გუბერნატორის კომპეტენციის მოლოდინში – დაზიანებული გზის პრობლემა ზუგდიდში
ზუგდიდში სავალი გზების დაზიანებით სამეგრელო-ზემო სვანეთის გუბერნატორი, ალექსანდრე მოწერელია პირველი დღიდანვე დაინტერესდა. მიზეზები ბევრია, თუმცა გამოსავალი მხოლოდ ერთი, დაუყონებლივ აღმოიფხვრას ხარვეზები.
მხარის გუბერნატორის განცხადებით, პროექტი, რომელსაც საქართველოს გაერთიანებული წყალმომარაგების კომპანია ახორციელებს, უმნიშვნელოვანესია, თუმცა არსებობს კომპანიის მიერ დაშვებული ხარვეზები, რომლის შესწავლაც დაწყებულია.
„პროექტი, რომელსაც საქართველოს გაერთიანებული წყალმომარაგების კომპანია ახორციელებს, უმნიშვნელოვანესი პროექტია, თუმცა არსებობს ხარვეზები, რომელიც კონტრაქტორი კომპანიის მიერ არის დაშვებული და ეს ხარვეზები მოკლე დროში უნდა აღმოიფხვრას. საკითხი უფრო დეტალურ შესწავლას საჭიროებს და ეს პროცესი უკვე დაწყებულია”-აცხადებს სამეგრელო-ზემო სვანეთის მხარის გუბერნატორი.
სავალი გზების მწყობრიდან გამოსვლა ადგილობრივი მოსახლეობის უკმაყოფილებას იწვევს, რაც რეგიონის პირველი პირისთვისაც პრობლემურია. მოწერელია პირადად აპირებს არსებული პრობლების მოგვარებაში საკუთარი კომპეტენციით ჩართვას.
“ჩვენ გვესმის მოსახლეობის წუხილი, რომელიც გადაადგილების დროს შექმნილი დისკომფორტით არის გამოწვეული. სწორედ ამიტომ გუბერნია, საკუთარი კომპეტენციის ფარგლებში, ინტენსიურად ჩაერთვება სამუშაო პროცესში იმისთვის, რომ სავალი გზები მოკლე დროში მოწესრიგდეს,“ – აღნიშნავს ალექსანდრე მოწერელია.
ცნობისათვის, ზუგდიდის მოსახლეობის უწყვეტი წყალმომარაგების მიზნით, მიმდინარე მასშტაბური პროექტის დასრულება 2018 წლის ბოლოს იგეგმება.
გათვალისწინებულია სათავე ნაგებობის, სატუმბი სადგურის, მაგისტრალური მილსადენის, გამანაწილებელი ქსელების მოწყობა და მოსახლეობის ინდივიდუალური გამრიცხველიანება. ამავე პროექტის ფარგლებში, მიმდინარეობს ქალაქის წყალარინების სისტემის სრული რეაბილიტაცია.
სამშენებლო-სარეაბილიტაციო სამუშაოებს საქართველოს გაერთიანებული წყალმომარაგების კომპანია საქართველოს მთავრობისა და აზიის განვითარების ბანკის ფინანსური მხარდაჭერით ახორციელებს.
