გუბერნატორმა და მერმა გმირის შვილთან ერთად აგვისტოს ომში დაღუპულთა მემორიალი გვირგვინით შეამკეს
2008 წლის რუსეთ-საქართველოს აგვისტოს ომიდან 15 წელი გავიდა. სამეგრელო-ზემო სვანეთის სახელმწიფო რწმუნებულმა გიორგი გუგუჩიამ და ზუგდიდის მერმა მამუკა წოწერიამ ომში დაღუპულ ბადრი ბერანძის შვილთან ერთად აგვისტოს ომში დაღუპულთა მემორიალი გვირგვინით შეამკეს. სამეგრელოს რეგიონიდან აგვისტოს ომს 37 ადამიანის სიცოცხლე ემსხვერპლა.
“დღეს ჩვენი ქვეყნის ისტორიაში ერთ-ერთი ყველაზე მძიმე დღეა. ამ ომმა ძალიან ბევრი ჩვენი თანამოქალაქე შეიწირა. მათ შორის 40 მდე სამხედრო და მშვიდობიანი მოქალაქეები ჩვენი რეგიონიდან. დღეს კიდევ ერთხელ მივაგეთ პატივი ამ გმირ ადამიანებს. მათი გმირობები და საქართველოსთვის თავდადების ისტორიები უკვდავი მაგალითებია მომავალი თაობებისთვის. დიდება გმირებს, მათ მიერ გაღებული სიცოცხლე აუცილებლად გამოიტანს შედეგს, საქართველო იქნება ერთიანი, ჩვენს აფხაზ და ოს თანამოქალაქეებთან ერთად. მე მინდა აქვე სამძიმარი გამოვუცხადო რაჭაში სტიქიის შედეგად გარდაცვლილთა ოჯახებს და ვუსურვო მათ გამძლეობა და მხნეობა“ – განაცხადა სამეგრელო-ზემო სვანეთის სახელმწიფო რწმუნებულმა გიორგი გუგუჩიამ.
