ჯუმბერ იზორია: დეზინფორმაციაა, თითქოს მონუმენტი მუნიციპალურ მიწაზე დგას – ის ჩემს საკუთრებაში არსებულ ტერიტორიაზე განვათავსე
ჩხოროწყუს საკრებულოს წევრი ჯუმბერ იზორია, ოპოზიციური მედიის მიერ მის მიმართ წარმოებულ კამპანიას დეზინფორმაციად აფასებს და განცხადებას ავრცელებს.
პარლამენტის ყოფილი დეპუტატის და „ქართული ოცნების“ წევრის განმარტებით, ოპოზიციური მედია ავრცელებს ცრუ ინფორმაციას, თითქოს მონუმენტი, რომელიც მისი სურვილით, მისსავე კერძო საკუთრების ტერიტორიაზე განათავსა – მდებარეობს მუნიციპალიტეტის განკარგვაში არსებულ მიწაზე. იზორიას განცხადებით, მონუმენტი არა მუნიციპალიტეტის არამედ მის საკუთრებაში არსებულ მიწის ნაკვეთზეა განთავსებული.
„დეზინფორმაციის გავრცელება არ წყდება! მიზანმიმართულად სხვადასხვა ოპოზიციური მედია ავრცელებს ცრუ ინფორმაციას, თითქოს მონუმენტი, რომელიც ჩემი სურვილით, ჩემსავე კერძო საკუთრების ტერიტორიაზე განვათავსე – მდებარეობს მუნიციპალიტეტის განკარგვაში არსებულ მიწაზე. ამ სიცრუის გავრცელებას რეალურად სხვადასხვა მიზეზები აქვს და ამით ცდილობენ ჩემს წარმოჩენას გავლენების მქონე უარყოფით ფიგურად. რეალურად კი მონუმენტი, რომელიც ჩემი ცხოვრების კრედოს მთავარ სიტყვებს წარმოაჩენს დგას არა მუნიციპალიტეტის მიწაზე არამედ ჩემს კერძო საკუთრებაში. მთელი ჩემი ცხოვრება სწორედ იმ სიტყვებით გავატარე რაც უკვე მთელმა საქართველომ იცის, ჩემი ცხოვრების უმთავრესი მიზანი ვაჟკაცურად ცხოვრება, ჩემს ქვეყანაზე და ჩემს ჩხოროწყუზე ზრუნვაა. ადრეც, ახლაც და მომავალშიც მხოლოდ ჩემი ჩხოროწყუსა და ჩხოროწყუელებისთვის კარგის კეთების გარდა განზრახვა არ მქონია, მადლობა ჩემს ხალხს, რომ ამას ხედავს და გვერდით მიდგას. თითოეულ ცილისწამებას და გარკვეული ოპოზიციური არხების მიერ ჩემი საქმიანი რეპუტაციის შელახვის მცდელობას ჩემი ჩხოროწყუელები პასუხობენ ღირსეულად – მხვდებიან, გვერდში მიდგანან და მამხნევებენ! თქვენგან განსხვავებით, ვინც ფულის გამო ადამიანებს წირავთ და სიცრუეს ავრცელებთ აქ სხვაგვარი ხალხი ცხოვრობს – თავისუფალი, მებრძოლი და ღირსების მქონე ხალხი!“ – ნათქვამია განცხადებაში.
