პრემიერი: განსაკუთრებულად დავინტერესდები იმ ფაქტებით, რომელიც დაკავშირებულია ჟურნალისტების დაზიანებასთან – არცერთი კანონდარღვევა არ უნდა დარჩეს რეაგირების გარეშე
„ყველაფერი არის იმ ძალადობის შედეგი, რომელიც გუშინ ვიხილეთ – არცერთი კანონდარღვევა არ უნდა დარჩეს რეაგირების გარეშე. განსაკუთრებულად დავინტერესდები იმ ფაქტებით, რომელიც დაკავშირებულია ჟურნალისტების დაზიანებასთან“, – ამის შესახებ პრემიერმა, ირაკლი კობახიძემ გუშინ საპროტესტო აქციის დროს მედიასაშუალებების წარმომადგენლების დაშავებასთან დაკავშირებით დასმული კითხვის საპასუხოდ განაცხადა.
მისივე თქმით, გუშინ მაქსიმალურად პროპორციულობის დაცვით მოქმედებდა სამართალდამცავი უწყება, თუ სადმე გადაცდომა იყო, ამაზე საჭირო იქნება რეაგირება.
„ძალიან სამწუხაროა. ეს ყველაფერი არის იმ ძალადობის შედეგი, რომელიც გუშინ ვიხილეთ. სისტემური, წინასწარ ორგანიზებული, დაგეგმილი ძალადობა იყო. იყვნენ ძალადობრივი დაჯგუფებები. რა თქმა უნდა, სამწუხაროდ, შეკრების დაშლის დროს დაშავდნენ მშვიდობიანი მომიტინგეები, მათ შორის კიდევ უფრო სამწუხაროა, რომ დაზიანდნენ ჟურნალისტები.
ჩემი მოწოდებაა ყველა სამართალდამცავის მიმართ, რომ მაქსიმალურად გაუფრთხილდნენ თითოეულ მოქალაქეს, განსაკუთრებით მედიის წარმომადგენლებს. გუშინ მაქსიმალურად პროპორციულობის დაცვით მოქმედებდა სამართალდამცავი უწყება. თუ სადმე გადაცდომა იყო, ამაზე საჭირო იქნება რეაგირება. როდესაც არის ამ მასშტაბის ძალადობა, ბუნებრივია მაღალი რისკი, რომ მშვიდობიანი მოქალაქეები დაზიანდნენ, მათ შორის ჟურნალისტები. სამწუხაროა, სამომავლოდ ყველაფერი უნდა გაკეთდეს, რომ ნებისმიერი ასეთი ფაქტი გამოირიცხოს. თუმცა, სისტემური, მასშტაბური ძალადობის დროს პირობებში რთულია ასეთი ფაქტების სრულად არიდება.
ნებისმიერი სამართალდარღვევა, მათ შორის, განსაკუთრებით თუ სამართალდარღვევა იქნა ჩადენილი ჟურნალისტის მიმართ, სათანადოდ უნდა იყოს გამოძიებული. არცერთი კანონდარღვევა არ უნდა დარჩეს რეაგირების გარეშე. განსაკუთრებულად დავინტერესდები იმ ფაქტებით, რომელიც დაკავშირებულია ჟურნალისტების დაზიანებასთან“, – აღნიშნა პრემიერმა.
მსგავსი სიახლეები
„ნაცმოძრაობის“ რეჟიმის მიერ ნაწამები ლაშა არქანია: კოხტა კოდუამ საკუთარ დედაზე დაიგინა, რომ ხელკეტით გამაუპატიურებდა იმ შემთხვევაში, თუ ცრუ ბრალდებას ხელს არ მოვაწერდი – იძულებული გავხდი, ხელი მომეწერა ბრალზე, რომელიც არ ჩამიდენია
პრემიერი: “არცერთი მშენებლობა საქართველოში არ გაჩერდება”
