ზუგდიდში პროექტი Tech4Tourism დასრულდა - გამარჯვებულ გუნდს 10 000 ლარი გადაეცა

ინოვაციების და ტექნოლოგიების სააგენტოს, ზუგდიდის ტექნოპარკის და სამეგრელოს DMO-ს თანამშრომლობით პროექტი Tech4Tourism განხორციელდა.

4 დღის განმავლობაში მონაწილეები ტურიზმის სფეროში არსებულ გამოწვევებზე მუშაობდნენ და ინოვაციურ იდეებს ავითარებდნენ ისეთი მიმართულებებით, როგორიცაა ხელოვნური ინტელექტი (AI), ციფრული ტურისტული სერვისები, QR და AR ტექნოლოგიები, ეკო და სათავგადასავლო ტურიზმი.

პროექტის ფარგლებში მონაწილეებს შეეძლოთ, გაეზიარებინათ იდეები, ემუშავათ ინოვაციურ გადაწყვეტილებებზე და შეექმნათ ტექნოლოგიებზე დაფუძნებული ახალი შესაძლებლობები ტურიზმის განვითარებისთვის.

ჟიურიმ, რომლის შემადგენლობაშიც შედიოდნენ სვანეთის DMO-ს ხელმძღვანელი, ტურიზმის ეროვნული ადმინისტრაციის წარმომადგენლები და „ენგური ატრაქციის“ ხელმძღვანელი, გამარჯვებული გუნდი გამოავლინა.

გამარჯვებულ გუნდს სამეგრელოს DMO-სგან იდეის შემდგომი განვითარებისთვის 10 000 ლარი გადაეცა, ხოლო პროექტის პარტნიორებმა რჩეულ გუნდებს სიმბოლური პრიზები გადასცეს.