რუხის საავადმყოფოში მინისტრებმა და გუბერნატორმა ის სპაციენტები მოინახულეს ვინც ოკუპირებულ აფხაზეთში ცხოვრობნენ
ჯანდაცვის მინისტრი, შერიგებისა და სამოქალაქო თანასწორობის საკითხებში სახელმწიფო მინისტრი და სამეგრელო-ზემო სვანეთის სახელმწიფო რწმუნებული, რუხის რესპუბლიკურ საავადმყოფოში იმყოფებოდნენ. ინფორმაციას ჯანდაცვის სამინისტრო ავრცელებს.
მინისტრებმა და სახელმწიფო რწმუნებულმა მედპერსონალსა და პაციენტებს შობა-ახალი წელი მიულოცეს და მათ ჯანმრთელობის მდგომარეობას გაეცნენ. მიხეილ სარჯველაძემ, თეა ახვლედიანმა და დავით ვერავამ მათ შორის, ის პაციენტები მოინახულეს, რომლებიც დროებით ოკუპირებულ აფხაზეთში ცხოვრობენ და სამედიცინო მომსახურებას რუხის კლინიკაში იღებენ.
კლინიკაში გაიმართა პრეზენტაციაც, სადაც საავადმყოფოს მიღწევებსა და სამომავლო გეგმებზე იმსჯელეს. აღინიშნა, რომ რუხის რესპუბლიკური საავადმყოფო რეგიონში ერთ-ერთი მაღალტექნოლოგიური კლინიკაა, სადაც მუდმივად მიმდინარეობს მომსახურების ხარისხის, სერვისების განვითარებისა და სამედიცინო პერსონალის გადამზადების მიმართულებით მუშაობა. 2025 წელს კლინიკა 25 000 პაციენტს მოემსახურა, მათ შორისაა დროებით ოკუპირებული ტერიტორიებიდან გადმოსული მოსახლეობა.
ხაზი გაესვა, რომ რუხის რესპუბლიკურმა საავადმყოფომ არა მხოლოდ გაზარდა თავისი შესაძლებლობები, არამედ მოახდინა ინვესტიციები, რამაც რეგიონში სამედიცინო მომსახურების ხარისხი მკვეთრად შეცვალა.
![რა ხდება ოკუპირებულ აფხაზეთში და რას აპროტესტებს მოსახლეობა [ამბავი სრულად]](/_next/image?url=https%3A%2F%2Fapi.stv.ge%2Fuploads%2F2024%2F04%2Funnamed-1-thumb.jpg&w=3840&q=75)
