სენაკში, სოფლად დასაფინანსებელი პროექტების მოცულობა გაორმაგდა
,,სოფლის მხარდაჭერის პროგრამის“ ფარგლებში, საქართველოს მთავრობის გადაწყვეტილებით, დამატებით გამოყოფილი თანხით დასაფინანსებელი პროექტების შერჩევასთან დაკავშირებით, მოსახლეობასთან საერთო კრებების/კონსულტაციების მეორე ეტაპი დაიწყო.
დღეს შეხვედრები სენაკის მუნიციპალიტეტის თეკლათის, ჭალადიდის, ახალსოფლის, ნოსირის, გეჯეთის ადმინისტრაციულ ერთეულებში გაიმართა. საერთო კრებებს/კონსულტაციებს სენაკის მუნიციპალიტეტის მერი ლევან კუპრეიშვილი, მერის პირველი მოადგილე გრიგოლ ბაღათურია, მერის მოადგილე კახაბერ კუპრეიშვილი, საკრებულოსა და მერიის შესაბამისი სამსახურების წარმომადგენლები ესწრებოდნენ.
ადმინისტრაციულ ერთეულებში, მოსახლეობასთან კონსულტაციების შედეგად, დამატებით შეირჩა პრიორიტეტები და გაორმაგდა განსახორციელებელი პროექტების მოცულობა, რაც ადგილობრივი მაცხოვრებლებისთვის განსაკუთრებით მნიშვნელოვანია.
სოფლის მხარდაჭერის პროგრამით გათვალისწინებული საერთო კრებები, 1 მარტის ჩათვლით, მუნიციპალიტეტის ყველა ადმინისტრაციულ ერთეულში გაიმართება.
