მესტიაში ბიოტექნოლოგიების ბანაკში რეგიონის 100-მა ახალგაზრდამ მონაწილეობა მიიღო
ბიოტექნოლოგიების ბანაკი მესტიაში წარმატებით დასრულდა. ბანაკის დახურვისა და მონაწილეთა დაჯილდოების ღონისძიებაში სამეგრელო-ზემო სვანეთის სახელმწიფო რწმუნებულის მოადგილემ გიორგი ნადარაიამ მიიღო მონაწილეობა.
6 დღის განმავლობაში მესტიამ 100 ახალგაზრდა მონაწილეს უმასპინძლა. ბანაკში მონაწილეობდნენ სამეგრელო-ზემო სვანეთის ცხრა მუნიციპალიტეტიდან შერჩეული 15-17 წლის მოზარდები, მათ შორის აფხაზეთიდან დევნილი ახალგაზრდები.
მონაწილეები გაეცნენ ბიოტექნოლოგიის თანამედროვე მიმართულებებს, საერთაშორისო ტენდენციებსა და სხვადასხვა სფეროში მის გამოყენებას. თეორიული და პრაქტიკული აქტივობების ფარგლებში ისინი რეალურ გამოწვევებზე მუშაობდნენ, ავითარებდნენ იდეებს და ქმნიდნენ საკუთარ პროტოტიპებს.
ბანაკის დასასრულს ახალგაზრდებმა ნამუშევრები გამოფენის ფორმატში წარმოადგინეს, მიიღეს სერტიფიკატები და სიმბოლური საჩუქრები.
ბანაკის მიზანი იყო ახალგაზრდებში ბიოტექნოლოგიების მიმართ ინტერესის გაღვივება, თანამედროვე მეცნიერებისა და ტექნოლოგიების შესაძლებლობების გაცნობა და შემოქმედებითი პოტენციალის განვითარება.
ბანაკი საქართველოს ინოვაციების და ტექნოლოგიების სააგენტოს ორგანიზებით, სამეგრელო-ზემო სვანეთის სახელმწიფო რწმუნებულის ადმინისტრაციის, რეგიონის მუნიციპალიტეტის მერიების და აფხაზეთის ავტონომიური რესპუბლიკის განათლებისა და კულტურის სამინისტროს თანამშრომლობით გაიმართა.
