სენაკის მერიაში გამართულ სხდომაზე კორონავირუსის პრევენციული ღონისძიებები განიხილეს
14.09.2020 / 14 სექტემბერი 2020
- კორონავირუსის საპრევენციო ღონისძიებების ფარგლებში, სენაკის მუნიციპალიტეტის მერიაში სამუშაო შეხვედრა გაიმართა. სხდომას სენაკის მუნიციპალიტეტის მერი ლევან კუპრეიშვილი ხელმძღვანელობდა და მას მერის პირველი მოადგილე გრიგოლ ბაღათურია, მოადგილე კახაბერ კუპრეიშვილი, მერიის სამსახურებისა და ა(ა)იპი-ების უფროსები ესწრებოდნენ.
სხდომაზე განიხილეს კორონავირუსის გავრცელების პრევენციისთვის ერთობლივად გასატარებელი ღონისძიებები. სენაკის მუნიციპალიტეტში, მოსახლეობის უსაფრთხოების უზრუნველყოფის მიზნით, ვირუსული ინფექციის გავრცელების რისკის შესამცირებლად, ასევე სოციალურ-ეკონომიკური გამოწვევების თანმიმდევრულად და ეფექტიანად დაძლევისთვის შეიქმნება მონიტორინგის ჯგუფი.
მუნიციპალიტეტში სადეზინფექციო სამუშაოები გაგრძელდება. დეზინფექცია ჩაუტარდება მრავალბინიან კორპუსებს, აგრარულ ბაზარს, საბავშვო და ბაგა-ბაღებს, დახურულ და ღია სივრცეებს. ,,მივმართავ ჩვენს მოსახლეობას, გამოიჩინონ სიფრთხილე და მოქალაქეობრივი პასუხისმგებლობა, რათა მოსალოდნელი საფრთხე თავიდან ავიცილოთ“ – აღნიშნა ლევან კუპრეიშვილმა.
