წალენჯიხის მუნიციპალიტეტის კურორტ სქურში მაშველებმა მდინარეში გაუჩინარებული მამამკაცი ციცხალი იპოვეს.

44 წლის ირაკლი მაქაცარია ადიდებულ მდინარე წისქვილარაში დედა-შვილის გადასარჩენად ჩავიდა. ორივე მათგანის უსაფრთხო ადგილას გამოყვანა შეძლო თავად კი მდინარემ გაიტაცა.

როგორც ადგილზე ყვებიან, ირაკლი მაქაცარიამ მდინარიდან გამოსვლა მოახერხა თუმცა გზა აებნა და მაშველებმა ის მდინარის მეორე მხარეს რამდენიმე საათიანი ძებნის შემდეგ იპოვეს.

ადგილზე იმყოფებოდა წალენჯიხის მუნიციპალიტეტის მერი გუბა საჯაია.

შერიგებისა და სამოქალაქო თანასწორობის საკითხებში სახელმწიფო მინისტრის აპარატი - 2008 წლის რუსეთ-საქართველოს ომის მე-18 წლისთავთან დაკავშირებით განცხადებას ავრველებს:

,,18 წლის წინ, საქართველოს წინააღმდეგ განხორციელებული ფართომასშტაბიანი სამხედრო აგრესიის შედეგად, რუსეთის ფედერაციამ საერთაშორისო სამართლის ფუნდამენტური ნორმების უგულვებელყოფით, მოახდინა საქართველოს განუყოფელი ტერიტორიების - აფხაზეთისა და ცხინვალის რეგიონების უკანონო ოკუპაცია.

შერიგებისა და სამოქალაქო თანასწორობის საკითხებში სახელმწიფო მინისტრის აპარატი პატივს მიაგებს 2008 წლის რუსეთ-საქართველოს ომში, საქართველოს ტერიტორიული მთლიანობისთვის ბრძოლაში დაღუპული გმირების, მებრძოლებისა და სამოქალაქო პირების ხსოვნას და თანაგრძნობას უცხადებს მათ ოჯახებს, ახლობლებსა და სრულიად საქართველოს.

საერთაშორისოდ აღებული ვალდებულებების უხეში დარღვევით, რუსეთის ფედერაცია ამ დრომდე განაგრძობს საქართველოს რეგიონების უკანონო ოკუპაციას, ადგილზე უკანონო კონტროლის გაძლიერებას, სამხედრო, პოლიტიკური და საერთო სოციალურ-ეკონომიკური სივრცის შექმნის პროცესის გაფართოებას, რაც სხვა მიზნებთან ერთად, გამყოფი ხაზების ორივე მხარეს მცხოვრებ ადამიანებს შორის მზარდი კავშირების, ნდობის აღდგენისა და შერიგების პროცესის წინააღმდეგ არის მიმართული. გრძელდება ადგილობრივი მოსახლეობის ფუნდამენტური უფლებების უხეში დარღვევა, მათ შორის, ეთნიკური დისკრიმინაციით, თავისუფალ გადაადგილებაზე დაწესებული მკაცრი შეზღუდვებით, მშობლიურ ენაზე განათლების მიღების აკრძალვით, საკუთრებაზე და საარსებო წყაროებზე წვდომის შეზღუდვით. ასობით ათასი ლტოლვილი და იძულებით გადაადგილებული პირი დღემდე მოკლებულია საკუთარ სახლებში უსაფრთხოდ და ღირსეულად დაბრუნების შესაძლებლობას. დაუსჯელნი რჩებიან საქართველოს მოქალაქეების - დავით ბაშარულის, გიგა ოთხოზორიას, არჩილ ტატუნაშვილის, ირაკლი კვარაცხელიას და თამაზ გინტურის სიცოცხლის ხელყოფაში მონაწილე პირები. ევროკავშირის სადამკვირვებლო მისიას კვლავ არ ეძლევა საკუთარი მანდატის სრულყოფილი შესრულებისა და ოკუპირებულ რეგიონებში მონიტორინგის განხორციელების შესაძლებლობა.

საერთაშორისო სასამართლოების არაერთი გადაწყვეტილების შესაბამისად, რუსეთის ფედერაციას ეკისრება სრული პასუხისმებლობა აფხაზეთისა და ცხინვალის რეგიონებში არსებულ ვითარებასა და განხორციელებულ უკანონო ქმედებებზე.

საქართველოს მთავრობა, მის ხელთ არსებული ყველა ბერკეტისა და მექანიზმის გამოყენებით, ახორციელებს ერთიან ძალისხმევას ოკუპაციის მძიმე შედეგებთან გამკლავების მიზნით და განუხრელად წარმართავს კონფლიქტის მშვიდობიანი მოგვარების პრინციპულ და თანმიმდევრულ პოლიტიკის, რაც ქვეყნის დეოკუპაციისკენ მიმართული ძალისხმევის კვალდაკვალ, მიზნად ისახავს ხელოვნურად გაყოფილი საზოგადოების წევრებს შორის ნდობის მშენებლობას, საერთო ინტერესების გარშემო თანამშრომლობისა და დიალოგის ხელშეწყობას, ისევე როგორც კონფლიქტის შედეგად დაზარალებულ მოსახლეობაზე ზრუნვასა და მათთვის უკეთესი მომავლის შექმნას.

სახელმწიფო მინისტრის აპარატი აფასებს საერთაშორისოდ აღიარებულ საზღვრებში საქართველოს სუვერენიტეტისა და ტერიტორიული მთლიანობის მიმართ საერთაშორისო თანამეგობრობის ურყევ მხარდაჭერას; ასევე, საერთაშორისო პარტნიორების როლს კონფლიქტის მშვიდობიანი მოგვარების, მათ შორის შერიგებისა და ნდობის აღდგენის პროცესში” - წერია განცხადებაში.

ქალაქ ფოთის მერმა ბექა ვაჭარაძემ, 2008 წლის აგვისტოს ომში დაღუპულთა ოჯახის წევრებთან ერთად, აგვისტოს ომში დაღუპულთა მემორიალი გვირგვინით შეამკო.

ფოთის სანაპირო დაცვის ბაზაზე კი პატივი მიაგეს 2008 წლის აგვისტოს ომის დროს დაღუპული მეზღვაურების ხსოვნას და მათი ხსოვნის პატივსაცემად შავ ზღვაში გვირგვინი ჩაუშვეს.

„8 აგვისტო ჩვენი ქვეყნის უახლესი ისტორიის ერთ-ერთი ყველაზე ტრაგიკული დღეა.

დღეს პატივი მივაგეთ 2008 წლის აგვისტოს ომში დაღუპულ გმირებს, რომლებმაც საქართველოს თავისუფლების, დამოუკიდებლობისა და ტერიტორიული მთლიანობის დასაცავად საკუთარი სიცოცხლე გაიღეს.

ოთარ კიკალეიშვილი

ლევან ტურავა

გოჩა კაცაძე

ზვიად ბარბაქაძე

შალვა გაბუნია

ზვიად ჩიჩუა

ზვიად დათუაშვილი

თემურ ფიჩხაია

ზურაბ ნანავა

გიორგი ღვინჯილია

გელა ჯიქია

თეიმურაზ ჭიტაძე

გვჯერა, აუცილებლად დადგება დღე, როდესაც ერთიან საქართველოში ვიცხოვრებთ.

ქედს ვიხრი ჩვენი გმირების ხსოვნის წინაშე. მათი სახელები, თავდადება და გმირობა არასოდეს მიეცემა დავიწყებას" -განაცხადა ფოთის მერმა ბექა ვაჭარაძემ

ხობის მუნიციპალიტეტის მერმა დავით ბუკიამ და საკრებულოს თავმჯდომარე გოჩა ქაჯაიმ აგვისტოს ომში დაღუპულთა ოჯახების წევრებთან, ადგილობრივი თვითმმართველობის და საზოგადოების წარმომადგენლებთან ერთად 2008 წლის რუსეთ-საქართველოს ომის დროს დაღუპულთა ხსოვნას პატივი მიაგეს და მემორიალი ყვავილებით შეამკეს.

ქალაქ ხობის წმინდა სამების საკათედრო ტაძარში, ტაძრის წინამძღვარმა, დეკანოზმა კირიონ დარასელიამ ომში დაღუპულთა სულების მოსახსენიებელი პანაშვიდი გადაიხადა.

საქართველოს ტერიტორიული მთლიანობისათვის ბრძოლას ცხრა ხობელი ვაჟკაცის - გოგა ბერაიას, მიხეილ იოსავას, ლევან ჭოჭუას, დათა ხურცილავას, გოგა ჭითანავას, ზვიად დათუაშვილის, ლევან ტურავას, გოგიტა ქარჩავას და რამაზ კიტიას სიცოცხლე ემსხვერპლა.

2008 წლის 8 აგვისტოს რუსეთ-საქართველოს ომიდან 18 წელი გავიდა.

ზუგდიდის მერმა დავით კოდუამ, ომში დაღუპული კაპრალის ბადრი ბერანძის შვილთან საბა ბერანძესთან და საკრებულოს თავმჯდომარე მამუკა წოწერიასთან ერთად, რუსეთ-საქართველოს ომში დაღუპულთა მემორიალი ყვავილებით შეამკო.

,,2008 წლის აგვისტოს ომი საქართველოს უახლესი ისტორიის ერთ-ერთი ყველაზე მძიმე და ტრაგიკული მოვლენაა. სამშობლოს თავისუფლების და ტერიტორიული მთლიანობისთვის ბრძოლას ზუგდიდიდან ოთხი კაპრალი ემსხვერპლა - ბადრი ბერანძე, დავით ჯიქია, სერგეი გოროზია და კობა სერგია.

ომში მონაწილე თითოეული ადამიანის თავდადება, სიმამაცე და სამშობლოსადმი ერთგულება ჩვენი ეროვნული მეხსიერების განუყოფელი ნაწილია. მათი ხსოვნის პატივისცემა ჩვენი საერთო პასუხისმგებლობაა როგორც ერთმანეთის, ისე მომავალი თაობების წინაშე”-აღნიშნა მერმა.

აფხაზეთის მეომართა კავშირის განცხადებას ავრცელებს, სადაც „ნაციონალური მოძრაობის“ წევრის გიორგი ბარამიძის მიერ იაგო ხვიჩიას საავტორო გადაცემაში "საქართველოს დაბადება - 9 წელი" გაკეთებულ განცხადებას ეხმაურება.

„აფხაზეთის მეომართა კავშირი კატეგორიულად გმობს იაგო ხვიჩიას საავტორო გადაცემაში "საქართველოს დაბადება - 9 წელი" გიორგი ბარამიძის განცხადებას, რომლის თანახმადაც ქართველი მეომრები აფხაზ ტყვეებს ხვრეტდნენ, ხოლო რუსულ მხარეს ტყვეების მიმართ „დისციპლინა“ ჰქონდა და მათ მიერ აყვანილ ტყვეებს ცვლიდნენ.

ეს განცხადება პროვოკაციული, მოღალატეობრივი და ანტისახელმწიფოებრივია, რომელიც პატრიოტ ქართველ მებრძოლებს სამხედრო დამნაშავეებად წარმოაჩენს, ლახავს მათ პატივსა და ღირსებას და ვერაგულად და მიზანმიმართულად ამახინჯებს სინამდვილეს! ასეთი შეფასება ჩვენთვის არამხოლოდ ისტორიულად უსაფუძვლო და მიუღებელია, არამედ განსაკუთრებნით შეურაცხმყოფელია იმ ადამიანებისთვის, რომლებმაც აფხაზეთის ომში საკუთარი სიცოცხლის ფასად იცავდნენ საქართველოს ტერიტორიულ მთლიანობას.

საქართველოს მებრძოლთა კოლექტიური დადანაშაულება მტკიცებულებების გარეშე ვერანაირად ვერ აღიქმება ისტორიულ ფაქტად! მოვუწოდებთ ბარამიძეს, დაასახელოს მისი განცხადების დამადასტურებელი კონკრეტული შემთხვევები და ფაქტები, რაც უკვე შესაბამისი სტრუქტურების მოკვლევის საგნად უნდა იქცეს!

განსაკუთრებით მიუღებელია საქართველოს წინააღმდეგ წარმოებული ომის კონტექსტში რუსეთის სამხედრო ძალების დისციპლინისა და ტყვეებისადმი „ჰუმანური“ დამოკიდებულების დადებით მაგალითად წარმოჩენა.

ეს არ შეესაბამება იმ ისტორიულ და პოლიტიკურ რეალობას, რომელშიც განვითარდა აფხაზეთის კონფლიქტი და რომლის უმძიმესი შედეგებიც საქართველოსთვის დღემდე დიდ გამოწვევად რჩება.

ისტორიული სიმართლის დადგენა ვერ მოხდება საქართველოს დამცველების კოლექტიური დადანაშაულებით და რუსეთის სამხდრო როლის მორალურად გამართლების გზით.

აფხაზეთის ომის ისტორია არ არის პოლიტიკური სპეკულაციის საგანი.

ჩვენ არავის მივცემთ უფლებას, ქვეყნისთვის დამაზიანებელი განცხადებებით ქართველი მებრძოლების ღირსება შეილახოს და დაღუპულთა ხსოვნა პოლიტიკური მიზნებისთვის იქნას გამოყენებული!

აფხაზეთის მეომართა

კავშირის თავმჯდომარე

ანზორ მარგიანი

აფხაზეთის მეომართა კავშირის

მეთაურთა საბჭოს თავმჯდომარე

ლევან ქეცბაია“ - წერია გავრცელბულ განცხადებაში.

სპორტული ინფრასტრუქტურის განვითარებისა და ახალგაზრდებში ჯანსაღი ცხოვრების წესის პოპულარიზაციის მიზნით, ზუგდიდის მუნიციპალიტეტში სპორტული მოედნების მოწყობისა და რეაბილიტაციის პროცესი აქტიურად მიმდინარეობს.

ზუგდიდში, ჯავახიშვილის ქუჩასა და ცაიშის ადმინისტრაციულ ერთეულში ახალი სპორტული მოედნები გაიხსნა.

ორი ახალი სპორტული მოედნის მოსაწყობად, ადგილობრივი ბიუჯეტიდან 360 000 ლარამდე დაიხარჯა.

ახალი სპორტული მოედნების მშენებლობა ზუგდიდის მერის წინასაარჩევნო დაპირება იყო.

მოედნები სპორტული შეჯიბრებით გაიხსნა. მონაწილე გუნდებს მედლები, თასები და სიგელები გადაეცათ.

ახალი სტადიონი აშენდა ბარამიას ქუჩაზე, რეაბილიტაცია ჩაუტარდა ქუჯის, თაბუკაშვილისა და ინგირის სტადიონებს. ამ ეტაპზე არსებული მინი სტადიონის რეაბილიტაცია მიმდინარეობს ოქტომბერის ადმინისტრაციულ ერთეულსა და გორის ქუჩაზე. უახლოეს პერიოდში კი მესხიას ქუჩაზე არსებული სტადიონის რეაბილატაცია დაიწყება.

ზუგდიდისა და ცაიშის მიტროპოლიტმა გერასიმე შარაშენიძემ, ლანა ლატარიას ოჯახს მიუსამძიმრა და გარდაცვლილს პანაშვიდი გადაუხადა. შესაბამის ინფორმაციას ზუგდიდისა და ცაიშის ეპარქია ავრცელებს:

,,ამა წლის 5 აგვისტოს ზუგდიდისა და ცაიშის მიტროპოლიტი გერასიმე ეპარქიის სამღვდელოებასთან ერთად იმყოფებოდა ლანა ლატარიას სახლში, მის ოჯახს მიუსამძიმრა და გარდაცვლილის სულის საოხად პანაშვიდი აღავლინა.

ზუგდიდისა და ცაიშის ეპარქია საზოგადოებას სთხოვს, რომ თავი შეიკავოს კომენტარებისაგან და ვილოცოთ ლანა ლატარიას სულის ცხონებისთვის” - წერია გავრცელებულ ინფორმაციაში.

ნაურუს რესპუბლიკის მხრიდან ე.წ. აფხაზეთის რესპუბლიკასთან და ე.წ. სამხრეთ ოსეთის რესპუბლიკასთან დიპლომატიური ურთიერთობების გაუქმების გადაწყვეტილებით კიდევ ერთხელ დასტურდება, რომ საერთაშორისო სამართლის ნორმების პატივისცემა და დაცვა არის ჯანსაღი საერთაშორისო ურთიერთობების საფუძველი, - განაცხადა საქართველოს პრემიერ-მინისტრმა ირაკლი კობახიძემ მთავრობის სხდომაზე.

პრემიერმა საგარეო საქმეთა მინისტრს და თითოეულ დიპლომატს მადლობა გადაუხადა.

„21 ივლისს ნაურუს რესპუბლიკის მთავრობამ მიიღო გადაწყვეტილება ე.წ. აფხაზეთის რესპუბლიკის და ე.წ. სამხრეთ ოსეთის რესპუბლიკის დიპლომატიური ურთიერთობების გაუქმების შესახებ.

ამ გადაწყვეტილებით კიდევ ერთხელ დასტურდება, რომ საერთაშორისო სამართლის ნორმების პატივისცემა და დაცვა არის ჯანსაღი საერთაშორისო ურთიერთობების საფუძველი. საქართველო მზადაა, ნაურუს რესპუბლიკასთან დაამყაროს დიპლომატიური ურთიერთობები და ხელი შეუწყოს თანამშრომლობის გაღრმავებას.

მინდა მადლობა გადავუხადო საგარეო საქმეთა მინისტრს, ქალბატონ მაკა ბოჭორიშვილს და თითოეულ დიპლომატს, რომელიც მუშაობს წარმატებული არაღიარების პოლიტიკის განხორციელებისათვის, - განაცხადა პრემიერმა.

2026 წელს ოკუპირებულ ტერიტორიებზე მცხოვრები აბიტურიენტები საქართველოს უმაღლეს საგანმანათლებლო დაწესებულებებში ერთიანი ეროვნული გამოცდების გარეშე ჩაირიცხებიან და საქართველოს მთავრობის მიერ დაფუძნებულ უმაღლეს საგანმანათლებლო დაწესებულებებში სწავლის სრული დაფინანსებით ისარგებლებენ, - ინფორმაციას განათლების, მეცნიერების და ახალგაზრდობის სამინისტრო ავრცელებს.

უწყების ცნობით, აღნიშნულ პროგრამაში მონაწილეობის მსურველთა რეგისტრაცია უკვე დაიწყო და 2026 წლის 5 სექტემბრამდე გაგრძელდება.

„ერთიანი ეროვნული გამოცდების გარეშე უმაღლეს საგანმანათლებლო დაწესებულებებში ჩარიცხვის უფლება აქვთ საქართველოს ოკუპირებულ ტერიტორიებზე მცხოვრებ პირებს, რომლებიც ბოლო 2 წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს ოკუპირებულ ტერიტორიაზე არსებულ ზოგადსაგანმანათლებლო დაწესებულებაში და რომელთა სრული ზოგადი განათლება აღიარებულია საქართველოს განათლების, მეცნიერებისა და ახალგაზრდობის სამინისტროს მიერ დადგენილი წესით.

მსურველთა განაცხადები მიიღება მატერიალური ფორმით გორის, კასპის, ქარელისა და ხაშურის მუნიციპალიტეტებში სახელმწიფო რწმუნებულის ადმინისტრაციაში (მისამართი: გორი, ფერაძის ქ. N5; თბილისი, პეტრე ქავთარაძის ჩიხი N1) და ელექტრონული ფორმით აფხაზეთის ავტონომიური რესპუბლიკის განათლებისა და კულტურის სამინისტროში ვებგვერდზე“, - აღნიშნულია გავრცელებულ ინფორმაციაში.

აქტიურ ფაზაში შევიდა ანაკლიაში ღრმაწყლოვანი პორტის სამუშაოები, - განაცხადა საქართველოს პრემიერ-მინისტრმა ირაკლი კობახიძემ მთავრობის სხდომაზე.

მისივე თქმით, მთავრობის გეგმის მიხედვით, სამუშაოების პირველი ფაზა 2029 წელს უნდა დასრულდეს, რა დროსაც ღრმაწყლოვანი პორტი პირველი გემების მიღებას შეძლებს.

„პირველი ფაზა ჩვენი გეგმის მიხედვით უნდა დასრულდეს 2029 წელს და 2029 წლისთვის უკვე პირველი გემები უნდა მიიღოს ღრმაწყლოვანმა პორტმა, რისთვისაც აქტიურად წარიმართება სამუშაოები“, - აღნიშნა პრემიერმა.

მესტიისა და ზემო სვანეთის ეპარქია უშგულის მონატრიდან სასულიერო პირების მიმართ განხორციელებული მუქარის გამო განცხადებას ავრცელებს:

„ყველასთვის ცნობილია უშგულის ლამარიის მონასტერთან დაკავშირებით ბოლო პერიოდში განვითარებული მოვლენები. საზოგადოებაში გავრცელებული არასწორი და ურთიერთსაწინააღმდეგო ინფორმაციის გამო, მესტიისა და ზემო სვანეთის ეპარქია საჭიროდ მიიჩნევს განმარტების გაკეთებას.

უშგული საქართველოს ერთ-ერთი უძველესი და გამორჩეული კუთხეა, რომელსაც წლის ამ პერიოდში განსაკუთრებით ბევრი მომლოცველი და ტურისტი სტუმრობს. სწორედ ამიტომ, მნიშვნელოვანია, საზოგადოებამ იცოდეს სიმართლე იმ მოვლენების შესახებ, რომლებიც ბოლო დღეებში სხვადასხვა ინტერპრეტაციით გავრცელდა.

ბოლო პერიოდში ვრცელდება ინფორმაცია, თითქოს უშგულის ლამარიის ტაძარი ადგილობრივმა მღვდელმთავარმა ჩაკეტა და მომლოცველებსა თუ ვიზიტორებს ტაძარში შესვლის შესაძლებლობა აღარ აქვთ. აღნიშნული ინფორმაცია სიმართლეს არ შეესაბამება.

პირიქით, მესტიისა და ზემო სვანეთის ეპარქიის დაარსების შემდეგ, მეუფის განსაკუთრებული ძალისხმევით, გაიხსნა მანამდე მრავალი დაკეტილი ტაძარი, აღდგა რეგულარული საღვთო წირვა-ლოცვა და დაიწყო სულიერი ცხოვრების აღორძინება მთელი ეპარქიის მასშტაბით. ყველა ეს ტაძარი, მათ შორის უშგულის ლამარიაც, გახსნილია როგორც ადგილობრივი მოსახლეობის, ისე მომლოცველებისა და ვიზიტორებისთვის.

რაც შეეხება მონაზვნების მონასტრიდან წამოსვლას, ეს გადაწყვეტილება მიღებულ იქნა მხოლოდ მას შემდეგ, რაც მონასტერში მივიდა დაახლოებით 12–15-კაციანი ჯგუფი და სასულიერო პირებისა და მონაზვნების მიმართ ადგილი ჰქონდა შეურაცხყოფას, მუქარასა და აგრესიულ დამოკიდებულებას.

სასულიერო პირების მისამართით ითქვა, თითქოს „თქვენი მოსვლის შემდეგ სოფელში მდგომარეობა გაუარესდა და სიკვდილიანობამ იმატა“, ასევე, რომ „მონაზვნები აქაურობას ბილწავენ“, „ეს ყველაფერი უნდა დაინგრეს და მოიშალოს“, და რომ „უშგულში შვიდი თავადი ჰყავთ მოკლული და თავზე არავის დასმას არ აპირებენ“.- ეს ნიშნავს იმას რომ მონაზვნები მონასტრიდან გამოაძევეს.

ეკლესია არავის ებრძვის. ჩვენი მოწოდება ყოველთვის იყო და არის მშვიდობა, ლოცვა, სიყვარული და ადამიანების სულიერი მსახურება. თუმცა, სახარებისეული სწავლების შესაბამისად:

„რომელსა ქალაქსა ანუ სოფელსა შეხვიდეთ და არა შეგიწყნარონ თქვენ, არცა ისმინონ სიტყვანი თქვენნი, გამოსლვასა თქვენსა მიერ სახლით ანუ ქალაქით მით, მტუერი ფერჴთა თქუენთაჲ დაიბერტყეთ.“

(მათე 10:14)

მნიშვნელოვანია აღინიშნოს, რომ მონასტრის დატოვებისას ტაძრის გასაღები ადგილობრივებს ჩაბარდათ. შესაბამისად, ტაძარი არავისთვის არის ჩაკეტილი და არც ვინმეს ეზღუდება მასში შესვლის შესაძლებლობა. ადგილობრივი მღვდელმთავრის მხრიდან ტაძრის დაკეტვის შესახებ გავრცელებული ინფორმაცია სიმართლეს არ შეესაბამება.

ამასთანავე, განვითარებულ მოვლენებთან დაკავშირებით სოფელში გაიმართა მოსახლეობის შეკრება, თუმცა აღნიშნულ საკითხზე ერთიანი პოზიცია ვერ ჩამოყალიბდა და გამოიკვეთა განსხვავებული მოსაზრებები.

უშგულის ლამარიის მონასტერში სამონასტრო ცხოვრება და რეგულარული საღვთო მსახურება აღდგება იმ შემთხვევაში, თუ სოფლის მოსახლეობის ნება ამის შესახებ წერილობით იქნება დაფიქსირებული და მას თან ერთვება შესაბამისი ხელმოწერები. ეს აუცილებელია, რათა ნათლად და გამჭვირვალედ დადასტურდეს მოსახლეობის საერთო პოზიცია და საკითხი გადაწყდეს მშვიდობის და ურთიერთპატივისცემის დაცვით.

ჩვენი სურვილია, შეწყდეს ყოველგვარი დაპირისპირება, გაიფანტოს მცდარი ინფორმაცია და თითოეულმა ადამიანმა სიმართლე მშვიდობიანად და მიუკერძოებლად შეაფასოს.

ღმერთმა დალოცოს და გააძლიეროს ყოველი კეთილი ნების ადამიანი, ხოლო ყოვლადწმინდა ღვთისმშობლის, უშგულის ლამარიის მადლით, გვიმრავლოს ყველას მშვიდობა, სიყვარული, ურთიერთპატივისცემა და ერთობა.

დაგლოცოთ უფალმა!“ ნათქვამია ეპარქიის მიერ გავრცელებულ განცხადებაში.

ერთიან ეროვნულ გამოცდებზე ზუგდიდელმა მარიამ კარტოზიამ ქვეყნის მასშტაბით ერთ-ერთი საუკეთესო  შედეგები აჩვენა. 

ზუგდიდის პირველი საჯარო სკოლის კურსდამთავრებულმა მარიამ კარტოზიამ ქართულში 60-დან 60, ინგლისურში 70-დან 70, ქიმიაში 63-დან 62, ხოლო ბიოლოგიაში 70-დან 68 ქულა აიღო. 

მარიამ კარტოზოა სამედიცინოზე მიმართულებაზე აბარებს.

წალენჯიხის მუნიციპალიტეტში ერთდროულად 4 ქუჩაზე გზის რეაბილიტაცია დაიწყო.

სამუშაოები ქალაქ წალენჯიხაში თემურ ფიფიას, ეგნატე ფიფიას და ნაპო ხობელიას ქუჩებზე, ქალაქ ჯვარში კი აკაკი ჭანტურიას ქუჩაზე მიმდინარეობს.

მიმდინარე სამუშაოებს წალენჯიხის მუნიციპალიტეტის მერი გუბა საჯაია მერის მოადგილეებთან, ქალაქის მაჟორიტარ დეპუტატთან და მერის წარმომადგენელთან ერთად გაეცნო და კომპანიის წარმომადგენლებს გაესაუბრა.

​აღნიშნულ მონაკვეთებზე გზის საფარი წლების განმავლობაში ამორტიზებული იყო, რაც ადგილობრივ მოსახლეობას გადაადგილებისას შეფერხებებს უქმნიდა.

პროექტის ფარგლებში იგეგმება გზის სრული განახლება და სანიაღვრე არხების მოწყობა.

​ინფრასტრუქტურული სამუშაოები რეგიონებში განსახორციელებელი პროექტების ფონდიდან გამოყოფილი თანხებით ხორციელდება.

​სარეაბილიტაციო პროექტის დასრულების შემდეგ, წლების განმავლობაში არსებული პრობლემა საბოლოოდ მოგვარდება, რაც ოთხივე ქუჩის მცხოვრებლებსა და სტუმრებს უსაფრთხო, კომფორტული და გამართული საგზაო ინფრასტრუქტურით სარგებლობის შესაძლებლობას მისცემს.

მუნიციპალიტეტში ინფრასტრუქტურული განვითარების პროცესი და სხვადასხვა მიმართულებით დაგეგმილი პროექტების განხორციელება კვლავაც აქტიურად გაგრძელდება.

კეთილსინდისიერება და მოქალაქეების მსახურება იქნება ის ძირითადი პრინციპი, რითაც მერიის თითოეული თანამშრომელი იხელმძღვანელებს - ამის შესახებ ზუგდიდის მუნიციპალიტეტის მერმა დავით კოდუამ მერიის შიდაკონკურსში გამარჯვებულ თანამშრომლებთან შეხვედრაზე ისაუბრა.

ზუგდიდის მერმა თანამშრომლებს სამომავლო ხედვები გააცნო და აღნიშნა, რომ არცერთი მოქალაქის განცხადება არ უნდა დარჩეს დროული რეაგირების გარეშე.

,,თითოეული საჯარო მოხელე უნდა იყოს მოწოდების სიმაღლეზე, რათა მაქსიმალურად შემჭიდროებულ ვადებში მოხდეს პრობლემური საკითხების გადაჭრა და მოქალაქეთა საჭიროებების მაქსიმალური მოგვარება” - განაცხადა ზუგდიდის მერმა.

ჩხოროწყუს მერიის მხარდაჭერითა და ვეტერანების საქმეთა სახელმწიფო სამსახურის ორგანიზებით, ვლადიმერ სანიკიძის სახელობის ომის ვეტერანთა კლინიკური ჰოსპიტლის ექიმებმა , ჩხოროწყუს კლინიკაში, ჩხოროწყუს მუნიციპალიტეტში მცხოვრები ომისა და თავდაცვის ძალების ვეტერანებისა და მათი ოჯახის წევრებისთვის, 1და 2 აგვისტოს საქველმოქმედო სამედიცინო აქცია ჩაატარეს.

ჰოსპიტლის მოძრავი ამბულატორიის საშუალებით, კვალიფიციურ მედიკოსთა ჯგუფის წევრებმა , რომელთა შორის იყვნენ: თერაპევტი, კარდიოლოგი,ზოგადი ქირურგი, ოფთალმოლოგი, დერმატოლოგი, ექიმი-რადიოლოგი (ექოსკოპისტი),ბენეფიციარებს უსასყიდლოდ გაუწიეს სამედიცინო მომსახურება. ჩატარდა ასევე ლაბორატორიული კვლევები.

აქციის მიმდინარეობას ჩხოროწყუს მუნიციპალიტეტის მერი ჯუმბერ იზორია და საკრებულოს თავმჯდომარე ჯანო პერტაია მოადგილეებთან და ვეტერანების საქმეთა სახელმწიფო სამსახურის დირექტორ, გენერალ-მაიორ კობა კობალაძესთან, ომის ვეტერანთა კლინიკური ჰოსპიტლის და ვეტერანების საქმეთა სახელმწიფო სამსახურის წარმომადგენლებთან ერთად დაესწრნენ.

ზუგდიდში, GDS Park Drift-ის ღონისიძიება წუთიერი დუმილით დაიწყო, რომელითაც შეკრებილმა საზოგადოებამ პატივი მიაგო ტრაგიკულად გარდაცვლილ ზუგდიდელ ავტო მრბოლელის, ლაშა ქირიას ხსოვნას. მისმა მეგობრებმა კი ლაშა ქირიას ავტომობილით საჩვენებელი მსვლელობა მოაწყვეს. 

ღონისიძიებას ავტოავარიის დროს გარდაცვლილი ავტო სპორტის მოყვარულის დედა და მეგობრები ესწრებოდნენ.

ამავე თემაზე: ზუგდიდში GDS Park Drift-ის მორიგი ეტაპი გაიმართა

ზუგდიდში, ავტო სპორტის განვითარების, ახალგაზრდების აქტიური ჩართულობისა და სპორტული ტურიზმის ხელშეწყობის მიზნით, GDS Park Drift-ის მორიგი ეტაპი გაიმართა. ინფორმაციას ზუგდიდის მერია ავრველებს.

GDS Park Drift საქართველოს დრიფტის ჩემპიონატის ოფიციალური ეტაპია, რომელიც საქართველოს სხვადასხვა ქალაქში ტარდება და ყოველწლიურად ათასობით მაყურებელს და ავტოსპორტის მოყვარულს აერთიანებს.

ღონისძიების დაწყებამდე წუთიერი დუმილით პატივი მიაგეს ტრაგიკულად გარდაცვლილი ზუგდიდელი ავტო მრბოლელის, ლაშა ქირიას ხსოვნას.

ღონისძიებას ზუგდიდის მუნიციპალიტეტის მერის პირველი მოადგილე ნუგზარ გაბელია, მერის მოადგილე გიორგი ხვიჩია და ადგილობრივი ხელისუფლების წარმომადგენლები დაესწრნენ.

ზუგდიდი მომავალშიც აქტიურად გააგრძელებს მასშტაბური რეგიონული სპორტული ღონისძიებების მასპინძლობას, სპორტული ტურიზმის განვითარებისა და ახალგაზრდული ინიციატივების მხარდაჭერას, რაც მუნიციპალიტეტში სპორტული ცხოვრების კიდევ უფრო გაძლიერებას შეუწყობს ხელს.

ქალაქ მარტვილში თანამედროვე ტურისტული ცენტრის პროექტირება წარმატებით დასრულდა. ინფორმაცია stv.ge-ს მარტვილის მერიაში დაუდასტურეს. მათივე ცნობით, პროექტი ახალ, პრაქტიკულ ეტაპზე გადადის. ამ ეტაპზე სამშენებლო-სარეაბილიტაციო სამუშაოების შესყიდვის მიზნით გამოცხადებულია ბაზრის კვლევა, რომლის დასრულებისთანავე გამოცხადდება ტენდერი.

პროექტის ფარგლებში აშენდება ახალი, თანამედროვე სტანდარტების შესაბამისი შენობა, რომელიც სრულად იქნება ადაპტირებული და კომფორტული ყველა ვიზიტორისთვის.

მარტვილი ტურისტულად ერთ-ერთი ყველაზე დატვირთული მუნიციპალიტეტია. მარტვილის კანიონს, 2025 წლის მონაცემებით საქართველოს დაცული ტერიტორიების ობიექტებს შორის პოომეთეს ღვიმის შემდეგ ყველაზე მეტი ვიზიტორი ეწვია.

საქართველოს კულტურული მემკვიდრეობის დაცვის ეროვნული სააგენტო მარტვილის მუნიციპალიტეტში მდებარე აბედათის ციხის კონსერვაცია-რეაბილიტაციას გეგმავს. სამუშაოები ძეგლის ავთენტურობისა და ისტორიული იერსახის მაქსიმალური შენარჩუნების პრინციპზე დაყრდნობით განხორციელდება.

კულტურული მემკვიდრეობის დაცვის ეროვნული სააგენტოს გენერალური დირექტორის პირველი მოადგილე თამარ ყურაშვილი, მარტვილის მუნიციპალიტეტის მერ გიორგი ნაჭყებიასა და აბედათის ღვთისმშობლის მიძინების მამათა მონასტრის წინამძღვარ მღვდელმონაზონ სტეფანე არზიანთან ერთად, აბედათის ციხის მდგომარეობას ადგილზე გაეცნო. შეხვედრაზე რეაბილიტაციის პროექტის მომზადების ტექნიკური საკითხები განიხილეს.

რეაბილიტაციის პირველ ეტაპზე განხორციელდება ყველაზე მეტად დაზიანებული მონაკვეთების - სამხრეთ-დასავლეთის გალავნის, ჩრდილო-დასავლეთის კოშკისა და მათ მიმდებარე არქიტექტურული ნაშთების კონსერვაცია-რეაბილიტაცია. სამუშაოები მოიცავს დაზიანებული ქვის წყობის გამაგრებას, გამონგრეული მონაკვეთების აღდგენას, ბზარების ინექტირებას, საკონსერვაციო ფენის მოწყობას, ისტორიული მარნის კონსერვაციას, ქვევრების დაცვას, ცალკეული არქიტექტურული ელემენტების რესტავრაციასა და ძეგლის სრულ გაწმენდას მცენარეული საფარისგან.

აბედათის ციხე IV-VI საუკუნეებში აიგო, როდესაც ის ეგრისის სამეფოს დედაქალაქის თავდაცვითი სისტემის ნაწილი გახდა, თუმცა მის შიდა ციხეში ცხოვრების კვალი ძვ. წ. IV ს-დან დასტურდება. სამშენებლო ფენები და არქეოლოგიური მასალები მოწმობს, რომ ციხე XVIII ს-დე ინარჩუნებდა თავის ფუნქციას. ციხე შედგება ორი გალავნის, მათში ჩართული კოშკების, მარნის, სხვადასხვა დანიშნულების ნაგებობათა ნაშთებისა და ეზოში აგებული XI საუკუნის კარის ეკლესიისგან.