გაწეული საქმიანობის ანგარიში მერმა და საკრებულოს მაჟორიტარებმა სოფელ ოქტომბერში წარადგინეს

ზუგდიდის მუნიციპალიტეტის მერმა დავით კოდუამ, საკრებულოს მაჟორიტარ დეპუტატებთან თეა გაბელაიასთან და გაბრიელ ხარებავასთან ერთად, გაწეული საქმიანობის ანგარიში ოქტომბრის, დავითიანისა და ახლკახათის მოსახლეობას წარუდგინა.

მოსახლეობასთან გამართულ შეხვედრას საქართველოს პარლამენტის წევრი, ზუგდიდის დელეგატი ედიშერ თოლორაია დაესწრო.

მერი ადგილობრივებს განხორციელებულ პროექტებზე ესაუბრა, მათი საჭიროებები მოისმინა და სამომავლო გეგმები გააცნო.

ოქტომბერში მოეწყო სკვერი და სავარჯიშო მოედანი, მიმდინარეობს მინი სტადიონის სრული რეაბილიტაცია, თბილისის ქუჩაზე მოეწყო საავტომობილო გზა. აგრეთვე, დავით გურამიშვილის ქუჩაზე,დევნილთა ჩასახლებაში მრავალბინიანი საცხოვრებელი სახლის ეზოს კეთილმოწყობა მიმდინარეობს.

მერის განცხადებით, ამ მნიშვნელოვანი პროექტის განხორციელება მოსახლეობისთვის მიცემული პირობა იყო, რომელიც ცენტრალური ხელისუფლების მხარდაჭერით ხორციელდება. პროექტის ღირებულება 454 728 ლარია.

ახალკახათში რამდენიმე ქუჩაზე მოეწყო გარე განათება, განხორციელდა საჯარო სკოლის სპორტდარბაზის, საკლასო ოთახების სარეაბილიტაციო და გათბობის სისტემების მოწყობის სამუშაოები. რეაბილიტაცია ჩაუტარდა ჯავახიშვილის ქუჩაზე დაზიანებულ გზის საფარს. რუსთაველის ქუჩაზე მოეწყო სავარჯიშო სივრცე.