სოფელ ცაიშის ბალნეოლოგიური კურორტით ბიზნესმენი ზურაბ კვირკვია დაინტერესდა
ზუგდიდის მუნიციპალიტეტის სოფელ ცაიშში თერმული წყლების ბალნეოლოგიურ კურორტს შესაძლოა ახალი მეპატრონე გამოუჩნდეს. როგორც ახალი ამბების სააგენტო stv news-მა გაარკვია ბალნეოლოგიური კურორტის აბაზანებით, რუსეთში მოღვაწე ბიზნესმენი ზურაბ კვირკვიაა.
ჩვენთვის ექსკლუზიურად გახდა ცნობილი, რომ აღნიშნულმა ბიზნესმენმა აბაზანების ტერიტორია ადგილობრივ ხელისუფლებასთან ერთად გასულ კვირას დაათვალიერა. ზურაბ კვირკვიას სოფელ ცაიშში თან ახლდნენ სამეგრელო-ზემო სვანეთის გუბერნატორის პირველი მოადგილე ირაკლი ჯიქია, ზუგდიდის მერის მოადგილე გიორგი შენგელია და ზუგდიდის საკრებულოს თავმჯდომარის მოადგილე ბესიკ ჭეჟია.
STV-მ ინფორმაცია მერის მოადგილესთან, გიორგი შენგელიასთან გადაამოწმა, რომელმაც სააგენტოს ხელთ არსებული ინფორმაცია დაუდასტურა.
“დიახ ჩვენ ვახლდით ბატონ ზურაბ კვირკვიას, რომელმაც სურვილი გამოთვა იყიდეს აღნიშნული ტერიტორია და აღადგინოს საკურორტო აბაზანები იმ ფორმით, რა ფორმითაც ის არსებობდა მანამდე. ასევე უნდა აღინიშნას ისიც, რომ თერმული წყლების ლიცენზიის მფლობელი სწორედ აღნიშნული ბიზნესმენი გახლავთ. ჯერ მხოლოდ სურვილი აქვს ბიზნესმენს აბაზანების შეძენის, თუმცა გადაწყვეტილი არაფერია. ეს იმაზე იიქნება დამოკიდებული, თუ რა პირობებს შესთავაზებს ეკონომიკის სამინისტრო ბიზნესმენს. მოგეხსენებათ, რომ ტერიტორია ეკონომიკის სამინისტროს კუთვნილებაა”-აღნიშნა ზუგდიდის მერის მოადგილემ გიორგი შენგელიამ.
შენგელიას განცხადებით, ბიზნესმენი ზურაბ კვირკვია მხოლოდ აბაზანებით არის დაინტერესებული. შეთანხმების შემთხვევაში კი ის ადგილობრივების დასაქმებას უზრუნველყოფს.
STV აღნიშნულთან დაკავშირებით ბიზნესმენ ზურაბ კვირკკვიასთან დაკავშირება სცადა, თუმცა კვირკვიან ახალი ამბების სააგენტოს სატელეფონო ზარებს არ უპასუხა.
ცნობისათვის, ზუგდიდის მუნიციპალიტეტის სოფელ ცაიშში თერმული წყლების ბალნეოლოგიურმა კურორტმა ფუნქციონირება 1964 წელს დაიწყო. 1985 წელს კი კურორტმა მუშაობა ოფიციალურად შეწყვიტა. მიზეზად სარესტავრაციო სამუშაოები სახელდებოდა, თუმცა ამაოდ. განახლებული კურორტის მშენებლობა 1991 წელს საბოლოოდ შეწყდა.
1992 წელს განახლებული 18 ჭაბურღილიდან სოფელ ცაიშში ნახევარზე მეტი მაღალპროდუქტიულია. სამი ჭაბურღილი, რომელიც ე.წ სააბაზანოს ტერიტორიაზე მდებარეობს, სამკურნალო მნიშვნელობისაა.
