სენაკის მერიის სხდომათა დარბაზს ჟიული შარტავას სახელი მიენიჭა
დღეს 26 მაისია – ერის ისტორიულ დროთა გაწყვეტილი კავშირის, მოშლილი სახელმწიფოებრიობის აღდგენის დღე, თვისობრივად სრულიად ახალი ეტაპის დასაწყისი საქართველოს სახელმწიფოებრივ აღმშენებლობაში.
სიმბოლურია, რომ ქვეყნის ამ უმნიშვნელოვანეს დღეს, სენაკის მუნიციპალიტეტის მერიის სხდომათა დარბაზს საქართველოს ერთიანობისთვის ზვარაკად შეწირული, ღირსეული ერისკაცისა და საამაყო თანაქალაქელის ჟიული შარტავას სახელი მიენიჭა.
მემორიალური დაფა სენაკის მუნიციპალიტეტის მერმა ლევან კუპრეიშვილმა, მერის პირველმა მოადგილემ გრიგოლ ბაღათურიამ, მერის მოადგილემ კახაბერ კუპრეიშვილმა გახსნეს.
,, სიცოცხლის გაწირვა სამშობლოსათვის ეს ჩვენი ჯიშის, ჯილაგის, მოდგმის საუკეთესო თვისებაა. მტერმა კარგად იცოდა, ჟიული შარტავას სახით ვის უკლავდა საქართველოს. ჩვენ კი, მისმა თანამედროვეებმა, ჩვენმა ახალგაზრდობამ, მისი სახელი უნდა უკვდავვყოთ.
ჩემთვის საპატიოა და საამაყო, რომ სწორედ ჩემი მმართველობის პერიოდში, ამ ისტორიულ დღეს, მერიის სხდომათა დარბაზს, საქმის კეთების ნიჭით ჩვენს გვერდით მოარული სამშობლოსათვის თავდადებული მამულიშვილის ჟიული შარტავას სახელი მიენიჭა“ – აღნიშნა სენაკის მუნიციპალიტეტის მერმა ლევან კუპრეიშვილმა.
საქართველოს ეროვნულ გმირი, აფხაზეთის ავტონომიური რესპუბლიკის მინისტრთა საბჭოსა და თავდაცვის საბჭოს თავმჯდომარე 1993 წლის 27 სექტემბერს სეპარატისტულმა დაჯგუფებამ თანამებრძოლებთან ერთად ტყვედ აიყვანა და დახვრიტა.
![გიორგი ჭანტურიას სპექტაკლი ,,უკანასკნელი თოლია,“ რომელიც ჟიული შარტავას სიცოცხლის ბოლო დღეს ეხება დასმა სენაკის თეატრში წარადგინა [ფოტორეპორტაჟი]](https://api.stv.ge/uploads/2025/03/9-960x640.jpg)
