გუბერნატორმა მარტვილის ახალი მერი თანამშრომლებს წარუდგინა
მარტვილის მუნიციპალიტეტის ახლადარჩეული მერი გიორგი ნაჭყებია უფლებამოსილების განხორციელებას შეუდგა. ახალი მერი მუნიციპალიტეტის მერიის თანამშრომლებს და სტრუქტურული ერთეულების ხელმძღვანელებს სამეგრელო-ზემო სვანეთში სახელმწიფო რწმუნებულმა წარუდგინა.
დავით ვერავამ გიორგი ნაჭყებიას წარმატებები უსურვა და ყოფილ მერს თორნიკე ჯანაშიას გაწეული საქმიანობისთვის მადლობა გადაუხადა.
,,ის დიდი ნდობა, რაც მოსახლეობამ გამოუცხადა მარტვილის ახალ მერს, არის დიდი პასუხისმგებლობა ჩვენი გუნდისთვის. დარწმუნებული ვარ, გიორგი გაამართლებს მოსახლეობის ნდობას. ჩვენ ძალიან ბევრი კარგი საქმე გვაქვს საკეთებელი. გიორგი აქვს პირადად ჩემი და ცენტრალური ხელისუფლების დიდი მხარდაჭერა. ჩვენ გვჭირდება საკითხების დროულად გადაწყვეტა, ხალხის კეთილსინდისიერი, დაუღალავი მსახურება. ერთობლივად შევძლებთ, მარტვილისთვის და აქ მცხოვრები თითოეული მოქალაქის უკეთესი მომავლისთვის ბევრი საჭიროების მოგვარებას”, – აღნიშნა სახელმწიფო რწმუნებულმა.
შეხვედრაზე გიორგი ნაჭყებიამ ყოფილ მერს თორნიკე ჯანაშიას და მერიის თანამშრომლებს გაწეული საქმიანობისათვის მადლობა გადაუხადა. მისი განცხადებით, ცენტრალური ხელისუფლების, სახელმწიფო რწმუნებულის ადმინისტრაციის და მუნიციპალიტეტის გუნდის ერთობლივი ძალისხმევით, მარტვილის მუნიციპალიტეტისთვის მომავალი ოთხი წელი ნაყოფიერი და წარმატებული იქნება.
