ჩხოროწყუს საკრებულოს წევრი ქართული ოცნებიდნა ჯუმბერ იზორია „ლელოს“ ლიდერის მამუკა ხაზარაძის განცხადებას ეხმაურება:

„მინდა გამოვეხმაურო ტელეკომპანია პირველის გადაცემა რეაქციაში პარტია ლელოს ერთერთი ლიდერის – მამუკა ხაზარაძის განცხადებას, სადაც ის გადაცემის წამყვანთან ერთად საუბრობს 2025 წლის თვითმმართველობის არჩევნებში მონაწილეობაზე. საუბრისას მამუკა ხაზარაძე აღნიშნავს, რომ მას არ აინტერესებს ჩხოროწყუში მიმდინარე პროცესები და ჩხოროწყუელების ინტერესები, მათ შორის არც ის ადამიანები, ვინც სამწუხაროდ მხარი დაუჭირა მის პარტიას.

„პარლამენტიდან გამოვედით და ეხლა ჩხოროწყუს ის არ გჭირდება?!“

რა „ის“ ბატონო მამუკა. ჩემთვის არ არის სიახლე ის, რომ თქვენ ჩხოროწყუ და ჩხოროწყუელების ინტერესები არ გაღელვებთ, მე კი ბედნიერი ვარ, რომ მთელი ცხოვრება ჩხოროწყუს სიყვარულს და ჩხოროწყუელებს მივუძღვენი.

ვიყავი მე-9 მოწვევის პარლამენტის წევრი, ამჟამად ჩხოროწყუს საკრებულოს წევრი და ვამაყობ ჩემი ნაბიჯებით. არცერთი წამით არ მიფიქრია, რომ უფრო დიდი თანამდებობა იყო პარლამენტის წევრობა საკრებულოს წევრობასთან მიმართებაში, განსხავებით თქვენგან, რაც თქვენი გამონათქვამებიდან ჩანს, რომ არ გაინტერესებთ ჩხოროწყუ და მსგავსი ქალაქები.

მე, როცა სამშობლოს იარაღით ხელში ვიცავდი აფხაზეთში, სამაჩაბლოსა და 2008 წლის აგვისტოს ომში, თქვენ თქვენი საქმიანობით საცხოვრებელი სახლისა და ლუკმა პურის გარეშე ტოვებდით ჩვენს მოქალაქეებს. გვახსოვს თქვენი საჩივარი საქართველოს წინააღმდეგ, სადაც მოსახლეობის ამონაკრები თანხიდან სახელმწიფოს სთხოვდით მილიარდზე მეტ თანხას. თუმცა ფრანგულმა საარბიტრაჟო სასამართლომ 650 ათასი დოლარი დაგაკისრათ მოსახლეობის სასარგებლოდ.

დარწმუნებული ვარ, ჩხოროწყუელი და ქართული საზოგადოება საკადრის პასუხს გაგცემთ არჩევნებზე.

მინდა მივმართო ჩემს ძვირფას ჩხოროწყუელებს. ყოველთვის ვიყავი, ვარ და ვიქნები ჩემი ჩხოროწყუელების რიგითი დამცველი. არავის მივცემ იმის უფლებას, რომ ჩვენი საამაყო ჩხოროწყუ და ჩხოროწყუელები, დამამცირებელ კონტექსტში მოიხსენიოს.

თქვენი განცხადება ჩხოროწყუელებისთვის არის დამამცირებელი და გირჩევდით მათ წინაშე ბოდიშის მოხდას“ – წერს ჯუმბერ იზორია