აფხაზური ქორწილისთვის თხები ზუგდიდში შეწვეს
ოკუპირებულ აფხაზეთის, ოჩამჩირის რაიონ სოფელ კვიტოულში გამართული ქორწილისთვის დაუნაწევრებელი 40 თხა ზუგდიდში, აღმაშენებლის ქუჩაზე მდებარე თონეში შეწვეს. თონის მეპატრონე ირაკლი ქარდავა მედიასთან კომენტარს არ აკეთებს, თუმცა არსებული ინფორმაციით, ერთი თხის შეწვა 35 ლარი დაჯდა, ჯამში კი მომსახურეობამ 1 400 ლარი შეადგინა.
ქორწილი 19 ოქტომბერს გაიმართა,რომელსაც 1200 სტუმარი ესწრებოდა და 14.000 დოლარი დაჯდა. სუფრაზე მისულ სტუმრებს დაუნაწევრებელი თხები დახვდათ. აღნიშნული ფაქტი ეთნიკურად აფხაზმა ახალგაზრდა ბლოგერმა ბესლან ხვარწკიამ Facebook -ში, პირად გვერდზე გააქილიკა და “ვაცის ქორწილი” (козлосвадьба) უწოდა, რაც შემდეგ სისხლიანი დაპირისპირების მიზეზი გახდა. მას უცნობმა პირებმა სცემეს.
ანიშნულ ქორწილს კიდევ ერთი სკანდალი უკავშირდება. სტუმრებმა სავარაუდოდ, წითელ წიგნში შესული ცხოველები ჭამეს. რუსული მედიის ინფორმაციით, დაუნაწევრებლად შემწვარი თხები, რომლითაც ქორწილი იყო გაფორმებული, კავკასიური თხა ტურია.
სააგენტოები წერენ, რომ ეს ინფორმაცია დაადასტურა დე ფაქტო აფხაზეთის სახელმწიფო კომიტეტის წარმომადგენელმა ბუნების დაცვის საკითხებში, საველი ჭითანავამ. ჩიტანავაც და ქორწილის მასპინძელიც ამტკიცებენ, რომ ეს ცხოველები აფხაზეთში არ მოუკლავთ.
ჭითანავას თქმით, ამის გამო ოჯახს ვერ დასჯიან. ის აღნიშნავს, რომ დე ფაქტო აფხაზეთს თავისი წითელი წიგნი არ აქვს, ეს ცხოველი კი რუსულ ნუსხაშია შესული.
