ფოთში, კუნძულის უბნის სანაპირო ზოლის პროექტის საჯარო განხილვა გაიმართა
ქალაქ ფოთში კუნძულის უბნის სანაპირო ზოლის რეაბილიტაცია იგეგმება. ნიკო ნიკოლაძის სახელობის სხდომათა დარბაზში საპროექტო წინადადებების საჯარო განხილვა უკვე მეორედ შედგა.
კუნძულის სანაპირო ზოლისა და მისასვლელი გზების რეაბილიტაციის საპროექტო წინადადებების განხილვას ქალაქ ფოთის მუნიციპალიტეტის მერის მოადგილეები, საკრებულოს წევრები, ადგილობრივი ხელისუფლების წარმომადგენლები და მოქალაქეები დაესწრნენ.
პროექტით, რომლის ღირებულება 3 მილიონი ლარი იქნება, 2000 მეტრამდე სანაპირო ზოლზე საფეხმავლო და საავტომობილო გზების, ჯებირების, სავარჯიშო და სათამაშო ზონების, ველობილიკის, ვეტერანთა სახლის, ჩოგბურთის კორტების, საჩრდილობლების, სასმელი წყლის შადრევნების, ავტოსადგომისა და სხვა ობიექტების მოწყობა და სარეაბილიტაციო სამუშაოები იქნება გათვალისწინებული.
ადგილობრივი ხელისუფლების მხრიდან გამოთქმული იქნა შენიშვნები და მოსაზრებები, რომელიც მოსახლეობის ინტერესებთან შეჯერებით , პროექტზე მომუშავე კომპანიის მხრიდან პროექტის დამტკიცებამდე უნდა იქნას გათვალისწინებული.
