ინტენსიური თოვის გამო, შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ185-კმ190 (უშგული-ლასდილი) მონაკვეთზე, აკრძალულია ყველა სახის ავტოტრანსპორტის მოძრაობა, გზის კმ30-კმ184 (ჯვარი-უშგული) მონაკვეთზე აკრძალულია მისაბმელიანი, ნახევრადმისაბმელიანი ავტოტრანსპორტის და M3 კატეგორიის (გააჩნია 8-ზე მეტი დასაჯდომი ადგილი (მძღოლის ადგილის გარდა) და აქვს 5 ტონაზე მეტი სრული მასა) მგზავრთა გადასაყვანად განკუთვნილი ავტოსატრანსპორტო საშუალებების მოძრაობა, ხოლო დანარჩენი სახის ავტოტრანსპორტის მოძრაობა თავისუფალია. ინფორმაციას საავტომობილო გზების დეპარტამენტი ავრცელებს.

საავტომობილო გზის კმ1-კმ30 (ზუგდიდი-ჯვარი) მონაკვეთზე ავტოტრანსპორტის მოძრაობა თავისუფალია.

მესტიაში საქართველოს მთავრობის, საქართველოს კულტურის სამინისტროს და „შემოქმედებითი საქართველოს“ მხარდაჭერით საახალწლო კონცერტი გაიმართა. ინფორმაციას მესტიის მერია ავრცელებს.

ღონისძიებას მესტიის მუნიციპალიტეტის მერი კაპიტონ ჟორჟოლიანი, ადგილობრივი თვითმმართველობის წარმომადგენლებთან ერთად დაესწრო.

კონცერტში მონაწილეობდნენ: დათო არჩვაძე, მერაბ ვარდოსანიძე, აჩიკო ცანკაშვილი, თიკა მახალდიანი, ანუკი ცქვიტინიძე, გელა დონაძე, გიორგი წიკლაური, ანსამბლი "ოდა", ანსამბლი "ქართული ხმები", დავით მაზანაშვილის ბენდი, DJ გიგა პაპასკირი. ღონისძიების წამყვანი - ნუგზარ ხავთასი იყო.

საქართველოს კულტურის სამინისტროს მიერ ორგანიზებული საახალწლო ღონისძიება, ასევე მოიცავდა - საბავშვო აქტივობებს, ზღაპრის გმირების წარმოდგენებსა და მუსიკალურ ნომრებს. ღონისძიების პატარა სტუმრებს თოვლის ბაბუამ საჩუქრები გადასცა. საახალწლო ღონისძიება ფეიერვერკით დასრულდა.

საქართველოს რეგიონული განვითარების მინისტრის მოადგილე ზაზა კვიციანი და სამეგრელო-ზემო სვანეთის მხარეში სახელმწიფო რწმუნებული დავით ვერავა მუნიციპალიტეტების მერებს შეხვდნენ.

სამეგრელო-ზემო სვანეთის მხარეში სახელმწიფო რწმუნებულის ადმინისტრაციაში გამართულ შეხვედრაზე რეგიონებში განსახორციელებელი პროექტების ფონდიდან დაფინანსებული მიმდინარე და დასრულებული პროექტები განიხილეს. ხაზი გაესვა პროექტების შესაბამისი სტანდარტებით შესრულების მნიშვნელობას.

შეხვედრაზე იმსჯელეს 2026 წელს რეგიონებში განსახორციელებელი პროექტების ფონდიდან დასაფინანსებელ პრიორიტეტულ მიმართულებებზე.

მუნიციპალიტეტების მერებთან გამართულ შეხვედრას ასევე ესწრებოდნენ სამეგრელო-ზემო სვანეთის მხარეში სახელმწიფო რწმუნებულის მოადგილეები გიორგი ნადარაია, ლუდუკ ხასია და საქართველოს რეგიონული განვითარების სამინისტროს რეგიონში განსახორციელებელი პროექტების დეპარტამენტის ხელმძღვანელი მინდია ღლონტი.

დღეს ,,ქართული ოცნების” მესტიის მერობის კანდიდატი სახელმწიფო რწმუნებულმა წარადგინა.

,,დღეს, „ქართული ოცნების“ მესტიის საარჩევნო შტაბში, ადგილობრივ აქტივს 2025 წლის თვითმმართველობის არჩევნებზე მესტიის მერობის კანდიდატი კაპიტონ ჟორჟოლიანი წარვუდგინეთ.

კაპიტონი მოქმედი მერია, გამოცდილი კადრია, კარგად იცის მესტიის პრობლემები და საჭიროებები. ძალიან ბევრი გააკეთა მესტიისა და მესტიელებისთვის, ამიტომაც ძალიან დიდი მხარდაჭერით სარგებლობს მოსახლეობაში. ჩვენ ერთობლივად, ცენტრალური ხელისუფლების მხარდაჭერით მოვახდენთ მნიშვნელოვანი და მოქალაქეების ინტერესებსა და საჭიროებებზე მორგებული პროექტების განხორციელებას.

შეხვედრას პარლამენტის წევრი ვიქტორ ჯაფარიძე, ჩემი პირველი მოადგილე ნინო ვიბლიანი და „ქართული ოცნების” სამეგრელო-ზემო სვანეთის რეგიონული კოორდინატორი დავით გვიშიანი ესწრებოდნენ.

მშვიდობა საქართველოს, მეტი განვითარება მესტიას!” – წერს დავით ვერავა.

დღეს „სვანეთობაა“, დღესასწაული მესტიის ცენტრში, სეტის მოედანზე იმართება. დღის განმავლობაში მუნიციპალიტეტის ტერიტორიული ერთეულების პავილიონებთან, წარმოდგენილია ადგილობრივი ხალხური რეწვის ოსტატების ნამუშევრები, ძველი სვანური საყოფაცხოვრებო ნივთები და სვანური კულინარია.

პარალელურად მიმდინარეობს ფოლკლორული ანსამბლების კონცერტი. ღონისძიებას სამეგრელო-ზემო სვანეთის სახელმწიფო რწმუნებული დავით ვერავა, მოადგილეებთან, მესტიის მერთან და საკრებულოს თავმჯდომარესთან ერთად ესწრება.

დღესვე გაიმართა მესტიის საპატიო მოქალაქეების დაჯილდოება. სახელმწიფო რწმუნებულმა და მესტის მერმა აღნიშნული წოდება, ძიუდოში მსოფლიო ჩემპიონს ლუხუმ ჩხვიმიანს გადასცეს.

„სვანეთობის“ ფარგლებში დღესვე სტარტს აიღებს მესტიის საერთაშორისო მთის ფილმების ფესტივალი, რომელიც 6 დღის განმავლობაში გაგრძელდება.

„სვანეთობა“ ყოველწლიურად, კვირიკობის დღესასწაულის მეორე დღეს იმართება, ის სვანური ტრადიციების, კულტურის, ფოლკლორის, რეწვისა და ადგილობრივი კულინარიის პოპულარიზაციას ისახავს მიზნად.

• სვანეთში, სოფელ კალაში 28 ივლისს წმიდა კვირიკესა და ივლიტას წამების დღეს, უხსოვარი დროიდან აღინიშნება რელიგიური დღესასწაული კვირიკობა, რომელსაც სვანეთში ლაგურკას ეძახიან. ამ დღეს სვანები ეკლესიას საგანგებოდ ამ დღისთვის გაზრდილ თეთრ ცხვარს სწირავენ.

წმიდა კვირიკეს ტაძარი აგებულია XI საუკუნეში. აქ დაცულია წმიდა კვირიკეს რამდენიმე უძვირფასესი ხატი XI-XII საუკუნეებისა და შალიანის მინანქრიანი ხატი, რომელშიც ჩატანებულია ჯვარიცხოვლის ნაწილი. სვანების ყოველ თემს თავისი ეკლესიები აქვს აუარებელი ჯვარ-ხატებით, მაგრამ არც ერთი ისე ძლიერად არ მიაჩნიათ, როგორც “ლაგურკა”, წმ. კვირიკეს და ივლიტას ეკლესია და მასში დაცული საუცხოო, ბიზანტიური ხელოვნების სანაწილე – ხატი, რომელსაც ისინი შალიანს უწოდებენ. ამიტომაც დიდი ბოროტების და დანაშაულობის ჩამდენის აღმოსაჩენად შენიშნულ პირებს ამ ხატზე აფიცებენ და არ ყოფილა შემთხვევა, რომ სვანს ფიცის დროს თავისი დანაშაული არ ეღიარებინა.

ამჟამად კალას თემის ეკლესიების მთელი საგანძური ლაგურკის ეკლესიაშია თავმოყრილი. ხატები წმ. კვირიკეს გამოსახულებით მხოლოდ სვანეთშია დაცული. ლაგურკის ეკლესიამ წმ. კვირიკეს ათი ხატი შემოგვინახა, რომლებიც სხვადასხვა დროს მიეკუთვნება და წარმოადგენს მას ტრადიციულად, როგორც მოწამეს ჯვრით ხელში. ეს ხატები სპეციალურად ლაგურკის ეკლესიისთვის იყო შესრულებული.

წმიდა მოწამენი კვირიკე და ივლიტა მცირე აზიაში, ლიკაონიის ქალაქ იკონიაში ცხოვრობდნენ. დიდებული გვარის ჩამომავალი ივლიტა ქრისტიანი იყო. იგი ადრე დაქვრივდა და ერთადერთ ძეს – ჩვილ კვირიკეს კეთილმსახურებით ზრდიდა. როცა უსჯულო იმპერატორმა დიოკლეტიანემ (284-305) მართლმორწმუნეთა დევნა დაიწყო, წმიდა ივლიტამ, იმის შიშით, რომ სატანჯველებს ვერ გაუძლებდა, დატოვა მთელი სიმდიდრე, ნათესავები, ახლობლები და შვილთან და ორ მხევალთან ერთად სელევკიაში გაიხიზნა. ის მდაბიოთა და გლახაკთა შორის ცხოვრობდა. გარეგნულად თითქოს არაფრით განირჩეოდა მათგან. მალე ის მმართველ ალექსანდრესტან დაიბარეს.

ივლიტა სამსჯავროზე თავისი სამი წლის ძით ხელში მივიდა და ქრისტიანობა თამამად გამოაცხადა. განრისხებული მსაჯულის ბრძანებით ივლიტას შვილი ხელიდან გამოგლიჯეს და ხარის ძარღვებით დაუნდობლად დაუწყეს ცემა. დედის წამების შემყურე კვირიკე ტიროდა, ხელებს ასავსავებდა, ფეხებს ურტყამდა მტარვალებს და მათგან თავის გათავისუფლებას ცდილობდა. ბავშვის სილამაზით მოხიბლულმა ალექსანდრემ თავისთან მიაყვანინა იგი, კალთაში ჩაისვა და ფერება დაუწყო, მაგრამ ყრმა არ ცხრებოდა: “მეც ქრისტიანი ვარ!” ტიროდა ბავშვი, ტირილით მიიწევდა დედისკენ. გაავებულმა მსაჯულმა ბავშვი მიწაზე დაანარცხა და წიხლი ჰკრა. ჩვილი კიბის საფეხურების კიდეებზე თავის ხეთქებით ჩაგორდა და სული უფალს შეჰვედრა.

ივლიტამ შვილის ნეტარი აღსასრულისთვის მადლობა შესწირა უფალს. მმართველმა კი, მის მოუდრეკლობაში დარწმუნებულმა, წამების გაძლიერება ბრძანა: მარტვილს რკინის წვერბასრი იარაღებით დაუწყეს ჯიჯგნა, ჭრილობებში კი გამლღვალ ფისს ასხამდნენ. ივლიტას სასიკვდილო განაჩენი გამოუტანეს. მოწამემ დრო ითხოვა ლოცვისთვის, მუხლი მოიყარა, მაცხოვარს შეჰღაღადა და თავიც მოჰკვეთეს.

წმიდანთა წამება მოხდა დაახლოებით 305 წელს. ივლიტას გვამი კვირიკეს ცხედართან ერთად ქალაქგარეთ დააგდეს მხეცებისა და ფრინველების საჯიჯგნად, მაგრამ ერთგულმა მხევლებმა მოახერხეს, რომ ღამით ფარულად დაეფლათ ისინი.

კვირიკესა და ივლიტას მიმართ ლოცულობენ ოჯახური ბედნიერებისა და სნეულ ყრმათა მსწრაფლ განკურნებისათვის.

წმიდა კვირიკეს ხელის მტევანი საქართველოში ინახება.

ინფრასტრუქტურის სამინისტრო, მესტიის მუნიციპალიტეტში, თეთნულდის სათხილამურო ტრასის საბაგირომდე მისასვლელი საავტომობილო გზის რეაბილიტაციას იწყებს. ინფორმაციას ინფრასტრუქტურის სამინისტრო ავრცელებს.

გზის თანამედროვე სტანდარტებით განვითარება მნიშვნელოვნად შეუწყობს ხელს მესტიის მუნიციპალიტეტში სათხილამურო ტურიზმის განვითარებას. გზის რეაბილიტაციის პროექტს ინფრასტრუქტურის სამინისტროს საავტომობილო გზების დეპარტამენტი განახორციელებს.

არსებული გზის მდგომარეობას ინფრასტრუქტურის მინისტრი რევაზ სოხაძე, საქართველოს პარლამენტის წევრებთან და ადგილობრივი ხელისუფლების წარმომადგენლებთან ერთად გაეცნო.

ინფრასტრუქტურის მინისტრმა რევაზ სოხაძემ, სამეგრელო-ზემო სვანეთის სახელმწიფო რწმუნებულთან, დავით ვერავასთან, პარლამენტის წევრებთან – სოზარ სუბართან და ვიქტორ ჯაფარიძესთან, ასევე ადგილობრივი ხელისუფლების წარმომადგენლებთან ერთად „ქალაქებისა და კურორტების განვითარების“ სახელმწიფო პროგრამის ფარგლებში მიმდინარე სამუშაოებიც დაათვალიერა.

ინფრასტრუქტურის სამინისტროს მუნიციპალური განვითარების ფონდის პროექტით, მესტიის ცენტრალური ქუჩის რეაბილიტაცია მიმდინარეობს. სამუშაოები მოიცავს საფეხმავლო ზონის კეთილმოწყობას, ასევე მიმდებარე ღობეების და ფასადების რეაბილიტაციას. პროექტის ფარგლებში, სოფელ ჭოლაში მიმდინარეობს ცენტრალური წყლის სისტემისა და წყალარინების ქსელის მოწყობაც. დაგეგმილია სამანქანო გზის რეაბილიტაცია, რაც მნიშვნელოვნად გააუმჯობესებს ტრანსპორტით გადაადგილებას.

საქართველოს ინფრასტრუქტურის მინისტრი, რევაზ სოხაძე, სამეგრელო-ზემო სვანეთის სახელმწიფო რწმუნებულთან, დავით ვერავასთან, საქართველოს პარლამენტის წევრებთან – სოზარ სუბართან და ვიქტორ ჯაფარიძესთან, მუნიციპალური განვითარების ფონდის აღმასრულებელ დირექტორ ბექა ურუშაძესთან და ადგილობრივი ხელისუფლების წარმომადგენლებთან ერთად, მესტიის ლაღამის უბანში მიმდინარე სარეაბილიტაციო სამუშაოებს გაეცნო.

პროექტი, რომელიც აზიის განვითარების ბანკის სესხის ფარგლებში ხორციელდება, მოიცავს 20-ზე მეტი ისტორიული შენობის, მათ შორის კოშკისა და მაჩუბების აღდგენას.

რეაბილიტაციის ფარგლებში გათვალისწინებულია ტრადიციული არქიტექტურული შენობების რესტავრაცია, რეკონსტრუქცია და კონსერვაცია, რაც ლაღამის უბანს ავთენტურობას შეუნარჩუნებს.

პროექტის თანახმად, შენობების გადახურვისთვის გამოყენებული იქნება ტრადიციული მასალები – ყავარი და ფიქალი. საჭიროების მიხედვით განხორციელდება, ასევე, გამაგრებისა და სახურავის მზიდი კონსტრუქციის შეცვლის სამუშაოები.

პროექტის მიზანია, მესტიის ისტორიული უბნის კეთილმოწყობა, კულტურული მემკვიდრეობის შენარჩუნება და ტურისტული პოტენციალის განვითარება.

ზუგდიდი-მესტიის დამაკავშირებელ გზაზე, სტიქიისგან დაზიანებული ცალკეული მონაკვეთების აღდგენა მიმდინარეობს.

რეაბილიტაცია უტარდება შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის 41-ე, 53-ე; 67-ე, 68-ე; 70-ე და 76-ე კილომეტრებს. საერთო ჯამში, სამუშაოები მიმდინარეობს 1.2 კმ-ზე

დაზიანებულ მონაკვეთებზე, გზის მიწის ვაკისისა და სავალი ნაწილის სიგანე, გზის სამოსის ტიპი და მოძრაობის უსაფრთხოების პირობები ვერ აკმაყოფილებდა სტანდარტებსა და ნორმებს

გზის მონაკვეთებზე ტარდაბა: არსებული რკინა-ბეტონის მილების და მიწის ვაკისის აღდგენა, კიუვეტების, ქვედა საყრდენი კედლების და ასფალტ-ბეტონის საფარის მოწყობა და სარეაბილიტაციო მონაკვეთის ლითონის ძელებით შემოღობვა. პროექტი სახელმწიფო ბიუჯეტიდან 6,9 მილიონი ლარით ფინანსდება

ზუგდიდი-ჯვარი-მესტია-ლასდილის საავტომობილო გზის 52 კმ-ზე, ასევე მიმდინარეობს მინარე ხუბურზე არსებული 19.9 მ-ის სახიდე გადასასვლელის რეაბილიტაცია. ეწყობა ბეტონის შემასწორებელი ფენა, სადეფორმაციო ნაკერები და ჰიდროიზოლაცია, ხიდის სავალ ნაწილზე და ტროტუარებზე კი – ასფალტის საფარი. ასევე, მოეწყობა რკინა-ბეტონის საყრდენი კედლები, ხიდთან მისასვლელებზე კი ზღუდარები. პროექტი სახელმწიფო ბიუჯეტიდან ფინანსდება და მისი ღირებულება 670 ათას ლარამდე.

სამუშაოების მიმდინარეობას ინფრასტრუქტურის მინისტრი, რევაზ სოხაძე, სამეგრელო-ზემო სვანეთის სახელმწიფო რწმუნებულთან დავით ვერავასთან, პარლამენტის წევრებთან – სოზარ სუბართან, ვიქტორ ჯაფარიძესთან და ადგილობრივი ხელისუფლების წარმომადგენლებთან ერთად გაეცნო.