სამეგრელოში, საოკუპაციო ხაზთან მდებარე სოფლებისა და აფხაზეთის სკოლების მოსწავლეებთან ონლაინ სემინარი გაიმართა
- 2020 წლის 17 ივნისს, ნატოსა და ევროკავშირის შესახებ საინფორმაციო ცენტრის ორგანიზებით, საქართველოს ევროპული ინტეგრაციის საკითხებსა და საქართველოში ევროკავშირის სადამკვირვებლო მისიის (EUMM) საქმიანობის შესახებ მოსწავლეებთან ონლაინ სემინარი გაიმართა.
სემინარში სამეგრელო-ზემო სვანეთის რეგიონის საოკუპაციო ხაზთან მდებარე სოფლებისა და აფხაზეთის სკოლების მოსწავლეები მონაწილეობდნენ.
სემინარზე საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის წარმომადგენლებმა ანა ცანავამ და სალომე აბულაძემ ევროინტეგრაციის საკითხებზე ისაუბრეს. კერძოდ, მომხსენებელმა ყურადღება გაამხვილეს ევროკავშირის შექმნის ისტორიაზე, ევროპულ ღირებულებებზე, საქართველოს ევროკავშირთან თანამშრომლობაზე, ასევე, ანტიდასავლურ პროპაგანდასა და მისგან მომდინარე საფრთხეებზე.
შეხვედრაზე, ასევე, საუბარი შეეხო საქართველოს მიერ ასოცირების შეთანხმებით ნაკისრი ვალდებულებების შესრულებასა და 6 წლის მანძილზე მიღებულ შედეგებს.
შეხვედრაზე საქართველოში ევროკავშირის სადამკვირვებლო მისიის ზუგდიდის რეგიონული ოფისის ხელმძღვანელმა ვიქტორ ბრანდტმა მისიის საქმიანობის, როლისა და მანდატის, არსებული გამოწვევებისა და მიღწევების შესახებ ისაუბრა.
სემინარი საქართველოში მიმდინარე “ევროპის დღეები 2020”-ის ფარგლებში გაიმართა.
„ევროპის დღეები 2020“-ის ფარგლებში, სამეგრელო-ზემო სვანეთის რეგიონში ონლაინ სემინარები მიმდინარეობს.
2020 წელს ევროპის დღეები უკვე მერვედ იმართება, რომელსაც სსიპ საინფორმაციო ცენტრი ნატოსა და ევროკავშირის შესახებ საგარეო საქმეთა სამინისტროს მხარდაჭერით და საქართველოს პარლამენტთან თანამშრომლობით ახორციელებს.
„ევროპის დღეები 2020“ 8 მაისს დაიწყო და 27 ივნისს, საქართველო-ევროკავშირის ასოცირების შეთანხმების გაფორმებიდან 6 წლის თავზე დასრულდება.
