ჭყონდიდის ეპარქიაში “პატრიოტთა ალიანსმა” სუფრა გაშალა
მართლმადიდებლობის ზეიმის დღესთან დაკავშირებით, მარტვილის ღვთისმშობლის მიძინების სახელობის ეკლესიაში ათონის მთიდან ჩამობრძანებული ივერიის ყოვლადწმინდა ღვთისმშობლის ხატის ზუსტი ასლი დააბრძანეს.
წმინდა ხატი ჭყონდიდის ეპარქიაში „პატრიოტთა ალიანსმა“ მხარდამჭერებთან ერთად ჩააბრძანა. დღესასწაულთან დაკავშირებით, მეუფე სტეფანე კალაიჯიშვილმა წირვა აღავლინა. წირვას სასულიერო პირები, სხვადასხვა ეპარქიის მეუფე და მრევლი დაესწრო.
წირვის დასრულების შემდეგ მეუფე სტეფანემ შეკრებილებს დღესასწაული მიულოცა და კიდევე ერთხელ ისაუბრა 8 მარტს ეპარქიის ეზოში განვითარებულ ცნობილ მოვლენებზე. მან ეს დღე როგორც „წინასწარ დაგეგმილი პროვოკაცია“ შეაფასა და განაცხადა, რომ მსგავსი ქმედება გარკვეული ჯგუფების მიერ ქართულ ეკლესიაზე თავდასხმაა.
ათონის მთიდან ჩამობრძანებული ივერიის ყოვლადწმინდა ღვთისმშობლის ხატის ზუსტი ასლი ერთი კვირის განმავლობაში ეკლესიაში დარჩება, მისი მოლოცვა ნებისმიერ მსურველს შეეძლება. ამ წუთებში, რეზიდენციის მეორე სართულზე 200-კაციანი „ტრაპეზი“ მიმდინარეობს. როგორც მედიის წარმომადგენლებს ეპარქიაში განუმარტეს მომლოცველების დიდი რაოდენობაა დღეს რეზიდენციის ეზოში იყო შეკრებილი და სწორედ ამის გამო გახდა 200-კაციანი სუფრის მოწყობა საჭირო.
