ოკუპირებულ აფხაზეთში ღორის გრიპის სამი შემთხვევა დაფიქსირდა
აფხაზეთის ე.წ რესპუბლიკურ საავადმყოფოში ღორის გრიპის შემთხვევები დაფიქსირდა. ამის შესახებ აფხაზეთის ტელევიზიას ამავე საავადმყოფოს მთავარმა თერაპევტმა ანჟელა არჩელიამ განუცხადა.
“საშიში ღორის გრიპთან მიმართებაში არაფერია. საშიში დაავადება მაშინ ხდება, როცა მივმართავთ თვითნებურ მკურნალობას. ჩვენთან განყოფილებაში უკვე დადასტურებულია H1N1-ის სამი შემთხვევა, თუმცა პაციენტების მდგომარეობა ამ დროისთვის სტაბილურია. მათ სიცოცხლეს საფრთხე არ ემუქრება”,-აცხადებს რესპუბლიკური საავადმყოფოს მთავარი თერაპევტი ანჟელა არჩელია.
რაც შეეხება საერთო მდგომარეობას, განსაკუთრებული მომართვიანობით აფხაზეთის ბავშვთა საავადმყოფო გამოირჩევა. საავადმყოფოს მთავარი ექიმის, იგორ ჯოპუას განცხადებით, მათთან ჰოსპიტალიზებულია პაციენტები, რომლებიც უჩივიან მწვავე რესპერატორულ ინფექციას, აღენიშნებათ სხეულის მაღალი ტემპერატურა და აქვთ ხველება.
ჯოპუას განცხადებით, ჯერჯერობით აღნიშნულ ასაკში ღორის გრიპი არ დადასტურებულა.
ცნობისათვის, ენგურის ცენტრალური ხიდი 11 იანვარს აფხაზურმა მხარემ ცალმხრივად ჩაკეტა. დეფაქტო მთავრობა ე.წ. საზღვრის ჩაკეტვა H1N1 ვირუსის გავრცელების საშიშროებიდან გამომდინარე მიიღო.
დეფაქტო მთავარმა სანიტარულმა ექიმმა ლუდმილა სკორიკიმ კი განაცხადა, რომ აფხაზეთში H1N1 ვირუსით დაავადების შემთხვევა არ გამოვლენილა.
