თამაზ უბილავა 48 წლის შემდეგ საგანგებო სიტუაციების სამსახურს ტოვებს
სამეგრელო-ზემო სვანეთის რეგიონის საგანგებო სიტუაციებოს მართვის სამსახურის უფროსის მოადგილე თამაზ უბილავა 48 წლიანი მუშაობის შემდეგ სამსახურს ემშვიდობება. ამის შესახებ უბილავა სოციალურ ქსელში ინფორმაციას აქვეყნებს.
„ჩემო სახანძრო, იმ მომენტიდან მოყოლებული, როდესაც გაგიცანი, ვიცოდი, რომ ერთი რამ იყო რეალური – მე შენ შემიყვარდი. იმდენად ძლიერად, რომ მე შენ ყველაფერი შემოგწირე, ჩემი გონებიდან და სხეულიდან დაწყებული, ჩემი სულით დამთავრებული. მე შენთვის ყველაფერი გავაკეთე. ასე აკეთებენ ადამიანები, როდესაც რაღაც თავს ისე ცოცხლად აგრძნობინებს, როგორც ეს შენ გააკეთე. შენ მე ოცნებები მაჩუქე, ვფიქრობ იმ წლწბზე, დღეებზე და წუთებზე რომელიც შენთან ერთად გამოვიარე. ეს წელი ჩემთვის უკანასკნელია. გულს და გონებას მუშაობა სურს, თუმცა სხეულმა იცის, რომ დამშვიდობების დროა. მინდა იცოდე, რომ ჩვენი ურთიერთობის 48 წლის შემდეგ მზად ვარ გაგიშვა. ახლა შეგვიძლია ყველა განვლილი მომენტი შევიგრძნოთ ერთად, ცუდიც და კარგიც, ჩვენ ერთმანეთს ყველაფერი მივეცით, რაც გაგვაჩნდა. ორივემ ვიცით. რომ რაც არ უნდა მოხდეს, მე ისევ ის ყმაწვილი ვიქნები რომელსაც მუდამ ეყვარები. 2024 წელი 17 იანვარი” – წერს უბილავა.
