ანაკლიის ახალგაზრდულ ბანაკს 40 ზუგდიდელი ახალგაზრდა შეუერთდა. ზუგდიდის მუნიციპალიტეტის მერი დავით კოდუა, ბანაკში ზუგდიდელ ახალგაზრდებს შეხვდა, სამომავლო გეგმებზე ესაუბრა და მათი იდეები მოისმინა. მერმა ახალგაზრდებთან და საკრებულოს თავმჯდომარის მოადგილე ოთარ ქადარიასთან ერთად სხვადასხვა აქტივობაში მიიღო მონაწილეობა.

ახალგაზრდული ბანაკების მიმართულებით ზუგდიდის მერია არაერთ მნიშვნელოვან პროექტშია ჩართული. ზუგდიდელი ახალგაზრდები ბორჯომის სკაუტურ ბანაკში იმყოფებოდნენ, ასევე ახლაგაზრდებს აქვთ შესაძლებლობა ინოვაციებისა და ტექნოლოგიების სააგენტოსთან ერთად ორგანიზებულ ტექნოლოგიურ ბანაკში მიიღონ მონაწილეობა.

დავით კოდუას განცხადებით, ახალგაზრდული მიმართულებით მთელი წლის განმავლობაში არაერთი ღონისძიებაა დაგეგმილი.

,,ახალგაზრდების მხარდაჭერა ჩვენი გუნდისთვის უმთავრესი მიმართულებაა! მათი ჩართულობა გადაწყვეტილებების მიღების პროცესში და მომავალი თაობის ხელშეწყობა არის მთავარი პრიორიტეტი ჩვენი ხელისუფლებისთვის, როგორც ცენტრში ასევე ადგილობრივ დონეზე, რასაც არაერთი პროექტითა და პროგრამით ვამტკიცებთ, რისი ნათელი მაგალითიც პრემიერ-მინისტრის მიერ ინიცირებული ანაზღაურებადი სტაჟირების პროგრამაა, რომელიც 3000 სტუდენტზეა გათვლილი" -აღნიშნა ზუგდიდის მუნიციპალიტეტის მერმა.

წელს ანაკლიის ბანაკი 2 640 ახალგაზრდას, მათ შორის 720 სკოლის მოსწავლესა და 1 920 სტუდენტს უმასპინძლებს. ბანაკი მიზნად ისახავს ახალგაზრდების არაფორმალური განათლების, სოციალური ინტეგრაციის, ლიდერული, სპორტული და კულტურული უნარების განვითარებას. პროგრამა მოიცავს საგანმანათლებლო, რეკრეაციულ, სპორტულ და კულტურულ აქტივობებს.

ხობის მუნიციპალიტეტში, საერთაშორისო მნიშვნელობის თბილისი-სენაკი-ლესელიძის საავტომობილო გზაზე, ჯამში, 8.3 კმ-იანი (კმ284-კმ286 და კმ293-კმ298) მონაკვეთის პერიოდული შეკეთების სამუშაოები დასრულდა. ონფორმაციას საავტომობილო გზები დეპარტამენტი ავრცელებს. სამუშაოები 2 მონაკვეთად მიმდინარეობდა.

გზის პერიოდული შეკეთების ფარგლებში, მოეწყო ასფალტ-ბეტონის საფარი, სანიაღვრე არხები, მოსახლეობის ეზოებში შესასვლელები, მიერთებები და საგზაო ნიშნები; ასევე განხორციელდა გზის სავალი ნაწილის ჰორიზონტალური მონიშვნა.

სამუშაოები სახელმწიფო ბიუჯეტიდან დაფინანსდა და მისმა ჯამურმა ღირებულებამ 4.7 მილიონი ლარი შეადგინა.

ფოთის მუნიციპალიტეტმა ფოთში დაბადებული ახალშობილების ოჯახებისთვის 2 000-ლარიანი ერთჯერადი ფინანსური დახმარების პროგრამა დაიწყო.

პროგრამით სარგებლობისთვის აუცილებელია:

ახალშობილის დაბადების მოწმობაში დაბადების ადგილად მითითებული იყოს ქალაქი ფოთი;

ახალშობილის მშობლები განცხადების წარდგენამდე არანაკლებ 1 წლის განმავლობაში უწყვეტად იყვნენ რეგისტრირებულნი ქალაქ ფოთის მუნიციპალიტეტში. რეგისტრაციის წყვეტის შემთხვევაში, ისინი არ უნდა იყვნენ რეგისტრირებულნი სხვა მუნიციპალიტეტის ადმინისტრაციულ საზღვრებში;

საცხოვრებელი ადგილის რეგისტრაციის მოთხოვნა არ ვრცელდება იძულებით გადაადგილებული პირის სტატუსის მქონე მოქალაქეებზე, რომელთა დევნილის სტატუსის დამადასტურებელი დოკუმენტის მიხედვით რეგისტრირებულ მისამართად მითითებულია ქალაქი ფოთი.

დამატებითი ინფორმაციისთვის მიმართეთ ქალაქ ფოთის მუნიციპალიტეტის მერიის ჯანმრთელობისა და სოციალური დაცვის სამსახურს:
(0493) 22 06 38.

პროგრამით სარგებლობისთვის საჭირო დოკუმენტაციის შესახებ დეტალური ინფორმაცია იხილეთ ბმულზე:
https://tinyurl.com/yfhycp6e

ზუგდიდისა და ცაიშის მიტროპოლიტმა გერასიმე შარაშენიძემ, ლანა ლატარიას ოჯახს მიუსამძიმრა და გარდაცვლილს პანაშვიდი გადაუხადა. შესაბამის ინფორმაციას ზუგდიდისა და ცაიშის ეპარქია ავრცელებს:

,,ამა წლის 5 აგვისტოს ზუგდიდისა და ცაიშის მიტროპოლიტი გერასიმე ეპარქიის სამღვდელოებასთან ერთად იმყოფებოდა ლანა ლატარიას სახლში, მის ოჯახს მიუსამძიმრა და გარდაცვლილის სულის საოხად პანაშვიდი აღავლინა.

ზუგდიდისა და ცაიშის ეპარქია საზოგადოებას სთხოვს, რომ თავი შეიკავოს კომენტარებისაგან და ვილოცოთ ლანა ლატარიას სულის ცხონებისთვის” - წერია გავრცელებულ ინფორმაციაში.

2026 წელს ოკუპირებულ ტერიტორიებზე მცხოვრები აბიტურიენტები საქართველოს უმაღლეს საგანმანათლებლო დაწესებულებებში ერთიანი ეროვნული გამოცდების გარეშე ჩაირიცხებიან და საქართველოს მთავრობის მიერ დაფუძნებულ უმაღლეს საგანმანათლებლო დაწესებულებებში სწავლის სრული დაფინანსებით ისარგებლებენ, - ინფორმაციას განათლების, მეცნიერების და ახალგაზრდობის სამინისტრო ავრცელებს.

უწყების ცნობით, აღნიშნულ პროგრამაში მონაწილეობის მსურველთა რეგისტრაცია უკვე დაიწყო და 2026 წლის 5 სექტემბრამდე გაგრძელდება.

„ერთიანი ეროვნული გამოცდების გარეშე უმაღლეს საგანმანათლებლო დაწესებულებებში ჩარიცხვის უფლება აქვთ საქართველოს ოკუპირებულ ტერიტორიებზე მცხოვრებ პირებს, რომლებიც ბოლო 2 წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს ოკუპირებულ ტერიტორიაზე არსებულ ზოგადსაგანმანათლებლო დაწესებულებაში და რომელთა სრული ზოგადი განათლება აღიარებულია საქართველოს განათლების, მეცნიერებისა და ახალგაზრდობის სამინისტროს მიერ დადგენილი წესით.

მსურველთა განაცხადები მიიღება მატერიალური ფორმით გორის, კასპის, ქარელისა და ხაშურის მუნიციპალიტეტებში სახელმწიფო რწმუნებულის ადმინისტრაციაში (მისამართი: გორი, ფერაძის ქ. N5; თბილისი, პეტრე ქავთარაძის ჩიხი N1) და ელექტრონული ფორმით აფხაზეთის ავტონომიური რესპუბლიკის განათლებისა და კულტურის სამინისტროში ვებგვერდზე“, - აღნიშნულია გავრცელებულ ინფორმაციაში.

ზაფხულის ცხელ დღეებთან დაკავშირებით, დაავადებათა კონტროლისა და საზოგადოებრივი ჯანმრთელობის ეროვნული ცენტრი მოქალაქეებს რეკომენდაციებით მიმართავს.

ცენტრის ინფორმაციით, მაღალი ტემპერატურის პერიოდში სასურველია დღის ყველაზე ცხელ საათებში ქუჩაში გადაადგილებისგან თავის შეკავება.

სპეციალისტები მოსახლეობას საკმარისი რაოდენობით წყლის მიღებისკენ მოუწოდებენ და ურჩევენ, თავი აარიდონ ალკოჰოლის, ტკბილი და კოფეინის შემცველი სასმელების მოხმარებას. ასევე, რეკომენდებულია მაღალინტენსიური ფიზიკური აქტივობისგან თავის შეკავება და მისი გადატანა დღის შედარებით გრილ მონაკვეთში, დილის საათებში.

დაავადებათა კონტროლის ცენტრი მკაცრად აფრთხილებს მშობლებსა და შინაური ცხოველების პატრონებს, რომ დაუშვებელია ბავშვებისა და ცხოველების გაჩერებულ ავტომობილში დატოვება, რადგან მაღალი ტემპერატურა მათ ჯანმრთელობასა და სიცოცხლეს სერიოზულ საფრთხეს უქმნის.

ქუჩაში გასვლისას რეკომენდებულია ღია ფერის, თავისუფალი და ნატურალური ქსოვილის ტანსაცმლის ტარება, ასევე ქუდის, ქოლგისა და მზისგან დამცავი სათვალის გამოყენება. საცხოვრებელ სივრცეში კი მნიშვნელოვანია სიგრილის შენარჩუნება, ხოლო ოთახების განიავება ღამისა და დილის საათებში.

სპეციალისტების განმარტებით, თბური ტალღები და მაღალი ტემპერატურა საზოგადოებრივი ჯანმრთელობისთვის ერთ-ერთ მთავარ გამოწვევად რჩება. კლიმატის ცვლილების ფონზე, საქართველოშიც იზრდება მაღალი ტემპერატურის ეპიზოდების სიხშირე და ხანგრძლივობა, რაც ტემპერატურისადმი მგრძნობიარე დაავადებების გავრცელებას, ასევე ქრონიკული არაგადამდები დაავადებების გამწვავებას უწყობს ხელს.

ზუგდიდის მუნიციპალიტეტის მერიის მხარდაჭერითა და ა(ა)იპ „საქართველოს სკაუტური მოძრაობის ორგანიზაცია – საქართველოს სკაუტების“ ორგანიზებით, 35-მა ახალგაზრდამ ბორჯომის მუნიციპალიტეტში ოთხდღიან ახალგაზრდულ ბანაკში დაისვენა.

ბანაკიდან ჩამოსულ ახალგაზრდებს ზუგდიდის მუნიციპალიტეტის მერი დავით კოდუა და მერის პირველი მოადგილე ნუგზარ გაბელია დახვდნენ.

ახალგაზრდებმა მერს შთაბეჭდილებები გაუზიარეს და პროექტის განოხრციელებისთვის მადლობა გადაუხადეს.

„საქართველოს სკაუტების“ და ჩვენი მუნუციპალიტეტის მერიის მხარდაჭერთ, ბორჯომში გამართული ოთხდღიანი ახალგაზრდული ბანაკი დასრულდა. ბანაკში ზუგდიდან 35 ახალგაზრდა იყო ჩართული.

ახალგაზრდებმა ბანაკის ფარგლებში სხვადასხვა გასართობ და შემეცნებით აქტივობებში მიიღეს მონაწილეობა. ეს დღეები მნიშვნელოვანია გუნდური მუშაობის, ლიდერული უნარების, პასუხისმგებლობის და კომუნიკაციის შესაძლებლობების განვითარების მიმართულებითაც.

ახალგაზრდების მხარდასაჭერად, მუნიციპალიტეტის მასშტაბით აქტიურად ვახორციელებთ სხვადასხვა საგანმანათლებლო, შემეცნებით, კულტურულ და სპორტულ ინიციატივებს, რომლებიც მათი ახალი შესაძლებლობების აღმოჩენას და პოტენციალს განვითარებას უზრუნველყოფს. ეს არის საშუალება, ახალგაზრდებმა მიიღონ პრაქტიკული გამოცდილება, დაამყარონ ახალი კავშირები და აქტიურად ჩაერთონ არაფორმალური განათლების პროცესში.

ჩვენი პოლიტიკური გუნდისთვის ახალგაზრდული პოლიტიკის მხარდაჭერა ერთ-ერთ მთავარ პრიორიტეტს წარმოადგენს, რისი ნათელი მაგალითებიც ამ მიმართულებით განხორციელებული და მიმდინარე არაერთი პროექტია. საქართველოს განათლების, მეცნიერებისა და ახალგაზრდობის სამინისტროს მიერ ანაკლიაში ხორციელდება ახალგაზრდული ბანაკი, სადაც 2 640 ახალგაზრდა დაისვენებს, მათ შორის სტუდენტები და სკოლის მოსწავლეები. საქართველოს ტექნოლოგიებისა და ინოვაციების სააგენტოსთან თანამშომლობით ასევე ვაწყობთ ტექნოლოგიურ კვირეულს, რომელიც ახალგაზრდების ტექნოლოგიურ და სტარტაპ მიმართულებით განვითარებას შეუწყობს ხელს.

ჩვენ გვყავს განათლებული და მიზანმიმართული ახალი თაობა, რომელთა სხვასხვა მიმართულებით განვითარებისთვის შევქმნით კიდევ უფრო მეტ ახალ შესაძლებლობას, რადგან სწორედ ეს თაობა არის ჩვენი ქვეყნის და ქალაქის უკეთესი მომავალის წინაპირობა” - წერს ზუგდიდის მერი.

ჩვენთვის ძალიან მნიშვნელოვანია, ახალი სისხლი, ახალი თაობა შემოვიდეს საჯარო სამსახურში, პირველი სექტემბრიდან გამოვაცხადებთ დაახლოებით 3 000 ვაკანსიას ანაზღაურებად სტაჟირებაზე, - განაცხადა საქართველოს მთავრობის ადმინისტრაციის უფროსმა ლევან ჟორჟოლიანმა.

როგორც ლევან ჟორჟოლიანმა აღნიშნა, წინა წელს სტაჟირების მონაწილეთა თითქმის 50%-მა ან გააგრძელა სტაჟირება, ან დასაქმდა სახელმწიფო უწყებაში, სადაც სტაჟირება გაიარა.

„ამ პროგრამით სრულიად ახალი თაობა, მოტივირებული ახალგაზრდები შემოდიან საჯარო სტრუქტურებში, რომლებიც უნდა ემსახურონ საკუთარ ქვეყანას, მიიღონ გამოცდილება, კვალიფიკაცია აიმაღლონ და მიიღონ კიდევ უფრო მეტი ცოდნა. მერწმუნეთ, საჯარო სექტორში მიღებული ცოდნა და გამოცდილება ცხოვრების ყველა ეტაპზე, შეიძლება, მათ შორის ბიზნესშიც გამოადგეთ ამ ახალგაზრდებს და ძალიან ვგულშემატკივრობთ ამ პროგრამას. ეს პრემიერის ინიციატივაა. ჩვენ მუნიციპალიტეტებს ვთხოვეთ, გაეზარდათ კვოტები სტაჟირების მიმართულებით, რათა უფრო მეტ ახალგაზრდას ჰქონდეს შესაძლებლობა, საკუთარ რეგიონში გაიაროს ანაზღაურებადი სტაჟირება“, - განაცხადა ლევან ჟორჟოლიანმა.

ჯანდაცვის სამინისტროსა და საქართველოს სამედიცინო ჰოლდინგის ორგანიზებით, რუხის რესპუბლიკურ საავადმყოფოში სამეგრელოს რეგიონში მომუშავე სოფლის ექიმებისთვის პირველი პრაქტიკული კონფერენცია გაიმართა.

ორდღიანი კონფერენციის მიზანი იყო პირველადი ჯანდაცვის სისტემის გაძლიერება, ოჯახის ექიმების პროფესიული განვითარების ხელშეწყობა და თანამედროვე კლინიკური გამოცდილების გაზიარება.

ღონისძიების ფარგლებში მონაწილეებმა მოისმინეს თემატური მოხსენებები, განიხილეს კლინიკური შემთხვევები და მონაწილეობა მიიღეს პრაქტიკულ სესიებში.

სოფლის ექიმებისთვის უწყვეტი სამედიცინო განათლების პროგრამა მიმდინარე წელს პირველად ამოქმედდა. პროგრამა ითვალისწინებს 2027 წლის 1 იანვრამდე სავალდებულო 30 კრედიტ-ქულის დაგროვებას. ამ ეტაპზე სამეგრელოსა და აჭარის რეგიონებში მომუშავე 200-მდე ოჯახის ექიმმა უკვე გაიარა შესაბამისი საგანმანათლებლო აქტივობები, ხოლო პროექტი ეტაპობრივად საქართველოს სხვა რეგიონებშიც გაგრძელდება.

15 ივლისს, ვლაქერნობის დღესასწაულთან დაკავშირებით ზუგდიდიში საზეიმო ღვთისმსახურებას საქართველოს კათოლიკოს-პატრიარქი შიო III აღავლენს. ინფორმაციას საქართველოს საპატრიარქო ავრცელებს.

„ზუგდიდის ისტორიულ-არქიტექტურული მუზეუმიდან დილის 08:30 საათზე გამოაბრძანებენ ყოვლადწმინდა ღვთისმშობლის პატიოსან სამოსელს. სიწმინდე საზეიმო ლიტანიობით გადაბრძანდება ზუგდიდის ივერიის ყოვლადწმინდა ღმრთისმშობლის საკათედრო ტაძარში, სადაც 10:00 საათზე დაიწყება სადღესასწაულო საღმრთო ლიტურგია.

საღმრთო ლიტურგიას აღავლენს უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი შიო III, საქართველოს ეკლესიის წმინდა სინოდის წევრებთან და სამღვდელოებასთან ერთად! - წერია ზუგდიდისა და ცაიში ეპარქიის მიერ გავრცელებულ ინფორმაციაში.

ღვთისმშობლის სამოსელი მთელი დღის განმავლობაში დაბრძანებული იქნება ტაძარში.

სამეცნიერო ჟურნალ „გლობალიზაცია და ბიზნესში“ (Globalization and Business⁠) "ევროპის უნივერსიტეტის“ ასოცირებული პროფესორისა და ვიცე-რექტორის რაულ ქირიას ახალი სამეცნიერო სტატია - "დეზინფორმაცია და მისი გავლენა საზოგადოებაზე: რუსეთ-უკრაინის ომის მაგალითზე“ (Disinformation and Its Impact on Society: The Case of the Russia-Ukraine War) გამოქვეყნდა.

სამეცნიერო სტატია ინგლისურ ენაზე ჟურნალ „გლობალიზაცია და ბიზნესის“ 2026 წლის მე-11 ტომის 21-ე ნომერში გამოქვეყნდა და 156-170 გვერდებს მოიცავს.

ნაშრომში ავტორი დეზინფორმაციას თანამედროვე გეოპოლიტიკაში ძალაუფლების, საზოგადოებრივი აზრის კონტროლისა და სტრატეგიული გავლენის ერთ-ერთ მთავარ ინსტრუმენტად განიხილავს. კვლევის ძირითად მაგალითს რუსეთ-უკრაინის ომი წარმოადგენს, რომლის საფუძველზეც გაანალიზებულია დეზინფორმაციის საზოგადოებრივი, პოლიტიკური და საერთაშორისო შედეგები.

სტატიაში აღნიშნულია, რომ დეზინფორმაცია მხოლოდ პროპაგანდის დამხმარე საშუალება აღარ არის. იგი სახელმწიფო მართვის, ნარატივების კონტროლისა და ჰიბრიდული ომის მნიშვნელოვანი მექანიზმია, რომელსაც საზოგადოებრივი აღქმის შეცვლა, დემოკრატიული ინსტიტუტებისადმი ნდობის შემცირება და სამხედრო აგრესიის გასამართლებელი საინფორმაციო გარემოს შექმნა შეუძლია.

რაულ ქირია კვლევაში განსაკუთრებულ ყურადღებას უთმობს რუსეთის შიდა და გარე საინფორმაციო სტრატეგიებს. ავტორის შეფასებით, რუსეთის ხელისუფლებისთვის დეზინფორმაცია არა მხოლოდ უცხო სახელმწიფოებზე ზემოქმედების, არამედ ქვეყნის შიგნით პოლიტიკური კონტროლისა და საზოგადოებრივი რეალობის ხელოვნურად კონსტრუირების ინსტრუმენტსაც წარმოადგენს.

ნაშრომში განხილულია წესებზე დაფუძნებული საერთაშორისო წესრიგის შესუსტება და საერთაშორისო ინსტიტუტების შეზღუდული შესაძლებლობები იმ პირობებში, როდესაც აგრესორი სახელმწიფო დეზინფორმაციის საშუალებით ომის შესახებ საერთო და ფაქტებზე დაფუძნებული რეალობის განადგურებას ცდილობს.

კვლევის თანახმად, ფაქტებსა და გამოგონილ ინფორმაციას შორის ზღვრის მიზანმიმართული წაშლა საფრთხეს უქმნის საერთაშორისო თანამშრომლობის, სამართლებრივი პასუხისმგებლობისა და ინსტიტუციური ნდობის საფუძვლებს. დეზინფორმაციის შედეგად რთულდება საერთაშორისო საზოგადოების ერთიანი პოზიციის ჩამოყალიბება და ომის დანაშაულებზე ეფექტიანი რეაგირება.

სტატიაში ცალკე მიმართულებად არის წარმოდგენილი უკრაინული საზოგადოების მდგრადობა. ავტორი ყურადღებას ამახვილებს მედიის წიგნიერების, დამოუკიდებელი ჟურნალისტიკის, სამოქალაქო საზოგადოების მობილიზებისა და სანდო ინსტიტუტების მნიშვნელობაზე დეზინფორმაციის წინააღმდეგ ბრძოლაში.

კვლევის ერთ-ერთი მთავარი დასკვნის მიხედვით, დეზინფორმაციას მშვიდობიან პერიოდში საზოგადოების დესტაბილიზაციისა და პოლიტიკური პროცესების მართვის მნიშვნელოვანი პოტენციალი გააჩნია, თუმცა ომის დროს მისი ეფექტიანობა მცირდება, როდესაც ადამიანები უშუალოდ აწყდებიან რეალურ მოვლენებსა და მათ შედეგებს.

რაულ ქირიას სამეცნიერო ინტერესები მოიცავს საერთაშორისო ურთიერთობებს, გეოპოლიტიკას, რუსეთ-უკრაინის ომს, დეზინფორმაციას, პროპაგანდას, ჰიბრიდულ საფრთხეებს, სტრატეგიულ კომუნიკაციებსა და თანამედროვე საერთაშორისო წესრიგის ტრანსფორმაციას.

ზუგდიდის მუნიციპალიტეტის მერიის ინიციატივით, ზუგდიდი-ანაკლია-ზუგდიდის სატრანსპორტო მარშრუტს კიდევ ერთი რეისი დაემატა. როგორც მერიაში აღნიშნავენ, გადაწყვეტილება საზღვაო სეზონთან დაკავშირებით გაზრდილი მგზავრთა ნაკადის გამო მიიღეს.

ტრანსპორტი ბოლო რეისებს შემდეგი განრიგით შეასრულებს:

• ზუგდიდი - ანაკლია: 21:10 საათი;

• ანაკლია - ზუგდიდი: 22:00 საათი.

მესტიის მუნიციპალიტეტში, უნიკალური არქიტექტურის ქორწინების სახლი აშენდება. პროექტის დაწყებას საფუძველი, იუსტიციის მინისტრმა პაატა სალიამ, სამეგრელო ზემო-სვანეთის სახელმწიფო რწმუნებულთან დავით ვერავასთან, პარლამენტის წევრ ვიქტორ ჯაფარიძესთან, მესტიის მერ კაპიტონ ჟორჟოლიანთან, იუსტიციის სამინისტროსა და ადგილობრივი ხელისუფლების წარმომადგენლებთან ერთად სიმბოლური კაფსულის ჩაშვებით ჩაუყარა.

მესტიის ქორწინების სახლის არქიტექტურული პროექტი ქართველი არქიტექტორის მიერ არის შექმნილი და სრულად ერწყმის სვანეთის უნიკალურ გარემოსა და ტრადიციულ არქიტექტურულ სტილს.

პროექტმა უკვე მოიპოვა საერთაშორისო აღიარება. მესტიის ქორწინების სახლის კონცეფცია გახდა ორი პრესტიჟული საერთაშორისო არქიტექტურული კონკურსის გამარჯვებული. იაპონიის დედაქალაქ ტოკიოში გამართულ „Japan International Design Award“-ზე პროექტმა გაიმარჯვა ნომინაციაში „ქვეყნის ისტორიულ მოტივებზე შექმნილი საუკეთესო საკულტო არქიტექტურა“, ხოლო იტალიის დედაქალაქ რომში ჩატარებულ „Rome Design Award“-ზე – ნომინაციაში „კონცეპტუალური დიზაინი“.

ახალი ქორწინების სახლი ხელს შეუწყობს როგორც სახელმწიფო სერვისების რეგიონებში განვითარებას, ისე მესტიის, როგორც საერთაშორისო ტურისტული დანიშნულების ადგილის, კიდევ უფრო გაძლიერებას. ქორწინების რეგისტრაციის სერვისით ისარგებლებენ როგორც საქართველოს, ისე უცხო ქვეყნის მოქალაქეები, რაც რეგიონს დამატებით ტურისტულ პოტენციალს შესძენს.

პროექტი სრულად შეესაბამება რეგიონული განვითარების პოლიტიკის მიზნებს და ითვალისწინებს თანამედროვე სახელმწიფო ინფრასტრუქტურის შექმნას, რომელიც მოქალაქეებისთვის თანაბრად ხელმისაწვდომ, ხარისხიან და კომფორტულ მომსახურებას უზრუნველყოფს.

ქორწინების სახლი მესტიაში, ცნობილი ქართველი პოეტის, რევაზ მარგიანის ქუჩაზე აშენდება. ახალ შენობაში ასევე განთავსდება რევაზ მარგიანის სახელობის სახლ-მუზეუმი, რაც პროექტს დამატებით კულტურულ მნიშვნელობას შესძენს.

ღონისძიებას სახელმწიფო რწმუნებულის მოადგილეები - ნინო ვიბლიანი, დავით კუხალეიშვილი, იუსტიციის მინისტრის მოადგილე ლანა მორგოშია, იუსტიციის სახლის თავმჯდომარე ვახტანგ ჟვანია და ადგილობრივი ხელისუფლების წარმომადგენლები ესწრებოდნენ.

იოანე ნათლისმცემლის შობის დღესასწაულთან დაკავშირებით, სენაკის წმინდა იოანე ნათლისმცემლის სახელობის საკათედრო ტაძარში, უწმინდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III, საზეიმო საღვთო ლიტურგია აღავლინა.

ღვთისმსახურებას სასულიერო პირებთან და მრევლთან ერთად ესწრებოდნენ, სამეგრელო-ზემო სვანეთის სახელმწიფო რწმუნებული დავით ვერავა, სენაკის მუნიციპალიტეტის მერი ვახტანგ გადელია, სენაკის მუნიციპალიტეტის საკრებულოს თავმჯდომარე ჯუმბერ ტყებუჩავა, საქართველოს პარლამენტის წევრები და ადგილობრივი ხელისუფლების წარმომადგენლები.

საღვთო ლიტურგიის დასრულების შემდეგ, უწმინდესმა და უნეტარესმა მრევლს წმინდა იოანე ნათლისმცემლის შობისა და ტაძრის დღესასწაული მიულოცა. ქადაგებისას კათოლიკოს-პატრიარქმა მადლიერებით გაიხსენა სენაკისა და ჩხოროწყუს ეპარქიაში მღვდელმთავრობის წლები და აღნიშნა:

„ბევრი რამ ვისწავლე თქვენთან ურთიერთობით, იმ დიდი წმინდანების მოხსენიებითა და შესწავლით, რომლებიც იღვწოდნენ ამ წმინდა ეპარქიაში, მაგრამ მთავარი - ეს არის სამეგრელოს ეშხი, სიყვარული, დიდი სილამაზე და კულტურა, რისი ცოდნის გარეშეც შეუძლებელია შეიცნო ქართული სული და ჩვენი კულტურა“, - აღნიშნა ქადაგებაში კათოლიკოს-პატრიარქმა.

ჟურნალისტი ჯაბა ხუბუა “ლელოს” წევრის, გრიგოლ გეგელიას განცხადებას ეხმიანება, რომელმაც აღნიშნა, რომ საქართველოს, სომხეთისა და აზერბაიჯანის მონაწილეობით უნდა შეიქმნას „კავკასიური კონსორციუმი“ და ანაკლიის მართვა გადაეცეს მაღალი რეპუტაციის საერთაშორისო ოპერატორს.

ხუბუას თქმით, პარტია “ლელო” საერთოდ არ უნდა საუბრობდეს ანაკლიის პორტის შესახებ, რადგან მისი თქმით, მამუკა ხაზარაძე ის კაცია, რომელმაც ანაკლიის პორტის მშენებლობა ჩააფლავა, ხოლო შემდეგ ქართულ სახელმწიფოსთან წააგო ყველა საერთაშორისო საარბიტრაჟო დავა, რაც კი ანაკლიის პორტს უკავშირდებოდა.

“როგორც ჩამომხრჩვალის სახლში თოკი არ უნდა ახსენო და როგორც ქუჩის მეძავმა ქალწულებრივ უბიწობაზე ლექცია არ უნდა წაიკითხოს, სწორედ ასე არ უნდა ლაპარაკობდეს ანაკლიის პორტის შესახებ მამუკა ხაზარაძის პარტიის წევრი გრიგოლ გეგელია, რადგან ხაზარაძე ის კაცია, რომელმაც ანაკლიის პორტის მშენებლობა ჩააფლავა, ხოლო შემდეგ ქართულ სახელმწიფოსთან წააგო ყველა საერთაშორისო საარბიტრაჟო დავა, რაც კი ანაკლიის პორტს უკავშირდებოდა. მოკლედ, ხაზარაძის გეგელია ხელიდან წასული ყეყეჩი და უტიფარი რომ არ იყოს, ანაკლიის პორტზე ხმას არ და ვერ ამოიღებდა.”- წერს ჯაბა ხუბუა.   

რუხის რესპუბლიკურ საავადმყოფოში ჯანდაცვის სამინისტროს ორგანიზებით მასშტაბური უფასო სამედიცინო აქცია გაიმართა, რომლის მიზანიც მოსახლეობაში პრევენციული მედიცინის პოპულარიზაცია, დაავადებების ადრეული გამოვლენა და ხარისხიან სამედიცინო მომსახურებაზე ხელმისაწვდომობის გაზრდაა. ღონისძიებაში აქტიურად იყო ჩართული ზუგდიდის საზოგადოებრივი ჯანდაცვის ცენტრი.

სამედიცინო აქციას ჯანდაცვის მინისტრი მიხეილ სარჯველაძე, შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი და სამეგრელო-ზემო სვანეთის სახელმწიფო რწმუნებული დავით ვერავა დაესწრნენ.

აქციის ფარგლებში მოქალაქეებს შესაძლებლობა ჰქონდათ, რომ უფასოდ ჩაეტარებინათ სკრინინგული კვლევები ძუძუს, საშვილოსნოს ყელის, სწორი ნაწლავისა და პროსტატის კიბოს, ასევე B და C ჰეპატიტებისა და ჰიპერტენზიის მიმართულებით. პარალელურად, რუხის რესპუბლიკური საავადმყოფოს სპეციალისტებმა ზრდასრულ პაციენტებს კარდიოლოგის, ნეიროქირურგისა და გინეკოლოგის უფასო კონსულტაციები გაუწიეს, ასევე ჩატარდა სხვადასხვა დიაგნოსტიკური კვლევა.

განსაკუთრებული ყურადღება დაეთმო ბავშვთა ჯანმრთელობას – აფხაზეთის ავტონომიური რესპუბლიკის მთავრობის ჩართულობით, აფხაზეთიდან დევნილ ბავშვებს პედიატრიული კონსულტაციები და საჭირო სამედიცინო კვლევები უფასოდ ჩაუტარდათ.

ღონისძიებაში ასევე მონაწილეობდნენ: დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ირაკლი ფურცელაძე, ზუგდიდის მერის მოადგილე ბესიკ ჭეჟია, რუხის რესპუბლიკური საავადმყოფოს დირექტორი სერგო ფიფია და სამედიცინო სფეროს წარმომადგენლები.

მარტვილის მუნიციპალიტეტის მერმა გიორგი ნაჭყებიამ და საკრებულოს თავმჯდომარემ ელდარ თოდუამ სალხინოს ადმინისტრაციულ ერთეულში მცხოვრებ მიხეილ მებონიას 100 წლის იუბილე მიულოცეს.

მიხეილ მებონია 1926 წელს დაიბადა, მას 3 შვილი, 6 შვილიშვილი, 6 შვილთაშვილი და 1 შვილთაშვილის შვილი ჰყავს.

„ბატონი მიხეილი არის მაგალითი იმისა, თუ როგორ უნდა იცხოვრო ღირსეულად, სიყვარულითა და შრომით. ვამაყობთ, რომ ჩვენს გვერდით ცხოვრობენ ადამიანები, რომლებმაც მთელი საუკუნის ისტორია გამოიარეს. ვუსურვებ მას ჯანმრთელობას, მხნეობას და კიდევ მრავალ წელს საკუთარი ოჯახის გარემოცვაში ბედნიერად ყოფნას“ - აღნიშნა გიორგი ნაჭყებიამ.

მარტვილის მუნიციპალიტეტის მერია შესაბამისი პროგრამის ფარგლებში იუბილარს 3 000 ლარს გადაურიცხავს.

განათლების, მეცნიერებისა და ახალგაზრდობის მინისტრის გივი მიქანაძის ხელმძღვანელობით, შოთა მესხიას ზუგდიდის სახელმწიფო უნივერსიტეტში რექტორთა საბჭოს სხდომა გაიმართა, რომელშიც საქართველოს სახელმწიფო და კერძო უნივერსიტეტების რექტორები და წარმომადგენლები მონაწილეობდნენ.

საბჭოს წევრებმა უმაღლესი განათლების სისტემის რეფორმის ფარგლებში მიმდინარე პროცესები განიხილეს. აღინიშნა, რომ რეფორმის ერთ-ერთი უმთავრესი მიმართულებაა, სახელმწიფო უნივერსიტეტებში უმაღლესი განათლების პირველ და მეორე საფეხურებზე საქართველოს მოქალაქეებისთვის სწავლის სრულად დაფინანსების უზრუნველყოფა.

შეხვედრის ფარგლებში მონაწილეებმა უმაღლესი განათლების დაფინანსების ახალი მოდელის დადგენილების პროექტი განიხილეს.

გივი მიქანაძის თქმით, ახალი მოდელი ეფუძნება ორკომპონენტიან სისტემას – საბაზო დაფინანსებასა და სახელმწიფო დაკვეთის შესრულებაზე დაფუძნებულ დაფინანსებას. როგორც მინისტრმა განაცხადა, ეს, ერთი მხრივ, უზრუნველყოფს სახელმწიფო უნივერსიტეტების ინსტიტუციურ მდგრადობასა და ფინანსურ ავტონომიას, მეორე მხრივ, ხელს შეუწყობს ხარისხზე, შედეგებსა და ეროვნულ პრიორიტეტებზე ორიენტირებული სისტემის განვითარებას.

აღინიშნა, რომ უმაღლესი განათლების დაფინანსების ახალი მოდელის პროექტის შემუშავების პროცესში აქტიურად იყვნენ ჩართული მსოფლიო ბანკის წარმომადგენლები.

შეხვედრა დისკუსიის ფორმატში წარიმართა და საბჭოს წევრებმა რიგ საკითხებთან დაკავშირებით ერთობლივი გადაწყვეტილებები მიიღეს.

რექტორთა საბჭოში მონაწილეობა ასევე მიიღეს საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ, საზღვაო ტრანსპორტის სააგენტოს დირექტორმა ივანე აბაშიძემ და კულტურის სამინისტროს წარმომადგენლებმა.

პირველკლასელთა საყოველთაო რეგისტრაცია დღეს, 09:00 საათიდან დაიწყო და 3 ივლისის ჩათვლით გაგრძელდება. ამის შესახებ ინფორმაციას განათლების, მეცნიერებისა და ახალგაზრდობის სამინისტრო ავრცელებს.

„რეგისტრაცია განხორციელდება განათლების მართვის საინფორმაციო სისტემის ოფიციალურ ვებგვერდზე - registration.emis.ge. ბავშვის სისტემაში რეგისტრაციას უზრუნველყოფს მშობელი ან კანონიერი წარმომადგენელი. ელექტრონულად რეგისტრირებული მოსწავლის ჩასარიცხად აუცილებელი დოკუმენტების მიღება 2026 წლის 6 ივლისიდან 17 ივლისის ჩათვლით განხორციელდება. დადგენილ ვადებში დოკუმენტაციის წარუდგენლობის შემთხვევაში, რეგისტრაცია ავტომატურად გაუქმდება.

პირველ კლასში ჩასარიცხად საჭირო დოკუმენტებია: მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას და უნდა აკმაყოფილებდეს საქართველოს ზოგადი ადმინისტრაციული კოდექსის 78-ე მუხლით დადგენილ სხვა მოთხოვნებს, კანონიერი წარმომადგენლის პირადობის დამადასტურებელი მოწმობის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე). მოსწავლის დაბადების მოწმობის ან პირადობის დამადასტურებელი დოკუმენტის ასლი ან საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე)“- ნათქვამია ინფორმაციაში.

შეგახსენებთ, რომ სასკოლო ასაკთან დაკავშირებით „ზოგადი განათლების შესახებ“ საქართველოს კანონში ცვლილება შევიდა. კერძოდ, 2026-2027 სასწავლო წელს პირველ კლასში დარეგისტრირებას შეძლებენ ბავშვები, რომლებსაც 31 დეკემბრის ჩათვლით შეუსრულდებათ 6 წელი.

შეფასებისა და გამოცდების ეროვნული ცენტრი 2026 წლის გამოცდების განრიგს აქვეყნებს.

„2026 წლის გამოცდების განრიგი ცნობილია. საგამოცდო პროცესი 2 ივლისს ერთიანი ეროვნული გამოცდებით დაიწყება. პირველ გამოცდას აბიტურიენტები ქართულ ენასა და ლიტერატურაში ჩააბარებენ. 22 ივლისს ერთიანი ეროვნული გამოცდები ფიზიკის გამოცდით დასრულდება.

მასწავლებლის გამოცდებზე დარეგისტრირებულები საგამოცდო პროცესში 5 ივლისიდან ჩაერთვებიან. 17 ივლისს ჩატარდება სტუდენტთა საგრანტო კონკურსი, მაგისტრანტობის კანდიდატები კი საერთო სამაგისტრო გამოცდას 23 და 24 ივლისს ჩააბარებენ.

გამოცდის თარიღი, გამოცდაზე გამოცხადების დრო და საგამოცდო ცენტრის მისამართი მითითებული იქნება საგამოცდო ბარათზე. ინფორმაცია კონკრეტული დროის შესახებ, თუ როდიდან შეძლებენ გამოსაცდელები საკუთარი სარეგისტრაციო გვერდიდან ბარათების ამობეჭდვას, შეფასებისა და გამოცდების ეროვნული ცენტრის ოფიციალურ ვებგვერდზე გამოქვეყნდება.

2026 წელს საგამოცდო ცენტრები გაიხსნება: თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავში, ხულოსა და ამბროლაურში.

2026 წლის ერთიანი ეროვნული გამოცდების დეტალური განრიგი: ქართული ენა და ლიტერატურა – 2 ივლისი (პირველი და მეორე სესია); 3 ივლისი (პირველი და მეორე სესია); ოსური ენა 2 ივლისი (პირველი სესია); უცხოური ენა 6 ივლისი (პირველი და მეორე სესია) – ინგლისური ენა; 7 ივლისი (პირველი და მეორე სესია) – ინგლისური ენა; 8 ივლისი (პირველი სესია) – რუსული ენა; 8 ივლისი (პირველი სესია) – გერმანული ენა; 8 ივლისი (პირველი სესია) – ფრანგული ენა. მათემატიკა – 10 ივლისი (პირველი და მეორე სესია); ისტორია – 13 ივლისი (პირველი და მეორე სესია); 14 ივლისი (პირველი სესია); ქიმია – 14 ივლისი (მეორე სესია); სამოქალაქო განათლება – 15 ივლისი (პირველი სესია); ბიოლოგია – 16 ივლისი (პირველი სესია); ზოგადი უნარები (სომხურ ენაზე) – 17 ივლისი (პირველი სესია); ზოგადი უნარები (აზერბაიჯანულ ენაზე); 17 ივლისი (პირველი სესია); სახვითი და გამოყენებითი ხელოვნება -17 ივლისი (პირველი სესია); გეოგრაფია – 20 ივლისი (მეორე სესია); ლიტერატურა – 21 ივლისი (პირველი სესია); ფიზიკა – 22 ივლისი (პირველი სესია)“, - ნათქვამია ინფორმაციაში.