სენაკში შშმ პირთა საერთაშორისო დღე აღინიშნა
,,დღეს თქვენი დღეა – განსაკუთრებული ადამიანების დღე. ჩვენი მუნიციპალიტეტი სიმბოლური აქტივობებით უერთდება შეზღუდული შესაძლებლობის მქონე პირთა საერთაშორისო დღეს. ჩვენი ყურადღება და თანადგომა თქვენს მათ მიმართ მხოლოდ დღევანდელი დღით არ შემოიფარგლება. ჩვენ ვახორციელებთ და ვგეგმავთ არაერთი პროექტს, რომლის მიზანიც განსაკუთრებული საჭიროების მქონე ადამიანების სოციალური იზოლაციის დაძლევა, საზოგადოებაში მათ მიმართ არსებული სტერეოტიპების რღვევა და მათი რეალური შესაძლებლობების წარმოჩენაა. შეზღუდული შესაძლებლობები არ არსებობს, ჩვენ მეგობრები ვართ, თქვენ – ჩვენი საზოგადოების თანასწორი და სრულფასოვანი წევრები“ – ამ სიტყვებით მიმართა სენაკის მუნიციპალიტეტის მერმა ვახტანგ გადელიამ ჩვენს მუნიციპალიტეტში მცხოვრებ, გამორჩეულად თბილ ადამიანებს.
შშმ პირთა საერთაშორისო დღესთან დაკავშირებით, სენაკის მუნიციპალიტეტის მერიის განათლების, კულტურის, სპორტისა და ახალგაზრდობის სამსახურის წარმომადგენლები განსაკუთრებული საჭიროებების მქონე ბავშვთა დღის ცენტრ ,,ლაზარეს“ ესტუმრნენ.
მუნიციპალიტეტის მერიის მხარდაჭერითა და მოსწავლე-ახალგაზრდობისა და კულტურის ცენტრის ორგანიზებით, შემოქმედებითმა ჯგუფებმა და გასართობი ცენტრის ,,Big day“ ანიმატორებმა, დღევანდელი დღის გმირებს სახალისო გარემო შეუქმნეს. მუნიციპალიტეტის მერმა ვახტანგ გადელიამ, პირველმა მოადგილემ გრიგოლ ბაღათურიამ, საკრებულოს წევრებმა – საბა ოდიშარიამ, გიგა წურწუმიამ, ლევან უჩანეიშვილმა და ადგილობრივი თვითმმართველობის წარმომადგენლებმა, მუნიციპალიტეტში მცხოვრებ 18 წლამდე ასაკის შშმ პირებს სამახსოვრო საჩუქრები გადასცეს.
მუნიციპალიტეტის მერიის ჯანმრთელობისა და სოციალური დაცის სამსახური, შეზღუდული შესაძლებლობების მქონე პირთა დახმარების პროგრამის ფარგლებში, შშმ პირებს უწევს ინდივიდუალურ დახმარებას, კერძოდ; მხედველობის პრობლემის მქონე და სმენადაქვეითებულ პირებზე წელიწადში ორჯერ, ერთ მოქალაქეზე გაიცემა 200 ლარი; გონებრივი განვითარების შეფერხების (მათ შორის, დაუნის სინდრომი, ცერებრული დამბლა, აუტიზმი) მქონე პირებზე, ყოველთვიურად გაიცემა 100 ლარი; მუნიციპალიტეტის მერია ასევე უზრუველყოფს დღის ცენტრის „ლაზარე 2015“ ფინანსურ მხარდაჭერას.
შშმ პირთათვის, სენაკის მუნიციპალიტეტში, იგეგმება პირველი საოჯახო ტიპის საცხოვრისის გახსნა, სადაც შშმ პირებს საშუალება ექნება იცხოვრონ და მიიღონ ის სერვისი, რასაც ოჯახურ გარემოში მიიღებდნენ. შეზღუდული შესაძლებლობის მქონე პირთა უფლებების დაცვის გაუმჯობესება და ყველასათვის თანასწორ შესაძლებლობათა უზრუნველყოფა ხელისუფლების უმნიშვნელოვანესი პრიორიტეტია.
