ქალაქ ფოთისა და მიმდებარე სოფლების წყალმომარაგების სისტემის სარეაბილიტაციო სამუშაოები მიმდინარეობს
საქართველოს ინფრასტრუქტურის სამინისტროს გაერთიანებული წყალმომარაგების კომპანია ქალაქ ფოთისა და მიმდებარე სოფლების წყალმომარაგების სისტემის რეაბილიტაციას განაგრძობს.
მიმდინარე სამუშაოებს, კომპანიის დირექტორი დავით კვინიკაძე, მოადგილეებთან, ფოთის მერთან ბექა ვაჭარაძესთან და ადგილობრივი ხელისუფლების წარმომადგენლებთან ერთად ადგილზე გაეცნო.
ქალაქ ფოთისა და მიმდებარე სოფლების წყალმომარაგების სისტემის რეაბილიტაციის ფარგლებში, სრულად შეიცვლება სოფელი ნოსირიდან ცენტრალურ მაგისტრალზე არსებული დაზიანებული მონაკვეთები, რომელიც წყალმომარაგებით უზრუნველყოფს ქ ფოთის, სენაკისა და ხობის მუნიციპალიტეტებში შემავალ 17 სოფელს: ჭალადიდი, ქვემო ქვალოვანი, გოლასკური, ზემო ჭალადიდი, თეკლათი, პატარა ფოთი, საჭოჭუო, შავღელე, ახალი სოფელი, საგვიჩიო, ზემო რეკა, ქვედა რეკა, შუა ქვალონი, შუა ხორგა, ქარიატა გაღმა, ყულევი, ქარიატა გამოღმა. პროექტის დასრულება, ეტაპობრივად, 2027 წლისთვის იგეგმება, რის შედეგადაც, ადგილობრივი მოსახლეობა თანამედროვე სტანდარტების შესაბამისი უწყვეტი წყალმომარაგებით იქნება უზრუნველყოფილი.
გაერთიანებული წყალმომარაგების კომპანიის ინფორმაციით, პროექტი ასევე ითვალისწინებს: ჭაბურღილების, სათავე ნაგებობებისა და სკადას სისტემის მოწყობას. მშენებლობა-რეაბილიტაციის სამუშაოები ჩატარდება საქლორატოროსა და სატუმბ სადგურებზეც, მნიშვნელოვნად გაიზრდება წყლის დებიტი. პარალელურ რეჟიმში, ქ. ფოთში გრძელდება წყალარინების ქსელის მოწყობის სამუშაოებიც.
კომპანიის დაკვეთით, ქალაქ ფოთში წყალმომარაგებისა და წყალარინების მშენებლობის დროს დაზიანებული საავტომობილო გზების რეაბილიტაციის სამუშაოებიც მიმდინარეობს, რაც ჯამში 17 კმ-მდე მონაკვეთზე, 10 ქუჩაზე ასფალტო-ბეტონის საფარის მოწყობის სამუშაოებს გულისხმობს.
ქალაქ ფოთის და ხობისა და სენაკის მუნიციპალიტეტების 17 სოფელში მიმდინარე პროექტებს სახელმწიფო ბიუჯეტისა და აზიის განვითარების ბანკის თანადაფინანსებით ჯამში 193 მილიონ ლარზე მეტი მოხმარდება.
მსგავსი სიახლეები
წალენჯიხაში გზისა და ქალაქ ჯვარში სასმელი წყლის სისტემების სარეაბილიტაციო სამუშაოები მიმდინარეობს
ქალაქ ჯვარის მეორე საჯარო და წყოუშის საბაზისო სკოლებში სველი წერტილებისა და პანდუსების მოწყობის სამუშაოები მიმდინარეობს
