სენაკში, 8 ახალი ბაღი აშენდება და 12 არსებული ბაღი – რეაბილიტირდება
საქართველოს პრემიერ-მინისტრის ინიციატივით, ახალი პროგრამა იწყება, რომელიც ქვეყნის მასშტაბით, 885 საბავშვო ბაღის მშენებლობა-რეაბილიტაციას ითვალისწინებს.
ახალი პროგრამის ფარგლებში, სენაკის მუნიციპალიტეტში 8 ახალი საბავშვო ბაღი აშენდება და რეაბილიტაცია ჩაუტარდება 12 არსებულ საბავშვო და ბაგა-ბაღს.
ბაღების მშენებლობა-რეაბილიტაციის პროგრამა რამდენიმე ეტაპად განხორციელდება.
პირველ ეტაპზე აშენდება თანამედროვე სტანდარტების შესაბამისი 4 ახალი საბავშვო ბაღი – ფოცხოს, ლეძაძამეს, უშაფათის და ძველი სენაკის ადმინისტრაციულ ერთეულებში;
რეაბილიტირდება – ქალაქის პირველი, მეორე, მეექვსე ბაგა-ბაღები, მესამე და ნოსირის საბავშვო ბაღები.
მეორე ეტაპზე – აშენდება ძველი სენაკის მეორე და სენაკის პირველი საბავშვო ბაღების ახალი კორპუსები;
რეაბილიტირდება – კოტიანეთის, თეკლათის, ზანის, ახალსოფლის, ფოცხოს პირველი და ნოქალაქევის საბავშვო ბაღები.
მესამე ეტაპი მოიცავს სკოლამდელი აღზრდის ორი დაწესებულების – მენჯის და ხორშის საბავშვო ბაღების მშენებლობას.
ახალი პროგრამის ფარგლებში, საბავშვო ბაღები თანამედროვე სტანდარტების შესაბამისად აშენდება და რეაბილიტირდება. მოეწყობა ბაღების შიდა და გარე სივრცეები, რეკრეაციული ზონები, კომუნიკაციები და სველი წერტილები. ბაღები სრულად იქნება ადაპტირებული განსაკუთრებული საჭიროებების მქონე პირთათვის.
