საქართველოს ტერიტორიულ წყლებში ნატო-ს ხომალდები შემოვიდნენ
საქართველოს ტერიტორიულ წყლებში ნატოს მუდმივმოქმედი მეორე საზღვაო შენაერთი (SNMG2) შემოვიდა, რომლის შემადგენლობაშიც შედის: „Flagship – HNLMS Evertsen“ (ნიდერლანდების სამეფო), „TCG Yildirim“ (თურქეთის რესპუბლიკა), “BGS DRAZKI” (ბულგარეთი) და ”ROS Regele Ferdinand” (რუმინეთი).
ნატოს მუდმივმოქმედ მეორე შენაერთს კომოდორი ბაუდევაინ ბუთსი ხელმძღვანელობს. ფოთის პორტში სტუმრებს სამეგრელო-ზემო სვანეთის სახელმწიფო რწმუნებული ალექსანდრე მოწერელია, ფოთის მერის პირველი მოადგილე კონსტანტინე თოფურია, ზუგდიდის მერის პირველი მოადგილე გიორგი შენგელია, საქართველოს შინაგან საქმეთა სამინისტროს სასაზღვრო პოლიციის უფროსი თემურ კეკელიძე, სანაპირო დაცვის დეპარტამენტის დირექტორი, პირველი რაგნის კაპიტანი თემურ კვანტალიანი, პოლონეთის ელჩი საქართველოში და ნატოს სამეკავშირეო ოფისის წარმომადგენლები დახვდნენ.
სახელმწიფო რწმუნებულის განცხადებით, ნატოს მუდმივმოქმედი შენაერთის ვიზიტი საქართველოსთვის უმნიშვნელოვანესია, რაც კიდევ ერთხელ ხაზგასმაა ჩვენი ქვეყნის მისწრაფების ევროატლანტიკურ სტრუქტურებში გაწევრიანებასთან დაკავშირებით. ალექსანდრე მოწერელიას განმარტებით, საქართველოს უსაფრთხოებისთვის ნატოში გაწევრიანება და ამ ორგანიზაციის პარტნიორობა აუცილებელია.
ვიზიტის ფარგლებში, კომოდორი ბაუდევაინ ბუთსი სახელმწიფო რწმუნებულს და ფოთის ადგილობრივი ხელისუფლების წარმომადგენლებს მერიაში შეხვდება, შეხვედრა ასევე გაიმართება საქართველოს სანაპირო დაცვის ხელმძღვანელთან. ვიზიტის ფარგლებში, გაიმართება სხვადასხვა სამუშაო შეხვედრა, კულტურული და სპორტული ღონისძიებები.
ნატოს მუდმივმოქმედი მეორე საზღვაო შენაერთის (SNMG2) ხომალდები საქართველოს ტერიტორიულ წყლებს 4 აპრილს დატოვებენ, იქამდე კი შენაერთისა და საქართველოს სანაპირო დაცვის ხომალდები „დიოსკურია“ და „ოჩამჩირე“ ერთობლივ წვრთნეს ჩაატარებენ. წვრთნების მიზანია საქართველოს და ნატოს საზღვაო ძალების ურთიერთმოქმედებისა და ურთიერთთავსებადობის ამაღლებას.
