რა კეთდება და იგეგმება სენაკში ტურისტული მიმართულებით
დაგეგმე და გაატარე ზაფხული სენაკის მუნიციპალიტეტში…
დატკბი ნოქალაქევის ციხე-გოჯის უნიკალური სანახებით, სილამაზით გამორჩეული ქალაქის ხედებით – შხეფის ციხიდან თუ განახლებული ასსაფეხურიანი კიბიდან, ისიამოვნე სათავგადასავლო და დასასვენებელი ატრაქციებით – ბეთლემში, დატკბი უნიკალური ბუნებით, აღმოაჩინე და შეისწავლე ისტორიული ადგილები…
სენაკის მუნიციპალიტეტში, ბოლო წლების მანძილზე, ტურისტული ინფრასტრუქტურის განვითარების კუთხით, უპრეცენდენტო მასშტაბის პროექტები განხორციელდა, მიმდინარეობს და იგეგმება, რაც ტურისტული მიზიდულობის კუთხით, თვისობრივად ახალ შესაძლებლობებს ქმნის.
გრძელდება კულტურული მემკვიდრეობის მსოფლიო მნიშვნელობის ძეგლის, ნოქალაქევის არქეოლოგიური კომპლექსის სრული რეაბილიტაცია.
რეაბილიტაციისა და კონსერვაციის სამუშაოებმა ნაქალაქარის ყველა სეგმენტი მოიცვა.
პროექტის ფარგლებში, მიმდინარეობს ახალი სამუზეუმო სივრცის მოწყობა, სადაც, ექსპოზიციის სახით, ნოქალაქევის ტერიტორიაზე აღმოჩენილი არტეფაქტები გამოიფინება.
ახალ მუზეუმშივე განთავსდება თანამედროვე ტექნოლოგიებით აღჭურვილი ქიმიურ-სარესტავრაციო ლაბორატორია, რომელიც დასავლეთ საქართველოში მდებარე კულტურული მემკვიდრეობის ძეგლებზე მიმდინარე არქეოლოგიურ მისიებს მოემსახურება.
2020 წლის ბოლოს, ნოქალაქევის მუზეუმ-ნაკრძალის მიმდებარედ, განხორციელდა პარკინგისა და ასფალტირების სამუშაოები. შედეგად, განახლებული ინფრასტრუქტურითა და კეთილმოწყობილი პარკინგით, მუნიციპალიტეტს კიდევ ერთი მრავალფუნქციური სივრცე შეემატა.
2020 წელს, ლეძაძამეს ადმინისტრაციული ერთეულის სოფელ ბეთლემში, პროექტის ,,სენაკის ეკონომიკური განვითარება ტურიზმის ხელშეწყობის გზით’’ ფარგლებში, ახალი ტურისტული მიზიდულობის ცენტრი მოეწყო.
ყველა მსურველს ეძლევა შესაძლებლობა, გაერთოს სათავგადასავლო და დასასვენებელი ატრაქციებით: „თოკების პარკით”; 130 მეტრი სიგრძის ზიპლაინით;
აქვეა ღია ბაზრობა – ადგილობრივი მეწარმეებისთვის პროდუქციის გაყიდვა-პოპულარიზაციის ხელშეწყობისთვის; პარკირება/ავტოკემპინგის ზონა; ფრინველებზე დაკვირვების პლატფორმა.
ნოქალაქევის არქეოლოგიურ მუზეუმ-ნაკრძალს, 2020 წელს, ვიზიტორების მომსახურეობისთვის ახალი სერვისი შეემატა. სამუზეუმო სივრცის ვიზიტორებს ელექტრო ტრანსპორტი მოემსახურება. ელეტრო ტრანსპორტი მუზეუმ-ნაკრძალის დამატებითი ატრაქცია იქნება და ტურისტებს ტერიტორიაზე კომფორტულ გადაადგილებაში დაეხმარება.
ტურისტული თვალსაზრისით კიდევ ერთი მასშტაბური პროექტია სახოკიას ქუჩიდან ისტორიულ-კულტურული მნიშვნელობის ძეგლის – შხეფის ციხემდე მისასვლელი გზის კაპიტალური რეაბილიტაცია.
ათეული წლების შემდეგ, პირველად, გაჩნდა განსაკუთრებული მდებარეობითა და არქიტექტურით გამორჩეული ძეგლის კომფორტული დალაშქვრის შესაძლებლობა. ამ ადგილიდან შთამბეჭდავი პანორამა იშლება – ჰორიზონტი, ქალაქის ულამაზესი ხედებით… პროექტის ფარგლებში, არსებულ მოედანზე ასევე მოეწყო ასფალტო-ბეტონის საფარი. აქვე იგეგმება გარე განათების ქსელის მოწყობა.
ბალნეოლოგიურ კურორტ მენჯის სამომავლო აღდგენა-განვითარების თვალსაზრისით, ხაზგასასმელია მენჯი-სახარბედიოს დამაკავშირებელი გზის ასფალტირების მასშტაბური პროექტი, რომელიც სამი ათეული წლის შემდეგ, პირველად, მიმდინარე წელს განხორციელდა.
ძველი სენაკის ადმინისტრაციული ერთეულის საჩიქობავოს უბანში, დიდი ქართველი ენათმეცნიერის, არნოლდ ჩიქობავას სახლ-მუზეუმამდე მისასვლელ გზაზე ბეტონის საფარი მოეწყო.
სენაკის მუნიციპალიტეტის მერია ასევე გეგმავს არნოლდ ჩიქობავას სახლ-მუზეუმისთვის ოდის შეძენას, სადაც ახალი სამუზეუმო სივრცე მოეწყობა.
უახლოეს დღეებში ასევე დაიწყება ტურიზმის განვითარების ხელშემწყობი შემდეგი მნიშვნელოვანი სამუშაოები:
ეკის ადმინისტრაციულ ერთეულში, იოანე ნათლისმცემლის სახელობის კომპლექსისკენ მიმავალი გზის რეაბილიტაცია;
საკირეს მთაზე არსებულ ჯვართან მისასვლელი გზის რეაბილიტაცია. ასევე აქვე, პარკინგისა და განათების სისტემის მოწყობა LED სანათებით;
მენჯი-სახარბედიოს დამაკავშირებელ გზაზე, LED ნათურებით, განათების ქსელის მოწყობა.
ეს და სხვა პროექტები, ლევან კუპრეიშვილის მერობის პერიოდში, მისი უშუალო ინიციატივითა და ძალისხმევით განხორციელდა.
