კანონში ენგურჰესის საკითხზე ცვლილებას პარლამენტმა მხარი დაუჭირა
პარლამენტმა მესამე მოსმენით განიხილა და 81 ხმით მიიღო „ენერგეტიკისა და წყალმომარაგების შესახებ“ საქართველოს კანონში ცვლილების შეტანის თაობაზე“ კანონპროექტი, რომელიც პლენარულ სხდომაზე ერთ-ერთმა ინიციატორმა, დარგობრივი ეკონომიკისა და ეკონომიკური პოლიტიკის კომიტეტის თავმჯდომარე შოთა ბერეკაშვილმა წარადგინა.
კანონპროექტით, „ენერგეტიკისა და წყალმომარაგების შესახებ“ საქართველოს კანონს ემატება გარდამავალი დებულება, რომლითაც დგინდება ელექტროენერგიის წარმოების ტარიფების გაანგარიშების წესი იმ რეგულირებული ელექტროსადგურებისთვის, რომლებიც ახორციელებენ საქართველოს ოკუპირებულ ტერიტორიებზე ელექტროენერგიის მიწოდებას.
ცვლილება შედის „ენერგეტიკისა და წყალმომარაგების შესახებ“ საქართველოს კანონში, კერძოდ, კანონს ემატება მუხლი, რომლის თანახმადაც, ელექტროენერგიის წარმოების ტარიფების გაანგარიშება-დადგენის დროს არ იქნება გათვალისწინებული „ენგურჰესისა“ და „ვარდნილჰესების“ კასკადის მიერ წარმოებული და საქართველოს ოკუპირებულ ტერიტორიებზე საქართველოს კანონმდებლობის მოთხოვნების დაცვით მიწოდებული ელექტროენერგიის ოდენობა სატარიფო რეგულირების პერიოდის შესაბამისი სატარიფო წლისთვის.
წარმოდგენილი ცვლილების მიღების შედეგად, შპს „ენგურჰესისა“ და შპს „ვარდნილჰესების კასკადისთვის“ შესაძლებელი გახდება სამართლიანი ტარიფის დადგენა, რაც თავის მხრივ, ხელს შეუწყობს კომპანიის ფინანსურ გაძლიერებასა და მასზე დაკისრებული ვალდებულებების შეუფერხებლად განხორციელებას.
მსგავსი სიახლეები
პარლამენტმა „უცხოური გავლენის გამჭვირვალობის“ კანონპროექტს მეორე მოსმენით მხარი დაუჭირა
საპროცედურო საკითხთა კომიტეტმა მხარი დაუჭირა საარჩევნო სისტემასთან დაკავშირებულ საკონსტიტუციო ცვლილებას
