ზუგდიდში მიმდინარე ინფრასტრუქტურული სამუშაოები დასკვნით ეტაპზეა
ზუგდიდის მუნიციპალიტეტში სხვადასხვა ინფრასტრუქტურული პროექტის განხორციელება აქტიურად მიმდინარეობს. ზუგდიდის მუნიციპალიტეტის საკრებულოს თავმჯდომარემ მამუკა წოწერიამ, ქალაქ ზუგდიდის მაჟორიტარმა საქართველოს პარლამენტში მერაბ ქვარაიამ, მერის მოადგილემ კონსტანტინე კაკავამ, საკრებულოს წევრებმა ირაკლი ლაგვილავამ და დავით გახარიამ მიმდინარე სამუშაოები დაათვალიერეს.
დასკვნით ეტაპზეა ჩიქოვანის ქუჩაზე 3-ოთახიანი სოციალური სახლის მშენებლობა. მუნიციპალიტეტის მასშტაბით სულ 26 სახლი შენდება.
სრულდება ლომთათიძის ქუჩაზე სსიპ საგანგებო სიტუაციების კოორდინაციისა და გადაუდებელი დახმარების ცენტრის მშენებლობაც, რომელიც შვიდ ბრიგადაზეა გათვლილი და მისი ღირებულება 505 477 ლარია.
2020 წელს 125 აღსაზრდელს მიიღებს ბერიას ქუჩაზე მშენებარე N2 საბავშვო ბაღი. პროექტის ღირებულება 1 167 999 ლარია. საბავშვო ბაღი შეზღუდული შესაძლებლობების მქონე პირებისთვისაც ადაპტირებული იქნება და 5 ჯგუფი იფუნქციონირებს.
პროექტები საქართველოს რეგიონებში განსახორციელებელი პროექტების ფონდის და ზუგდიდის მუნიციპალიტეტის მერიის თანადაფინანსებით ხორციელდება.
