სენაკში, პროექტის -„ვიზრუნოთ ჩვენს უფროს თაობაზე“ პრეზენტაცია გაიმართა
პრეზენტაციას სენაკის მუნიციპალიტეტის მერი ლევან კუპრეიშვილი, პირველი მოადგილე გრიგოლ ბაღათურია, მოადგილე კახაბერ კუპრეიშვილი, შეზღუდული შესაძლებლობების მქონე პირთა ინტეგრაციისა და განვითარების ასოციაცია ,,ჰანგის“, მერიის ჯანმრთელობისა და სოციალური დაცვის, ადმინისტრაციული სამსახურების წარმომადგენლები და ოჯახის ექიმები ესწრებოდნენ.
პროექტის მიზანია მარტოხელა და მარტო მცხოვრები ხანდაზმულებისთვის უსაფრთხო და ღირსეული პირობების შექმნა, მულტიდისციპლინარული მობილური ჯგუფის მიერ მათთვის შინმოვლის (შინ მომსახურების) სერვისის მიწოდება. აღნიშნული პროგრამის თანადაფინანსებისთვის, სენაკის მუნიციპალიტეტის მერიამ 15 000 ლარი გამოყო.
პროექტის ფარგლებში, კრიტერიუმების შემუშავების შედეგად, შეირჩა 20 ბენეფიციარი, რომელთა მომსახურეობა საყოფაცხოვრებო და ჰიგიენური პირობების გაუმჯობესების, საკონსულტაციო, სოციალური და ფსიქოლოგიური მხარდაჭერის კომპლექსს მოიცავს. სოციალური პროექტი – „ვიზრუნოთ უფროს თაობაზე“, ხორციელდება შშმ პირთა ინტეგრაციისა და განვითარების ასოციაცია „ჰანგისა“ და სენაკის მუნიციპალიტეტის მერიის მიერ, ევროკავშირის ფინანსური მხარდაჭერით, „საქართველოს არბითერ სამარიტერ ბუნდი“ (ASB) გრანტის ფარგლებში.
პროექტის დასრულების შემდეგ, 2022 წლიდან, მუნიციპალიტეტის მერია იღებს ვალდებულებას, ბენეფიციართათვის გააგრძელოს აღნიშნული სერვისის მიწოდება.
