ჩხოროწყუს პოლიციამ ამომრჩეველთა სავარაუდო მოსყიდვის ფატზე ორი პირი გამოკითხა
ჩხოროწყუს მუნიციპალიტეტის პოლიციის განყოფილებაში წუხელ, გვიან ღამით ინდმეწარმე ზურაბ გაბისონია მის თანმხლებ, მიკროავტობუსის მძღოლთან ერთად გამოიკითხა. STV-ს ინფორმაციით ინდმეწარმეს ჩხოროწყუს მუნიციპალიტეტის სოფელ ხაბუმეში 80 ტომარა პურის ფქვილი და ქატო გადაჰქონდა, რომელსაც ადგილობრივ მოსახლეობას ურიგებდნენ.
მოგვიანებით გაირკვა, რომ ზურაბ გაბისონია “ნაციონალური მოძრაობის” წევრია და პურის ფქვილსა და ქატოს ამომრჩევლის მოსყიდვის მიზნით არიგებდა.
STV-მ ადგილზე ჩაწერა ზემოთხსენებული ინდმეწარმე, რომელიც უარყოფს გავრცელებულ ინფორმაციას და ამბობს, რომ 15 წელია ამ საქმიანობას ეწევა.
“მე 15 წელია ამ საქმიანობას ვეწევი. მაქვს რაიონის ცენტრში საკუთარი მაღაზია და მანქანით გადამქონდა პურის ფქვილი და ქატო თანასოფლელებისთვია, რომლებმაც შემიკვეთეს პროდუქცია. მოსყიდვის მიზნით არ გამიკეთებია. პურის ფქვილი და ქატო მივიტანე 18 ოჯახში და მათ შესაბამისად გადამიხადეს ამის საფასური წინასწარ”-აცხადებს ზურაბ გაბისონია.
გაბისონიასგან განსხვავებით ტელეკამერებს ემალებოდა მიკროავტობუსის მძღოლი, რომელმაც მედიასთან ურთიერთობა არ ისურვა.
STV-ს ინფორმაციით ამ წუთებში ჩხოროწყუს პოლიციაში იმ პირთა გამოკითხვები იწყება, რომლებსაც პურის ფქვილი და ქატო სახლში მიუტანეს.
