სამართალდამცავებმა რადიკალური ფაშისტური დაჯგუფების 16 წევრი დააკავეს, რომლებიც თავს ნეოფაშისტებს უწოდებდნენ.

როგორც შსს-ში გამართულ ბრიფინგზე, თბილისის პოლიციის დეპარტამენტის დირექტორმა ვაჟა სირაძემ განაცხადა, დაკავებულები განსაკუთრებული სისასტიკით ძალადობდნენ სხვადასხვა ასაკის პირებზე.

„შინაგან საქმეთა სამინისტროს თბილისის პოლიციის დეპარტამენტის თანამშრომლებმა, დღეს ქვეყნის მასშტაბით, რადიკალური ფაშისტური დაჯგუფებების 16 წევრი დააკავეს, რომლებიც განსაკუთრებული სისასტიკით, ფიზიკურად და ფსიქოლოგიურად ძალადობდნენ სხვადასხვა ასაკის პირებზე. დაკავებულთა შორის, 10 არასრულწლოვანია.

სამართალდამცველების მიერ, თვეების განმავლობაში, სისხლის სამართლის საქმეზე ჩატარებული გამოძიებით დადგინდა, რომ ძალადობრივი დაჯგუფებების წევრები თავს მოიხსენიებდნენ ნეონაცისტებად და ხელმძღვანელობდნენ ფაშისტური იდეოლოგიით. გავლენების გაზრდისა და ცნობადობის მოხვეჭის მიზნით, ისინი რადიკალურ დამოკიდებულებას იჩენდნენ მსხვერპლთა მიმართ და განსაკუთრებული სისასტიკით, ფიზიკურად უსწორდებოდნენ მათ, ვინც მათ იდეოლოგიას არ ეთანხმებოდა.

დაჯგუფებების წევრები მსხვერპლთა მიმართ განხორციელებული ძალადობის, ღირსების შემლახველი ქმედებების, ფიზიკური და ფსიქოლოგიური ზეწოლის ამსახველ ფოტო-ვიდეო მასალას მობილური ტელეფონით იღებდნენ და სხვადასხვა ინტერნეტ პლატფორმაზე აქვეყნებდნენ.

აღნიშნული ძალადობრივი ქმედებების შედეგად, დაზარალებულია ათზე მეტი პირი, მათ შორის 4 არასრულწლოვანი.

ბრალდებულების პირადი და საცხოვრებელი სახლების ჩხრეკისას ამოღებულია მათი კუთვნილი მობილური ტელეფონები, ნიღბები, სხვადასხვა ელექტრონული ტექნიკა, ნაცისტური სიმბოლიკის ნივთები, ხმოვანი და ცივი იარაღები.

მომხდარ ფაქტებზე გამოძიება სისხლის სამართლის კოდექსის 144-ეპრიმა მუხლის მეორე ნაწილის ,,ზ“ ქვეპუნქტით და ამავე მუხლის მესამე ნაწილის ,,ბ“ ქვეპუნქტებით მიმდინარეობს, რაც წინასწარი შეცნობით არასრულწლოვნის მიმართ ჯგუფურად ჩადენილ არაადამიანურ მოპყრობას გულისხმობს და 10 წლამდე ვადით თავისუფლების აღკვეთას ითვალისწინებს.

საზოგადოებას შევახსენებთ, რომ რადიკალური ფაშისტური დაჯგუფებების ორი ლიდერი - ლევან აბესაძე და დავით ჯაფაროვი ანალოგიური ბრალდებით სასჯელს უკვე იხდიან პენიტენციურ დაწესებულებაში, რომლებიც სამართალდამცველებმა რამდენიმე თვის წინ დააკავეს. მათთან ერთად ასევე დაკავებულია დაჯგუფებების კიდევ შვიდი წევრი. გამოძიებამ დაადგინა, რომ ხსენებული იდეოლოგიის ჯგუფების სხვა წევრები აგრძელებდნენ ძალადობრივ ქმედებებს, რაც საქმეზე მიმდინარე გამოძიების პროცესში მოპოვებული მტკიცებულებებით დადასტურდა.

სისხლის სამართლის საქმეზე ინტენსიურ რეჟიმში გრძელდება საგამოძიებო მოქმედებები, ფაშისტური იდეოლოგიის მქონე ძალადობრივ ჯგუფებთან კავშირში მყოფი სხვა პირების გამოვლენისა და მათი სისხლისსამართლებრივ პასუხისგებაში მიცემის მიზნით, საზოგადოების თითოეულ წევრს კი მოვუწოდებთ, მსგავსი დანაშაულების ელემენტარული ნიშნების არსებობისას დაუყოვნებლივ შეგვატყობინონ, რათა თავიდან ავიცილოთ სასტიკი მოპყრობა არასრულწლოვანთა მიმართ და მსგავსი იდეოლოგიის გავრცელება ახალგაზრდებს შორის.

აქვე, მინდა მადლობა გადავუხადო ქალაქ თბილისის პოლიციის თითოეულ თანამშრომელს, წარმატებულად ჩატარებული საპოლიციო ღონისძიებისათვის“, - განაცხადა ვაჟა სირაძემ.

საქართველოს პრეზიდენტმა მიხეილ ყაველაშვილმა მოსახლეობას დამდეგი 2026 წელი მიულოცა.

როგორც პრეზიდენტმა აღნიშნა, 2025 წელს ქართველებმა მათთვის დამახასიათებელი სიმტკიცე გამოავლინეს და ქვეყნის სუვერენიტეტი და ეროვნული ინტერესები დაიცვეს.

„ჩემო ძვირფასო თანამემამულენო!

დღეს, ამ განსაკუთრებულ წუთებში, როდესაც ძველი წელი ისტორიას ბარდება და ახალი კარს აღებს, მოგმართავთ დიდი სიამაყით, მადლიერების გრძნობითა და მომავლის იმედით.

2025 წელი ერთდროულად განსაცდელისა და სულიერი სიძლიერის წელი იყო. ჩვენმა ხალხმა გამოავლინა ჩვენთვის დამახასიათებელი უნიკალური ბუნება და სიმტკიცე, გაუძლო არნახულ ზეწოლას, დაიცვა ქვეყნის სუვერენიტეტი და ეროვნული ინტერესი, რაც იდენტობის, რწმენისა და ტრადიციების გადარჩენას ნიშნავს.

სწორედ ამ განწყობითა და სამშობლოსადმი უსაზღვრო სიყვარულით ვეგებებით 2026 წელს“, - აღნიშნა საქართველოს პრეზიდენტმა.

მიხეილ ყაველაშვილმა დამდეგი ახალი წელი მიულოცა აფხაზ და ოს დებს და ძმებს, საზღვარგარეთ მცხოვრებ თანამემამულეებს, სხვადასხვა პროფესიის წარმომადგენლებს, რომლებიც ქვეყნის უკეთესი მომავლისათვის ზრუნავენ და საქართველოს მართლმადიდებლურ ეკლესიას.

„გულწრფელი სიყვარულით და მონატრებით მინდა დამდეგი ახალი წელი მივულოცო ჩვენს აფხაზ და ოს დებს და ძმებს, ისევე როგორც საზღვარგარეთ მცხოვრებ ჩვენს თანამემამულეებს.

მსურს განსაკუთრებულად მივულოცო და მადლობა გადავუხადო საქართველოს მართლმადიდებლურ ეკლესიას, მის უწმინდესობას, საქართველოს კათოლიკოს-პატრიარქს, ჩვენი ხალხის სულიერ საყრდენს, რწმენის, ზნეობისა და ეროვნული ერთიანობის მცველს. ვულოცავ ყველა კონფესიის წარმომადგენელს, ჩვენი ქვეყნის ერთგულ შვილებს. დიდი პატივისცემით ვულოცავ საქართველოს თავდაცვის ძალებს და სამართალდამცველებს, რომლებიც ღირსებითა და ერთგულებით იცავენ ჩვენი მოქალაქეებისა და სამშობლოს უსაფრთხოებას. ახალ წელს ვულოცავ და მადლობას ვუხდი სხვადასხვა პროფესიის წარმომადგენლებს, რომლებიც ზრუნავენ ჩვენი ქვეყნის უკეთესი მომავლისათვის.

ძვირფასო მეგობრებო, გისურვებთ თითოეულ თანამემამულეს და თითოეულ ოჯახს ჯანმრთელობას, კეთილდღეობასა და ბედნიერებას, ერთიან, ძლიერ, სამართლიან და მშვიდობიან საქართველოში. ყოველთვის გვქონოდეს რწმენა, რომ ერთად ნებისმიერი სირთულის დაძლევას შევძლებთ.

გილოცავთ დამდეგ 2026 წელს!
ღმერთი იყოს ჩვენი სამშობლოს მფარველი!“, - ნათქვამია პრეზიდენტის საახალწლო მილოცვაში.

პრემიერ-მინისტრის ირაკლი კობახიძის მილოცვა.

გილოცავთ ახალ წელს!

ახალ წელს გილოცავთ თითოეულ ჩვენს თანამოქალაქეს, უცხოეთში მცხოვრებ თანამემამულეებს, აფხაზეთსა და სამაჩაბლოში მცხოვრებ ქართველებს, აფხაზებსა და ოსებს.

გილოცავთ პედაგოგებს, ექიმებს, ხელოვანებს, საჯარო მოსამსახურეებს, ჯარისკაცებს, პოლიციელებს, მოსამართლეებს, პროკურორებს, უსაფრთხოების სტრუქტურების წარმომადგენლებს, მეწარმეებს, ფერმერებს, გლეხებს, მუშებს, ყველა პროფესიის წარმომადგენლებს.

ახალი წელი არის დღესასწაული, რომელსაც ოცნებების ასრულებისა და მიზნების შესრულების იმედით ვეგებებით. სწორედ ამას გისურვებთ თითოეულ თქვენგანს და თქვენს ოჯახებს - ოცნებების ახდენას და ყველა დასახული მიზნის მიღწევას.

2025 წელი იყო სირთულეებით სავსე, თუმცა, ამავდროულად წარმატებული ჩვენი ქვეყნისთვის. გასულ წელს, ჩვენ კიდევ უფრო განვამტკიცეთ საქართველოში მშვიდობა, განვამტკიცეთ საქართველოს დამოუკიდებლობა და სუვერენიტეტი, გავაძლიერეთ ქართული ეკონომიკა, რომელიც ისტორიაში პირველად 100 მილიარდს გადაცდა. გასული წელი იყო გარდამტეხი სახელმწიფო მმართველობის სისტემის დახვეწისა და სამართლის უზენაესობის გამტკიცების თვალსაზრისითაც.

2025 წელს ჩაყრილი საფუძველი ქმნის იმის მყარ წინაპირობას, რომ მომავალი წელი საქართველოსთვის კიდევ უფრო წარმატებული იქნება.

2026 წელი განსაკუთრებულია ჩვენი ქვეყნისთვის: მომავალ წელს აღვნიშნავთ ქრისტიანობის სახელმწიფო რელიგიად გამოცხადების 1700-წლოვან იუბილეს. ქრისტიანობა არის საქართველოს იდენტობის ერთ-ერთი უმთავრესი საყრდენი, რომელიც არა მხოლოდ ჩვენს რწმენას, არამედ კულტურასაც განსაზღვრავს.

ახალ წელს ვულოცავ უწმინდესსა და უნეტარეს ილია მეორეს, რომლის ნახევარსაუკუნოვანმა მოღვაწეობამ საქართველოს გაძლიერებაში შეუფასებელი წვლილი შეიტანა.

ქრისტიანობის ერთგულებამ, ღმერთისა და ყოვლადწმინდა ღვთისმშობლის მფარველობამ მოგვცა შესაძლებლობა, მრავალი ქარტეხილის მიუხედავად, საუკუნეების მანძილზე, სახელმწიფოებრიობა და ეროვნული თვითმყოფადობა შეგვენარჩუნებინა. ეს ყველაფერი განამტკიცებს ჩვენს რწმენას, რომ ქართული ოცნება ერთიან საქართველოზე ერთ დღესაც აუცილებლად ახდება.

ქრისტიანობის ღერძი სიყვარულია, სიყვარული კი, თავის მხრივ, არის ნებისმიერი ადამიანის თუ სახელმწიფოს სიძლიერის საფუძველთა საფუძველი.

ამიტომ, ყველას გისურვებთ მეტ სიყვარულს, ყველას გისურვებთ მეტ სიკეთეს, გისურვებთ მშვიდობას, ჯანმრთელობას, ბედნიერებას და წინსვლას ახალ 2026 წელს!

მრავალ ახალ წელს დაესწარით!

სამეგრელო-ზემო სვანეთის სახელმწიფო რწმუნებული საახალწლო მილოცვას ავრცელებს:

,,ჩემო ძვირფასო თანამოქალაქეებო მიილია 2025 წელი. ეს წელი ჩვენი რეგიონისთვის იყო გარკვეული გამოწვევების, არაერთი მნიშვნელოვანი საკითხის გადაწყვეტის, გამარჯვების წელი - გამარჯვების, რომელსაც ჩვენ ერთობით მივაღწიეთ! მადლობა თითოეულ ადამიანს ვინც ჩვენი რეგიონისთვის გულწრფელად იშრომა, რათა უკეთესი გამხდარიყო მისი ქუჩა, სოფელი, მუნიციპალიტეტი, ქალაქი, თუ სფერო, სადაც თვითონ მოღვაწეობს.

მადლობა ყველას ვინც ახლაც, ამ სადღესასწაულო უქმეებზეც დაუღალავად მუშაობთ ჩვენი მოქალაქებისთვის, მათი უსაფრთხოებისა და ჯანმრთელობისთვის!

გილოცავთ ახალ წელს - საქართველოს სიყვარულით გულანთებულო ჩემო მეგრელებო და სვანებო. ბევრი სიხარულის და წარმატების მომტანი წელი ყოფილიყოს, თითოეულის ოჯახისათვის!

კარსმომდგარ, კაცობრიობის ხილულ სასწაულს შობას და ახალ-წელს ვულოცავ ჩემს აბაშელებს, ზუგდიდელებს, მარტვილელებს, მესტიელებს, სენაკელებს, ფოთელებს, ჩხოროწყუელებს, წალენჯიხელებსა და ხობელებს - ჩვენს დევნილ მოსახლეობას, ოკუპირებულ ტერიტორიებზე მცხოვრებ ჩვენს თანამოქალაქეებს - სრულიად საქართველოს!

ჩვენ წინ მნიშვნელოვანი საკითხების გადაწყვეტის, ბევრი გამარჯვების წელი გველოდება. ცენტრალური ხელისუფლების დიდი მხარდაჭერით არაერთი მასშტაბური პროექტის განხორციელებას ვიწყებთ - რაც ჩვენს რეგიონს კიდევ უფრო დიდ მნიშვნელობას, ეკონომიკურ განვითარებასა და შესაძლებლობას მისცემს!

გილოცავთ 2026 წელს - გამარჯვებების, მშვიდობის, წარმატების და მთავარი მიზნის - ჩვენი ქვეყნის გაერთიანების წელი ყოფილიყოს” - აცხადებს სამეგრელო-ზემო სვანეთის სახელმწიფო რწმუნებული.

მთელი ღამის განმავლობაში ინტენსიური მუშაობის შედეგად წუხელ ზუგდიდის 8 სოფელში ელექტრომომარაგება აღდგა - ამის შესახებ ზუგდიდის მერმა დავით კოდუამ განაცხადა.

მისივე ინფორმაციით, ამაჟად ელექტრო ენერგიის გარეშე დარჩენილ 14 სოფელში, 19 ჯგუფი თოვლისგან დაზიანებული ელექტროსისტემის აღდგენით სამუშაოებზე მუშაობს. ზუგდიდში ქალაქის ცენტრალური გზები და სოფლებამდე მისასვლელი გზები გაწმენდილია, მუშაობს 22 ერთეული სპეციალიზებული ტექნიკა.

დავით კოდუას განცხადებით, ამჟამად შიდა საუბნო გზების გაწმენდითი სამუშაოები ხორციელდება.

ზუგდიდის მუნიციპალიტეტში, თოვლის სახით მოსული უხვი ნალექისგან ქალაქის ქუჩები და სოფლამდე მისასვლელი გზები იწმინდება. ამ დროისთვის 22 ერთეული სპეციალური ტექნიკა მუშაობს. ზუგდიდის მერის ინფორმაციით, ინტენსიურად იყრება ტექნიკური მარილი. თოვლისგან იწმინდება ტროტუარები და დეკორატიული ხე-მცენარეები. ავარიული გამორთვის გამო აბონენტების ნაწილს ელექტროენერგია არ მიეწოდება. ეტაპობრივად მიმდინარეობს აღდგენითი სამუშაოები. ზუგდიდის მერიის შესაბამისი სამსახურები 24-საათიან რეჟიმში მუშაობენ - ამოქმედებულია ცხელი ხაზი.

ოკუპირებულ გალში ნაძვის ხე აანთეს, კადრებს „გალ ტვ“ ავრცელებს.

#ამბებისაფხაზეთიდან

„ქართული ოცნების“ ზუგდიდის მერობის კანდიდატმა დათო კოდუამ  საკუთარი არჩევანი  მშობლიურ სოფელ დარჩელში, N 35-ე საარჩევნო უბანზე დააფიქსირა. 

მერობის კანდიდატის თქმით, მან ხმა მისცა პოლიტიკურ ძალას, რომელსაც ამ ქვეყნის და მისი მუნიციპალიტეტის მშვიდობიანი განვითარება შეუძლია.

„რა თქმა უნდა მხარი დავუჭირე ერთადერთ პოლიტიკურ ძალას, რომელსაც ამ ქვეყნის და მისი მუნიციპალიტეტების მშვიდობიანი განვითარება შეუძლია. დარწმუნებული ვარ დღეს ზუგდიდში და საქართველოს ყველა მუნიციპალიტეტში ჩვენი პოლიტიკური ძალა გაიმარჯვებს, როგორც მერობის ასევე საკრებულოს არჩევნებში. ამის თქმის საფუძველს მაძლევს ის განწყობები რაც მოსახლეობაშია, ხალხი კარგად ხედავს განსხვავებას ჩვენსა და სხვებს შორის. წინასწარ მადლობას ვუხდი თითოეულ მოქალაქეს მხარდაჭერისა და გამოცხადებული ნდობისთვის. ამ ნდობას მე საქმით დავამტკიცებ“-წერს კოდუა.

„ქართული ოცნების“ ზუგდიდის მერობის კანდიდიატი დათო კოდუა, საარჩევნო კამპანიას აჯამებს. მერობის კანდიდიატი ამომრჩეველს მიმართავს და მთავარ პრიორიტეტებს ასახელებს. კოდუას განცხადებით კამპანიის პერიოდში, ბოლო თვენახევრის განმავლობაში 140-მდე სხვადასხვა სახის შეხვედრა გაიმართა და 20 ათასამდე მოქალაქეს შეხვდა.

„ჩემო ზუგდიდელებო, საარჩევნო კამპანია დავასრულეთ, ჩვენ ამ ხნის განმავლობაში 140-მდე სხვადსახვა სახის შეხვედრა გავმართეთ. ბოლო თვენახევრის განმავლობაში  შევხვდით 20 ათასამდე მოქალქეს. თქვენთან გამართულ შეხვედრებზე დასახელებული საჭიორებების მოგვარება იქნება ჩვენი მუშაობის მთვარი პრიორიტეტი, მე  მოვდივარ კონკრეტული გეგმით – უკეთესი ზუგდიდისთვის.

ჩვენი ახალგაზრდული გუნდისთვის მთავარი იქნება თქვენთან მუდმივი თანამშრომლობა და არსებულ გამოწვევებსა და საჭიროებებზე ერთობლივი მუშაობა.

ჩვენ ერთად კიდევ უფრო მეტად განვავითარებთ ზუგდიდს: ინფარსტრუქტურის კეთილმოწყობა, განათლების ხელშეწყობა, მწვანე სივრცეების შექმნა, სპორტის, კულტურის სფეროების განვითარება, სოციალური და ჯანდაცვის მუნიციპალური პროექტების გაძლიერება, დევნილებისთვის საცხოვრებელი პირობების გაუმჯობესება, მძიმე საცხოვრებელ პირობებეში მყოფი მოქალაქეებისთვის სახლების მშენებლობა – ეს იქნება ჩვენი მთავარი  საზრუნავი. ჩვენ ზუგდიდის გავხდით ქალაქს, რომელიც ქვეყნის შიგნით და მის ფარგლებს გარეთ იამაყებს შემოქმედებითი მიღწევებით, მასშტაბური ღონისძიებეითა და ტურისტული მიზიდულობის ახალი და განახლებული ცენტრებით.

ჩვენ გავზრდით ახალგაზრდების მონაწილეობას მუნიციპალურ პროცესებში, კიდევ უფრო  მეტად გაიზრდება მოქალაქეების ჩართულობა გადაწყვეტილების მიღების ნაწილში.

ჩვენი ქალაქისთვის უმნიშვნელოვანესია ანაკლიის პორტის მიმდინარე პროექტი, რომელიც მოგვცემს მეტ ეკონომიკურ შესაძლებლობას, შემოიტანს მუნიციპალიტეტში დოვლათს, ახალ სამუშაო ადგილებს – რაც ახალი განვითარების გარანტი იქნება.

ზუგდიდს განსაკუთრებული, ისტორიული როლი აქვს – ჩვენ ხიდი ვართ ოკუპირებულ აფხაზეთთან, ეს მუნიციპალიტეტი იქნება  ყველასგან განსხვავებული, წარმატებული და განვითარებული. სამთავრობო გუნდის დიდი მხარდაჭერით, ამ გზას ერთად გავივლით!

ჩვენ ვიქნებით გამჭირვალე, კეთილსინდისიერი, საჭიროებებზე დროული რეაგირების მქონე გუნდი, რომლისთვისაც მთავარი საზრუნავი ზუგდიდი და ზუგდიდელები იქნებიან. ამ გზაზე მთავარი ხართ თქვენ და თქვენი მხარდაჭერა მომცემს მანდატს ერთად დაუღალავად ვიშრომოთ ჩვენი ქალაქისთვის!

მჯერა  არჩევნებში თქვენი მხარდაჭერის, გპირდებით, თქვენს ნდობას საქმით გავამართლებ.

მშვიდობა საქართველოს მეტი განვითარება ზუგდიდს!“ – ნათქვამია ქართული ოცნების ზუგდიდის მერობის კანდიდატის დათო კოდუას მიმართვაში.

ფოთის ბიუჯეტი, სტანდარტული ზრდის მიღმა, ყოველი წლის განმავლობაში უზრუნველყოფილი იქნება პლუს 20 მილიონით – ამის შესახებ საქართველოს პრემიერ-მინისტრმა ირაკლი კობახიძემ პარლამენტში ყოველწლიური მოხსენებით გამოსვლისას, ფოთის, ხობისა და სენაკის დელეგატის გიორგი ხახუბიას კითხვების საპასუხოდ განაცხადა.

„ძალიან მნიშვნელოვანი იყო ფოთის მუნიციპალიტეტისთვის 20 მილიონის დამატება მუნიციპალიტეტის ბიუჯეტში, ეს არ არის ერთჯერადი დამატება, ყოველი წლის განმავლობაში უზრუნველყოფილი იქნება პლუს 20 მილიონით, სტანდარტული ზრდის მიღმა ფოთის ბიუჯეტის განსაზღვრა“ განაცხადა ირაკლი კობახიძემ. მან ასევე ყურადღება გაამახვილა ფოთის თეატრთან დაკავშირებით:

„რაც შეეხება ინფრასტრუქტურას, ფოთის თეატრის რეაბილიტაცია საკმაოდ ძვირადღირებული პროექტია, თავის დროზე, აქაც გავიხსენებ წინა ხელისუფლებას, საკმაოდ არასწორი ფორმით განხორციელდა ეს პროექტი, შესაბამისად საკმაოდ ძვირი ჯდება რეაბილიტაცია, საკითხს დამატებით შევისწავლით. ყველა შემთხვევაში ფოთში მულტიფუნქციური ინფრასტრუქტურის განვითარება იქნება ერთ-ერთი პრიორიტეტი, ეს არის ერთ-ერთი უმნიშვნელოვანესი ქალაქი ჩვენი ქვეყნისთვის, ამიტომ პრიორიტეტებს შორის ერთ-ერთ მაღალ ადგილს დაიკავებს ფოთი. ფოთში მულტიფუნქციურ ინფრასტრუქტურას ექნება არამხოლოდ სპორტული დატვირთვა, არამედ კულტურულ შემეცნებითი დატვირთვაც“ – განაცხადა ირაკლი კობახიძემ.