭყებიამ.

ღონისძიებაზე მუსიკალური ნომრები ჯგუფ „იბერიის“ სოლისტმა ბექა წულაიამ, პედაგოგებმა და მოსწავლეებმა შეასრულეს.

საქართველოს განათლების, მეცნიერებისა და ახალგაზრდობის მინისტრის, გივი მიქანაძის გადაწყვეტილებით, მასწავლებლის ეროვნულ დღესთან დაკავშირებით, ღვაწლმოსილი პედაგოგების დაჯილდოება ყველა მუნიციპალიტეტში მიმდინარეობს. ინიციატივის მიზანია პედაგოგთა მრავალწლიანი შრომისა და პროფესიული საქმიანობის დაფასება.

აბაშის მუნიციპალიტეტში, მარნის კულტურის სახლში გამართულ ღონისძიებაზე, განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ და აბაშის მუნიციპალიტეტის მერმა, გიგა გაბელაიამ საჯარო სკოლების წარმატებული მასწავლებლები დააჯილდოვეს.

აბაშის მუნიციპალიტეტისგან, მასწავლებლის ეროვნულ დღესთან დაკავშირებით, წარმატებული პროფესიული საქმიანობისთვის 15 პედაგოგს მადლობის სიგელები და საჩუქრები გადაეცა.

საქართველოს განათლების, მეცნიერებისა და ახალგაზრდობის მინისტრის გადაწყვეტილებით, 5 ღვაწლმოსილი პედაგოგი, პროფესიული საქმიანობისა და მომავალი თაობების აღზრდასა და განათლებაში შეტანილი განსაკუთრებული წვლილისთვის მადლობის სიგელებით დაჯილდოვდა.

ღონისძიებაზე სიტყვით გამოსვლისას აბაშის მუნიციპალიტეტის მერმა, გიგა გაბელაიამ პედაგოგებს წარმატებული პროფესიული საქმიანობისთვის მადლობა გადაუხადა და აღნიშნა, რომ მასწავლებლის შრომა განსაკუთრებით დასაფასებელია და სწორედ პედაგოგები ქმნიან იმ საფუძველს, რომელზეც მომავალი თაობების ცოდნა, ღირებულებები და წარმატება შენდება.

საზეიმო ღონისძიებაში მონაწილეობდნენ კულტურისა და ხელოვნების განვითარების ცენტრის, ხელოვნების სკოლის გოგონათა ანსამბლი და კულტურის ცენტრის ანსამბლები.

დაჯილდოების ღონისძიებას ადგილობრივი ხელისუფლების, საგანმანათლებლო რესურსცენტრისა და სასკოლო საზოგადოების წარმომადგენლები ესწრებოდნენ.

საქართველოს განათლების, მეცნიერებისა და ახალგაზრდობის მინისტრის, გივი მიქანაძის გადაწყვეტილებით, მასწავლებლის ეროვნულ დღესთან დაკავშირებით, ღვაწლმოსილი პედაგოგების დაჯილდოება საქართველოს ყველა რეგიონში მიმდინარეობს. ინიციატივა პედაგოგთა მრავალწლიანი საქმიანობის დაფასებასა და მასწავლებლის პროფესიის მნიშვნელობის ხაზგასმას ემსახურება.

მასწავლებლის ეროვნული დღე ყოველწლიურად 27 ოქტომბერს, ქართველი პედაგოგისა და საზოგადო მოღვაწის, იაკობ გოგებაშვილის დაბადების დღეს აღინიშნება

ქალაქ ხობში, ექვთიმე თაყაიშვილის ქუჩაზე, თანამედროვე სტანდარტების შესაბამისი ხელოვნურსაფარიანი მინი სტადიონი მოეწყო.

პროექტი ხობის მუნიციპალიტეტის ადგილობრივი ბიუჯეტიდან 232 000 ლარით დაფინანსდა. სამუშაოების ფარგლებში, მოედანზე დაიგო ხელოვნური საფარი, დამონტაჟდა განათების სისტემა და სკამები, მოეწყო სტადიონის ღობე.

ხობის მუნიციპალიტეტში სპორტული ინფრასტრუქტურის განვითარება აქტიურად გრძელდება - ამჟამად, საჯიჯაოს ადმინისტრაციული ერთეულის სოფელ ჯაპიშაქარში მინი სტადიონის სრული რეაბილიტაცია მიმდინარეობს, ხოლო ახალი ხიბულისა და ძველი ხიბულის ადმინისტრაციულ ერთეულებში სპორტული მოედნების მშენებლობა უახლოეს პერიოდში დაიწყება.

სამეგრელო-ზემო სვანეთის სახელმწიფო რწმუნებულმა დავით ვერავამ, საქართველოს განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ და ზუგდიდის მერმა დავით კოდუამ ზუგდიდის მუნიციპალიტეტის ღვაწლმოსილი პედაგოგები, ზვიად გამსახურდიას სახელობის საპრეზიდენტო ცენტრში დააჯილდოვეს.

ხელისუფლების წარმომადგენლებმა პედაგოგებს მრავალწლიანი პროფესიული საქმიანობისა და მომავალი თაობების აღზრდასა და განათლებაში შეტანილი განსაკუთრებული წვლილისთვის მადლობა გადაუხადეს.

საქართველოს განათლების, მეცნიერებისა და ახალგაზრდობის მინისტრის, გივი მიქანაძის გადაწყვეტილებით, მასწავლებლის ეროვნულ დღესთან დაკავშირებით, ღვაწლმოსილი პედაგოგების დაჯილდოება ყველა რეგიონში იმართება. ინიციატივა პედაგოგების მრავალწლიანი შრომის დაფასებას, მათი პროფესიული საქმიანობის აღიარებასა და წახალისებას ემსახურება.

საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ მარტვილისა და აბაშის მუნიციპალიტეტების ღვაწლმოსილი პედაგოგები მადლობის სიგელებით დააჯილდოვა.

ზვიად გაბისონიამ პედაგოგებს მრავალწლიანი და ნაყოფიერი საქმიანობისთვის მადლობა გადაუხადა და აღნიშნა, რომ მათი პროფესიული პასუხისმგებლობა, თავდადება და ერთგულება განათლების სისტემის განვითარებასა და გაძლიერებას ემსახურება.

პედაგოგთა დაჯილდოების ღონისძიებას სასკოლო საზოგადოებისა და ადგილობრივი ხელისუფლების წარმომადგენლები ესწრებოდნენ. მათ პედაგოგებს სიმბოლური საჩუქრები გადასცეს.

საქართველოს განათლების, მეცნიერებისა და ახალგაზრდობის მინისტრის, გივი მიქანაძის გადაწყვეტილებით, მასწავლებლის ეროვნულ დღესთან დაკავშირებით, ღვაწლმოსილი პედაგოგების დაჯილდოება ყველა მუნიციპალიტეტში მიმდინარეობს. ინიციატივის მიზანია პედაგოგთა მრავალწლიანი შრომისა და პროფესიული საქმიანობის დაფასება.

სამეგრელო-ზემო სვანეთის სახელმწიფო რწმუნებული დავით ვერავა, ზუგდიდის მუნიციპალიტეტის მერთან, დავით კოდუასთან ერთად, სოფელ ახალ აბასთუმანში მიმდინარე საგზაო ინფრასტრუქტურის მოწყობის სამუშაოებს გაეცნო.

პროექტის ფარგლებში, სოფელში კოსტავას, ლესელიძისა და თბილისის ქუჩებზე ასფალტის ახალი საფარი იგება. ასევე, გათვალისწინებულია სანიაღვრე სისტემისა და ეზოებთან მისასვლელების მოწყობა.

სარეაბილიტაციო გზის საერთო სიგრძე 1 400 მეტრია, ხოლო პროექტის ღირებულება 883 000 ლარს შეადგენს. სამუშაოები რეგიონებში განსახორციელებელი პროექტების ფონდიდან ფინანსდება.

ამ ეტაპზე, ზუგდიდის მუნიციპალიტეტში გზების მშენებლობა-რეაბილიტაციის 32 პროექტი მიმდინარეობს.

ფოთის მერი ბექა ვაჭარაძე სოციალურ ქსელში გამოქვეყნებულ ინფორმაციას ეხმიანება, რომელიც ძმის მიერ მისთვის ჩარიცხულ თანხას ეხება. ფოთის მერი აცხადებს, რომ გამოქვეყნებული ინფორმაცია დეკლარაციაში ასახა და დაწერა, რომ მისი ძმა და მამა ყაზახეთში საქმიანობენ და თანხას ლეგალურად ურიცხავენ.

„ვინც მიცნობს, ყველამ კარგად იცის, რომ ჩემი ოჯახის წევრები, მამაჩემი და ჩემი ძმა, უკვე წლებია ყაზახეთში საქმიანობენ. მათი შემოსავლები დაკავშირებულია იქ განხორციელებულ საქმიანობასთან, რაც მარტივად გადამოწმებადია, ისევე როგორც საქართველოში არსებული შემოსავლების წყაროები.

ჩემი ოჯახის წევრების მიერ ჩემს ანგარიშზე განხორციელებული ჩარიცხვები წლებია ყოველთვიურ ხასიათს ატარებს და კანონის შესაბამისად ყოველთვის აისახება ჩემს ქონებრივ დეკლარაციებში.

რაც შეეხება გავრცელებულ თანხას, როგორც ჩანს, ბოლო 8 წლის განმავლობაში, ჯერ კიდევ იმ პერიოდიდან, როდესაც საკრებულოს წევრი ვიყავი, ჩემს დეკლარაციებში ასახული თანხები უბრალოდ შეაჯამეს და ახლა ცდილობენ ეს ყველაფერი სკანდალად წარმოაჩინონ.

როგორც ჩანს, ვიღაცებმა ახლა გაიგეს, რომ თანამდებობის პირების ქონებრივი დეკლარაციები საჯაროა, ან უბრალოდ ახლა დასჭირდათ წლების განმავლობაში საჯაროდ ხელმისაწვდომი ინფორმაციისგან სკანდალის შექმნა.

მე კი მშვიდად გავაგრძელებ ჩემი საქმის კეთებას. ჩემი პასუხი მსგავს მცდელობებზე ყოველთვის იქნება კეთილსინდისიერი საქმიანობა, პასუხისმგებლობა და კონკრეტული შედეგები ჩემი ქალაქისა და ფოთელების წინაშე.

მადლობა ჩემს ოჯახს მხარდაჭერისთვის, რომელიც მაძლევს შესაძლებლობას, მთელი ჩემი დრო და ენერგია ჩემი ქალაქის სამსახურს დავუთმო“ - აცხადებს ფოთის მერი სოციალურ ქსელში.

ფოთში, მდინარე რიონზე ახალი ხიდისა და მისასვლელი გზების მშენებლობა აქტიურად მიმდინარეობს.

მდინარე რიონზე შენდება ფოლად-რკინა-ბეტონის საავტომობილო ხიდი. მისი სიგრძე 436 მეტრს, ხოლო მისასვლელი გზების სიგრძე, ჯამში, 2 კმ-ს შეადგენს.

,,ფოთის ხიდი სულ ხუთმალიანი კონსტრუქციისგან შედგება და ლითონის კოჭების მოწყობა განხორციელდა მდინარის ორივე მხრიდან. სამუშაოების ყველაზე რთულ გამოწვევას წარმოადგენდა მდინარის კალაპოტის ცენტრალურ ნაწილში მდებარე მე-3 მალის მოწყობა, რაც წარმატებით იქნა დაძლეული და აღნიშნულ მონაკვეთზე კოჭის მონტაჟი უკვე დასრულებულია. ამ ეტაპზე, ხიდის ორივე მხრიდან მოწყობილი კონსტრუქციები ერთმანეთს საბოლოოდ შეუერთდა.

ფოთის ამჟამად არსებული გზა გადის ჰიდროკვანძზე, რომლის ტექნიკური პარამეტრები ვერ აკმაყოფილებს ავტოტრანსპორტის შეუფერხებელ და უსაფრთხო გადაადგილებას. ახალი ფოლად-რკინა-ბეტონის 5 მალიანი ხიდის მშენებლობა მოაგვარებს არსებულ პრობლემებს და ფოთის მიმართულებით, მაღალი ინტენსივობის საერთაშორისო მნიშვნელობის გზაზე, უსაფრთხო საავტომობილო მგზავრობასა და შეუფერხებელ სატრანზიტო მიმოსვლას უზრუნველყოფს” - აცხადებენ საავტომობილო გზების დეპარტამენტში.

ფოთის ხიდი აღმოსავლეთ-დასავლეთის ავტომაგისტრალის შემადგენელი ნაწილია. ჩქაროსნული ავტომაგისტრალი უმოკლესი დამაკავშირებელი გზაა ევროპისა და აზიის ქვეყნებს შორის. მაგისტრალის მდებარეობის გათვალისწინებით, იგი გახდება ძირითადი სატრანსპორტო რგოლი შავ ზღვას, კასპიის ზღვასა და ცენტრალურ აზიას შორის

ხიდის მშენებლობის ღირებულება 60.8 მილიონ ლარს შეადგენს და აზიის განვითარების ბანკის (ADB) ფინანსური მხარდაჭერით ხორციელდება. სამშენებლო სამუშაოებს საერთაშორისო ტენდერში გამარჯვებული კომპანია „ერთობლივი საწარმო MIRBUD-CS“ ასრულებს.

ფოთის მერი ბექა ვაჭარაძე ანაზღაურებადი სტაჟირების პროგრამის მონაწილეებს შეხვდა.

ფოთის მუნიციპალიტეტის მერიის სხვადასხვა სამსახურში, პროგრამის ფარგლებში, 8 ახალგაზრდა 3-თვიან ანაზღაურებად სტაჟირებას გაივლის.

სტუდენტთა ანაზღაურებადი სტაჟირების პროგრამა საქართველოს პრემიერ-მინისტრის, ირაკლი კობახიძის, გადაწყვეტილებით, ყველა საჯარო უწყებაში მიმდინარეობს, ქვეყნის მასშტაბით.

ბექა ვაჭარაძემ ახალგაზრდებს წარმატებები უსურვა და აღნიშნა, რომ სტაჟირების პროცესი მათთვის მნიშვნელოვანი გამოცდილებისა და ახალი ცოდნის მიღების, საჯარო სამსახურში საკუთარი უნარების წარმოჩენის საფუძველი და კარიერული განვითარების კარგი შესაძლებლობაა.

ზუგდიდში, ზვიად გამსახურდიას სახელობის საპრეზიდენტო ცენტრში საქპატენტის ჟურნალის პრეზენტაცია გაიმართა.

საქპატენტმა გამოსცა ჟურნალის „საქართველოს ადგილწარმოშობის დასახელებები და გეოგრაფიული აღნიშვნები“ მე-2 ნაწილი, რომელიც უწყების პოლიგრაფიულ ბაზაზე დაიბეჭდა.

ჟურნალში განთავსებულია საინტერესო ცნობები და შემეცნებითი ხასიათის საინფორმაციო თუ ვიზუალური მასალა საქპატენტში რეგისტრირებული 12 პროდუქტის შესახებ, რომლებიც გამოირჩევა თავისი უნიკალურობით, გემური თვისებებით, ხარისხითა და მაღალი რეპუტაციით. ადგილწარმოშობის დასახელებებად და გეოგრაფიულ აღნიშვნად ნიშანდებული ეს განსაკუთრებული პროდუქტები მნიშვნელოვან როლს ასრულებს ქვეყნის ეკონომიკის განვითარებაში.

ჟურნალის პრეზენტაცია გაიმართა ქალაქ ზუგდიდში, ზვიად გამსახურდიას სახელობის საპრეზიდენტო ცენტრში. ღონისძიება გახსნა საქართველოს სასახლე-მუზეუმების გაერთიანების გენერალურმა დირექტორმა გიორგი კალანდიამ. დამსწრე საზოგადოებას სიტყვით მიმართა საქართველოს ინტელექტუალური საკუთრების ეროვნული ცენტრის –„საქპატენტის“ თავმჯდომარემ სოსო გიორგაძემ. გამომსვლელებს შორის იყო ასევე, ჟურნალისტი მარიკა ბაკურაძე, რომელიც გიორგი კალანდიასთან ერთად ჟურნალის ტექსტების ავტორია.

ჟურნალის ფოტომასალა ეკუთვნის აწ გარდაცვლილ ცნობილ ფოტოხელოვანს ბადრი ვადაჭკორიას, ასევე ფოტოგრაფებს – კახაბერ გოგიჩაშვილსა და პაატა ვარდანაშვილს. გამოცემის დიზაინზე იმუშავა ელენე დავითაშვილმა.

ჟურნალის პრეზენტაციას ესწრებოდა ზუგდიდის მერი დავით კოდუა, ადგილობრივი თვითმმართველობის სხვა წარმომადგენლები, საქართველოს სასახლე-მუზეუმების გაერთიანების და საქპატენტის თანამშრომლები და მოწვეული სტუმრები.

საქართველოს ადგილწარმოშობის დასახელებებისა და გეოგრაფიული აღნიშვნების შესახებ ჟურნალის პირველი ნაწილი გამოიცა 2024 წელს, სადაც თავმოყრილია საინტერესო მასალა საქპატენტში რეგისტრირებული 64 უნიკალური ქართული პროდუქტის შესახებ.

საქართველოს განათლების, მეცნიერებისა და ახალგაზრდობის მინისტრმა გივი მიქანაძემ, ქალაქ ფოთის მერთან, ბექა ვაჭარაძესთან ერთად, ფოთის მუნიციპალიტეტის წარმატებული პედაგოგები და სკოლამდელი სააღმზრდელო დაწესებულებების აღმზრდელები დააჯილდოვა.

გივი მიქანაძემ პედაგოგებსა და შეხვედრის მონაწილეებს ზოგადი განათლების სისტემაში მიმდინარე რეფორმები, განხორციელებული ცვლილებები და სამომავლო გეგმები გააცნო.

ფოთის მერმა სიტყვით გამოსვლისას განაცხადა, განათლება ჩვენი ქვეყნისა და ქალაქის ერთ-ერთი მთავარი პრიორიტეტია და ამ მიმართულებით მუშაობა უწყვეტად გრძელდება.

„ეს იყო კიდევ ერთი შესაძლებლობა, განსაკუთრებული მადლობა გვეთქვა ადამიანებისთვის, რომლებიც ყოველდღიურად ჩვენი ბავშვების განათლებასა და აღზრდაზე ზრუნავენ.

პედაგოგის შრომის მნიშვნელობას ხშირად წლების შემდეგ უფრო კარგად ვიაზრებთ. ერთი სიტყვა, რჩევა, მხარდაჭერა თუ დამოკიდებულება ხშირად დიდ გავლენას ახდენს ბავშვის განვითარებასა და მომავალზე. ეს ყველაფერი კი სკოლამდე ბევრად ადრე, საბავშვო ბაღიდან იწყება.

სწორედ ამიტომ, ჩვენთვის განსაკუთრებით მნიშვნელოვანია როგორც პედაგოგებისა და აღმზრდელების შრომის დაფასება, ისე მათთვის და ჩვენი ბავშვებისთვის ღირსეული და თანამედროვე საგანმანათლებლო გარემოს შექმნა.

გილოცავთ დღევანდელ აღიარებას და მადლობა თითოეულ თქვენგანს პროფესიონალიზმისთვის, თავდადებისა და იმ დიდი საქმისთვის, რომელსაც ყოველდღიურად ემსახურებით.

თქვენი წარმატება ჩვენი ბავშვების წარმატებაა, მათი განათლება და განვითარება კი ჩვენი ქალაქისა და ქვეყნის მომავლის საფუძველია“- განაცხადა ბექა ვაჭარაძემ სიტყვით გამოსვლისას.

სამეგრელო-ზემო სვანეთის სახელმწიფო რწმუნებულის პირველი მოადგილე ნინო ვიბლიანი და მოადგილე დავით კუხალეიშვილი გიორგი ანწუხელიძის ბიუსტის გახსნას დაესწრნენ.

საქართველოს ეროვნული გმირის, გიორგი ანწუხელიძის ბიუსტი ზუგდიდში, ეროვნული გმირების პარკში აფხაზეთის მეომართა კავშირის ინიციატივით გაიხსნა.

ღონისიძიებას აფხაზეთის ავტონომიური რესპუბლიკის მთავრობის და ადგილობრივი ხელისუფლების წარმომადგენლები, სამხედრო პირები, ვეტერანები, გიორგი ანწუხელიძის ოჯახის წევრები და ახლობლები დაესწრნენ.

ღონისძიების ფარგლებში ასევე გაიმართა დოკუმენტური ფილმის „გიორგი ანწუხელიძე - გმირის გზა“ ჩვენება, რომელიც ეროვნული გმირის ცხოვრებას, მის საბრძოლო გზას და გმირულ ისტორიას ეძღვნება.

სამეგრელო-ზემო სვანეთის სახელმწიფო რწმუნებული დავით ვერავა ვიცე-პრემიერთან, თავდაცვის მინისტრ ირაკლი ჩიქოვანთან, პირველ ლედისთან თამარ ბაგრატიონთან, პარლამენტის წევრებთან და ადგილობრივი ხელისუფლების წარმომადგენლებთან ერთად ჭყონდოდობის დღესასწაულთან დაკავშირებით გამართულ საზეიმო წირვას დაესწრო.

მარტვილის ყოვლადწმინდა ღვთისმშობლის მიძინების სახელობის საკათედრო ტაძარში წირვა სრულიად საქართველოს კათოლიკოს-პატრიარქმა შიო III-მ აღავლინა.

დავით აღმაშენებლის აღმზრდელისა და მწიგნობართუხუცესის, გიორგი ჭყონდიდელის ხსენების დღე მარტვილში საეკლესიოსთან ერთად საერო დღესასწაულიცაა. დღის განმავლობაში მარტვილის ცენტრალურ მოედანზე საზეიმო ღონისძიებები გაიმართა. მოეწყო ეთნოკუთხეები, გამოიფინა ხელთნაკეთი ნივთები, გაიმართა მეგრული სამზარეულოს მასტერკლასები.

ღონისძიების ფარგლებში დაჯილდოვდნენ საპატიო მარტვილელები. ჭყონდიდობა საღამოს გალა კონცერტით დასრულდება.

სამეგრელო-ზემო სვანეთის რეგიონში მცხოვრებ 29 დევნილს სასოფლო-სამეურნეო საქმიანობის მხარდაჭერის მიზნით ხელის ტრაქტორები გადაეცა.

დევნილთა, შრომის, ჯანმრთელობისა და სოციალური დაცვის სამინისტროს ინფორმაციით, აგრომეურნეობის ხელშეწყობის პროგრამის ფარგლებში, მთელი ქვეყნის მასშტაბით, ჯამში იძულებით გადაადგილებული 240 პირი დაფინანსდა.

დევნილთა სააგენტომ პროგრამის გამარჯვებულებს, მათივე მოთხოვნის შესაბამისად, ხელის ტრაქტორები, სასოფლო-სამეურნეო აგრეგატები და მრავალწლიანი კულტურის ნერგები შეუსყიდა.

სახელმწიფო პროგრამა ყოველწლიურად ხორციელდება და მიზნად ისახავს დაეხმაროს სოფლად მცხოვრებ იძულებით გადაადგილებულ ოჯახებს მათი ყოველდღიური საქმიანობა სტაბილურ შემოსავლის წყაროდ აქციონ.

ხვალ, 25 სექტემბერს, მარტვილის მუნიციპალიტეტში ჭყონდიდობის დღესასწაული აღინიშნება. მარტვილის ყოვლადწმინდა ღვთისმშობლის მიძინების სახელობის საკათედრო ტაძარში საზეიმო წირვას სრულიად საქართველოს კათოლიკოს-პატრიარქი შიო III აღავლენს.

მოქალაქეთა შეუფერხებელი და კომფორტული გადაადგილების უზრუნველსაყოფად, დილის 09:00 საათიდან საბაგირო გზა უფასოდ მოემსახურება ყველა მსურველს. ტაძრის ტერიტორიაზე ავტომობილებით ასვლა შეიზღუდება.

მთელი დღის განმავლობაში მარტვილში სხვადასხვა კულტურული, სპორტული და შემეცნებითი აქტივობები გაიმართება.

პროგრამა ვრცლად:

სამეგრელო-ზემო სვანეთის სახელმწიფო რწმუნებულის მოადგილე დავით კუხალეიშვილი და ზუგდიდის საკრებულოს თავმჯდომარე მამუკა წოწერია, ცნობილი ფერმწერის ზაირა ბეჭვაიას პერსონალური გამოფენის გახსნას დაესწრნენ.

გამოფენა მხატვრის მშობლიურ ქალაქ ზუგდიდში გაიმართა. ღონისძიებას ზვიად გამსახურდიას საპრეზიდენტო ცენტრმა უმასპინძლა. სტუმრებს შესაძლებლობა ქონდათ დაეთვალიერებინათ მხატვრის გამორჩეული პალიტრა.

ზაირა ბეჭვაია მიმდინარე წლის აპრილში გარდაიცვალა. ის საქართველოზე, მის მშობლიურ ქალაქსა და პროფესიაზე უსაზღვროდ შეყვარებული ხელოვანი იყო. მისი ნამუშევრების გამოფენა ევროპისა და ამერიკის არაერთი ქვეყნის ცნობილ საგამოფენო სივრცეში გაიმართა, მათ შორის ლუვრში.

მხატვრის ნამუშევრები ინახება საფრანგეთის, ამერიკის შეერთებული შტატების, გერმანიის, დიდი ბრიტანეთის, ნორვეგიის, თურქეთის, ბულგარეთის, სამხრეთ აფრიკისა და სხვა ქვეყნების კერძო კოლექციებში.

გამოფენის გახსნას ადგილობრივი ხელისუფლების და საზოგადოების სხვადასხვა სფეროს წარმომადგენლები ესწრებოდნენ.

ფოთელი სპორტსმენი ალექსანდრე გვასალია „ზასლავლის თასი 2026“-ის გამარჯვებულია. წარმატებულ სპორტსმენს მიღწეული შედეგი ფოთის მერმა ბექა ვაჭარაძემ მიულოცა.

18-20 სექტემბერს, ბელარუსის ქალაქ ზასლავლში გამართულ წყალსათხილამურო სპორტის საერთაშორისო ტურნირზე, 10 წლის ალექსანდრე გვასალიამ, Under 10 Boys კატეგორიაში, სლალომის დისციპლინაში პირველი ადგილი დაიკავა.

„განსაკუთრებით საამაყოა, რომ ამ გამარჯვებით ალექსანდრემ მსოფლიო რეიტინგშიც პირველი ადგილი დაიკავა.

ვულოცავ ალექსანდრეს, მის მწვრთნელებსა და გულშემატკივრებს ამ მნიშვნელოვან წარმატებას! ვუსურვებ მას წარმატებულ სპორტულ კარიერას. მჯერა, წინ კიდევ არაერთი დიდი გამარჯვებაა“, - განაცხადა ფოთის მერმა.

დადიანების სასახლეთა ისტორიულ-არქიტექტურული მუზეუმის ეზოში, ზუგდიდის საპატიო მოქალაქის, საპატიო ზუგდიდელისა და ზუგდიდის დამსახურებული მოღვაწის წოდების მინიჭების ცერემონია და კონცერტი გაიმართა.

ღონისძიებას სამეგრელო-ზემო სვანეთის სახელმწიფო რწმუნებული დავით ვერავა, რწმუნებულის მოადგილეები, ზუგდიდის მერი დავით კოდუა, საკრებულოს თავმჯდომარე მამუკა წოწერია, ზუგდიდის დელეგატი ედიშერ თოლორაია, პარლამენტის წევრები და საზოგადოების სხვადასხვა სფეროს წარმომადგენლები დაესწრნენ.

ღონისძიების პარალელურად დადიანების ეკატერინესეული სასახლის ფასადზე 3D ინსტალაცია მოეწყო.

საპატიო ზუგდიდელის წოდება მიენიჭა:

რობერტ აბსანძეს - მხატვარ-კერამიკოსს, მოქანდაკეს, ტრადიციული ხალხური რეწვის ასოციაციის წევრს, ზუგდიდის ერთ-ერთი სავიზიტო ბარათის-ხელოვნებისა და კულტურის კერა „ორკოლ სტუდიას“ შემქმნელს. ხელოვანს, რომლის შემოქმედება ეფუძნება ქართულ ტრადიციებსა და ეროვნულ კულტურას, კერამიკის ისტორიული ტრადიციების, ფორმების, ორნამენტებისა და ტექნოლოგიების შესწავლასა და პოპულარიზაციას. კოლხური კულტურული მემკვიდრეობის წარმოჩენაში შეტანილი მნიშვნელოვანი წვლილისთვის.

იური გუგუჩიას - ინჟინერ-მექანიკოსს, საქართველოს დამსახურებულ ინჟინერს, სხვადასხვა წლებში ელექტროსადგურ „ენგურჰესის“ მშენებლობის უფროსის პირველ მოადგილეს, ელექტროსადგურ „ვარციხე ჰესის“ მშენებლობის ორგანიზატორს, საქართველოს ენერგეტიკისა და ელექტროფიკაციის მთავარი სამმართველოს ზუგდიდის საწარმოო გაერთიანების გენერალურ დირექტორს, ზუგდიდის გამგებლისა და სახელმწიფო რწმუნებულის ყოფილ მოადგილეს, საპატრიარქოს ფონდის აღმასრულებელ დირექტორს, საქართველოს ენერგეტიკის საინჟინრო აკადემიის ნამდვილ წევრ-აკადემიკოსს, ღირსების ორდენის კავალერს, ენერგეტიკისა და ინფრასტრუქტურის სფეროში გაწეული მრავალწლიანი და ნაყოფიერი საქმიანობისთვის.

თორნიკე (სოსო) კილასონიას - ტექნიკურ მუშაკს, კეთილმოწყობის მართვის ცენტრის თანამშრომელს, ინფრასტრუქტურისა და კეთილმოწყობის უზრუნველყოფის მიმართულებით ერთგული საქმიანობისთვის, ცენტრის ყოველდღიურ საქმიანობაში აქტიური ჩართულობისთვის, მაღალი პასუხისმგებლობის გრძნობითა და საქმისადმი ერთგული დამოკიდებულებით გამორჩეულ პიროვნებას.

ავთანდილ გახოკიძეს - საქართველოს დამსახურებულ მწვრთნელს ძალოსნობაში, სხვადასხვა წლებში საქართველოს ეროვნული ძალოსნობის ნაკრებისა და საქართველოს ძალოსნობის ახალგაზრდული ნაკრების მთავარ მწვრთნელს, საქართველოს საუკეთესო მწვრთნელის ტიტულის რვაგზის მფლობელს, აფხაზეთის ომის მონაწილეს, ღირსების ორდენის მფლობელს, მრავლგზის ოლიმპიური ჩემპიონის აღმზრდელსა და მასწავლებელს, ძალოსნობის განვითარებაში შეტანილი განსაკუთრებული წვლილისთვის, მრავალწლიანი და ნაყოფიერი სამწვრთნელო საქმიანობისთვის.

იღუმენია დინარს - (ერობაში დარეჯან ქვარაიას) ოჭანეს წმინდა ნინოს სახელობის დედათა მონასტრის წინამძღვარს, ღვთისა და წმინდა ეკლესიისადმი ერთგულ მსახურსა და სულიერ მოღვაწეს, მრავალწლიანი თავდადებული სასულიერო მსახურებისთვის, კორცხელის დედათა მონასტერში გაწეული ნაყოფიერი სულიერი ღვაწლისთვის, ოჭანეს წმინდა ნინოს სახელობის დედათა მონასტრის აღორძინებაში შეტანილი გამორჩეული წვლილისთვის. დედა დინარი, ღვთისა და წმინდა ეკლესიისადმი ერთგული მსახურებისა და სულიერი ღვაწლისთვის, დაჯილდოებულია საქართველოს ავტოკეფალური სამოციქულო ეკლესიის განსაკუთრებული ჯილდოთი - ოქროს ჯვრის ტარების უფლებით;

ზუგდიდის საპატიო მოქალაქის წოდება მიენიჭა:

დავით ნარმანიას - მეცნიერს, ეკონომიკის აკადემიურ დოქტორს, პედაგოგს, ივანე ჯავახიშვილის სახელობის თბილისის სახელმწიფო უნივერსიტეტის პროფესორს, მენეჯმენტისა და ადმინისტრირების კათედრის გამგეს. ოთხმოცდაათზე მეტი სამეცნიერო და კვლევითი ნაშრომის ავტორს და თანაავტორს. სხვადასხვა წლებში საქართველოს რეგიონული განვითარებისა და ინფრასტრუქტურის მინისტრს, ქალაქ თბილისის ყოფილ მერს. დღემდე საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) თავმჯდომარეს.

ზურაბ გუგუჩიას - მეცნიერს, ფიზიკის მეცნიერებათა დოქტორს, ციურიხის უნივერსიტეტის დოქტორს, ამავე უნივერსიტეტის ისტორიაში ყველა დროის ყველაზე ახალგაზრდა პროფესორს, შვეიცარიის უდიდესი სამეცნიერო ცენტრის პაულ შერერის ინსტიტუტის თანამშრომელს, 2026 წლის აპრილიდან შვედეთის ლუნდის უნივერსიტეტის პროფესორს, ზეგამტარობისა და მაგნეტიზმის მიმართულებით მნიშვნელოვანი სამეცნიერო აღმოჩენების ავტორს, სამოცდაათამდე სამეცნიერო ნაშრომის ავტორს, შვეიცარიის სამეცნიერო ეროვნული ფონდის პრესტიჟული ჯილდოს ორგზის მფლობელს, ბერკლის, პრინსტონისა და ტოკიოს უნივერსიტეტებთან სამეცნიერო თანამშრომლობით გამორჩეულ მეცნიერს, ნიუ-იორკის კოლუმბიის უნივერსიტეტის ფიზიკის ფაკულტეტის მეცნიერ-თანამშრომელს, წინანდლის საერთაშორისო პრემიის მფლობელსა და ღირსების ორდენის კავალერს, ფიზიკის მეცნიერების განვითარებაში, კვანტურ მასალებში ზეგამტარობასა და მაგნეტიზმს შორის ურთიერთკავშირის კვლევაში შეტანილი გამორჩეული წვლილისა და საერთაშორისო სამეცნიერო სივრცეში მოპოვებული მაღალი აღიარებისთვის.

გიორგი ყუფუნიას - პროფესიით სასოფლო - სამეურნეო დარგის წარმომადგენელს, ქველმოქმედებით გამორჩეულ პიროვნებას. ზუგდიდის მუნიციპალიტეტის ჭკადუაშის ადმინისტრაციულ ერთეულში წმინდა გიორგის სახელობის ეკლესიის მშენებლობის ინიციატორსა და ქტიტორს.

კობა შანავას - ექიმს, მედიცინის მეცნიერებათა დოქტორს, პროფესორს, ტრანსპლანტოლოგს, საქართველოში ღვიძლის ქირურგიისა და ღვიძლის ტრანსპლანტაციის ფუძემდებელს, ევროპის ტრანსპლანტოლოგთა საზოგადოების წევრს, ექსპერიმენტული და კლინიკური მედიცინის საერთაშორისო ასოციაციის პრეზიდენტს, საერთაშორისო ტრანსპლანტოლოგთა საზოგადოების წევრს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ტრანსპლანტაციის საბჭოს წევრს. ამჟამად საქართველოს თავდაცვის სამინისტროს გიორგი აბრამიშვილის სახელობის სამხედრო ჰოსპიტლის დირექტორს.

ავთანდილ დანელიას - ვეტერან ფეხბურთელს, გამორჩეულ ფეხბურთელთა არაერთი თაობის აღმზრდელს, სხვადასხვა წლებში „დინამო ზუგდიდისა“ და საფეხბურთო კლუბ „ლაზიკას“ მწვრთნელს, ზუგდიდის ფეხბურთის ფედერაციის პრეზიდენტის მოადგილეს, ვეტერან ფეხბურთელთა კავშირის თავმჯდომარეს, მრავალწლიანი სპორტული და საზოგადოებრივი მოღვაწეობის განმავლობაში ზუგდიდის ფეხბურთის განვითარებაში შეტანილი მნიშვნელოვანი წვლილისთვის, ახალგაზრდა თაობების აღზრდისა და სპორტული ტრადიციების განმტკიცებისთვის.

დამსახურებული მოღვაწის წოდება მიენიჭა:

მერი ჭანტურიას - ექიმ-თერაპევტს, მრავალწლიანი და ნაყოფიერი სამედიცინო საქმიანობისთვის, მაღალი პროფესიონალიზმისა და პაციენტებისადმი გულისხმიერი დამოკიდებულებისთვის. ადამიანს, რომელიც ექვს ათეულ წელზე მეტია ემსახურება მედიცინას და დღემდე მუშაობს ოჯახის ექიმად კორცხელის საექიმო ამბულატორიაში;

დოდო გეთიას - პედაგოგს, ინგლისური ენისა და ლიტერატურის ღვაწლმოსილ მასწავლებელს, უფროსი მასწავლებლის სტატუსის მფლობელს, მრავალი თაობის აღმზრდელს, განათლების სფეროში მრავალწლიანი და ნაყოფიერი საქმიანობისთვის. ქალაქ ზუგდიდის №1 საჯარო სკოლაში პედაგოგიური და მმართველობითი საქმიანობისთვის, უცხო ენების სწავლების განვითარებაში შეტანილი მნიშვნელოვანი წვლილისთვის.

მზია მატკავას - პედაგოგს, სამუსიკო ხელოვნების დამსახურებულ მოღვაწეს, თავისი საქმის პროფესიონალს, მუსიკის ღვაწლმოსილ მასწავლებელს, რომელმაც მრავალწლიანი პედაგოგიური საქმიანობით ცოდნა, გამოცდილება და მუსიკისადმი სიყვარული არაერთ თაობას გაუზიარა. ქალაქის კულტურულ და საგანმანათლებლო ცხოვრების განვითარებაში შეტანილი მნიშვნელოვანი წვლილისთვის.

გოგი ანჩაბაძეს - ისტორიკოსს, პედაგოგს, სოფელ განმუხურის საჯარო სკოლის ყოფილ დირექტორს, განათლების სფეროში მრავალწლიანი და ღირსეული საქმიანობისთვის, პედაგოგთა საზოგადოებაში დამსახურებული ავტორიტეტისა და პროფესიული საქმიანობის მაღალი პასუხისმგებლობით, საქმისადმი ერთგულებითა და პედაგოგიური ღირსებით წარმართვისთვის. მოსწავლეთა განათლებასა და აღზრდაზე განსაკუთრებული ზრუნვისთვის, ასევე ორგანიზატორული და მენეჯერული საქმიანობისთვის.

ღონისძიების საკონცერტო ნაწილში მონაწილეობდნენ თამარ გვერდწითელი, სიმფონიური ორკესტრი, მაესტრო-ნიკოლოზ ნიკვაშვილის დირიჟორობით და ფოლკლორული ანსამბლი ,,ოდოია”. ღონისძიების წამყვანი გიორგი კალანდია იყო.

ზურაბ გუგუჩია, წარმატებული ფიზიკოსი, რომელსაც დღეს ზუგდიდის საპატიო მოქლაქეობა მიენიჭა მშობლიურ ქალქთან კავშირს განსაკუთრებულს უწოდებს და აცხადებს, რომ ეს აღიარება მისთვის მნიშვნელოვანია. ზურაბ გუგუჩია უცხოეთში იმყოფება ამიტომაც ჯილდო დღეს მამას გადაეხა:

,,რამდენად შორსაც არ უნდა წაგვიყვანოს ცხოვრებამ, მშობლიურ ქალაქთან კავშირი ყოველთვის განსაკუთრებული რჩება. არსებობს აღიარებები, რომლებიც განსაკუთრებით ძვირფასია. ზუგდიდის საპატიო მოქალაქის წოდება ჩემთვის სწორედ ასეთია. მშობლიური ქალაქისგან მიღებული ეს პატივი უდიდესი სიხარული, სიამაყე და ამავდროულად დიდი პასუხისმგებლობაა. გულითადი მადლობა ზუგდიდის მერიას და ყველა იმ ადამიანს, ვინც ამ გადაწყვეტილების მიღებაში მონაწილეობდა! ასევე, ვულოცავ ყველა დაჯილდოებულს!” - წერს გუგუჩია.

ზურაბ გუგუჩია მეცნიერია, ფიზიკის მეცნიერებათა დოქტორი, ციურიხის უნივერსიტეტის დოქტორი, ამავე უნივერსიტეტის ისტორიაში ყველა დროის ყველაზე ახალგაზრდა პროფესორი, შვეიცარიის უდიდესი სამეცნიერო ცენტრის პაულ შერერის ინსტიტუტის თანამშრომელი, 2026 წლის აპრილიდან შვედეთის ლუნდის უნივერსიტეტის პროფესორი, ზეგამ ტარობისა და მაგნეტიზმის მიმართულებით მნიშვნელოვანი სამეცნიერო აღმოჩენების ავტორი, სამოცდაათამდე სამეცნიერო ნაშრომის ავტორი, შვეიცარიის სამეცნიერო ეროვნული ფონდის პრესტიჟული ჯილდოს ორგზის მფლობელი, ბერკლის, პრინსტონისა და ტოკიოს უნივერსიტეტებთან სამეცნიერო თანამშრომლობით გამორჩეული მეცნიერსლი, ნიუ-იორკის კოლუმბიის უნივერსიტეტის ფიზიკის ფაკულტეტის მეცნიერ-თანამშრომელი, წინანდლის საერთაშორისო პრემიის მფლობელი და ღირსების ორდენის კავალერი, ფიზიკის მეცნიერების განვითარებაში, კვანტურ მასალებში ზეგამტარობასა და მაგნეტიზმს შორის ურთიერთკავშირის კვლევაში შეტანილი გამორჩეული წვლილის ავტორი.