სენაკის მერის გადაწყვეტილებით, 8 სტუდენტის სწავლა მერიამ დააფინანსა
სენაკის მუნიციპალიტეტის მერის, ვახტანგ გადელიას გადაწყვეტილებით, მიმდინარე წელს, პირველად, მუნიციპალიტეტის მერიაში, სტუდენტების ხელშეწყობის დაფინანსების/თანადაფინანსების პროგრამა ამოქმედდა.
აღნიშნული პროგრამა მოიცავს სენაკის მუნიციპალიტეტის ტერიტორიაზე რეგისტრირებული მრავალშვილიანი და სოციალურად დაუცველი ოჯახების, ასევე, დედ-მამით ობოლი სტუდენტების ფინანსურ მხარდაჭერას.
პროგრამის ფარგლებში, დაფინანსდება სწავლის საფასურის 50% – 1125 ლარის ოდენობით.
ამ დროისთვის, აღნიშნული პროგრამის ფარგლებში, 8 სენაკელი სტუდენტი დაფინანსდა.
იგეგმება პროგრამის ბიუჯეტის გაზრდა.
სტუდენტების ხელშეწყობის დაფინანსების/თანადაფინანსების პროგრამა სექტემბრის თვიდან განახლდება.
დაფინანსების მისაღებად, სენაკის მუნიციპალიტეტის მერიაში, საჭიროა შემდეგი დოკუმენტაციის წარდგენა:
• განცხადება;
• პირადობის მოწმობის ასლი;
• სოციალურად დაუცველი სტუდენტების შემთხვევაში – ამონაწერი სოციალურად დაუცველი ოჯახების მონაცემთა ერთიანი ბაზიდან;
• ცნობა უმაღლესი საგანმანათლებლო დაწესებულებიდან, სტუდენტის სტატუსის შესახებ – წლიური გადასახადის მითითებით;
• უმაღლესი საგანმანათლებლო დაწესებულების მიერ გაცემული აკადემიური მოსწრების მაჩვენებელი/ამონაწერი წინა სემესტრის გავლილი საგნებისა და შეფასების შესახებ;
• იძულებით გადაადგილებული პირის შემთხვევაში – დევნილის მოწმობა;
• წარჩინებული სტუდენტის შემთხვევაში- რეკომენდაციების, ასევე, დოკუმენტაცია – სხვადასხვა სახის პროგრამებში ჩართულობისა და მიღებული სერთიფიკატების, ჯილდოების შესახებ;
• უმაღლესი საგანმანათლებლო დაწესებულების საბანკო რეკვიზიტები და ანგარიშფაქტურა;
• თანხის ნაწილის – 1125 ლარის გადახდის დამადასტურებელი ქვითარი;
• დაფინანსების მოპოვებისთვის განცხადების შემოტანის უფლება აქვს დაფინანსების მსურველ პირს ან მის წარმომადგენელს (წარმომადგენლის მიერ შესაბამისი დოკუმენტის წარდგენის საფუძველზე).
