ჩხოროწყუს მერი მუზეუმის დღის კვირეულის ფარგლებში ისტორიული მუზეუმის თანამშრომლებს შეხვდა
მუზეუმის საერთაშორისო დღის კვირეულის ფარგლებში, ჩხოროწყუს მუნიციპალიტეტის მერი ჯუმბერ იზორია, მოადგილე თამარ ქობალიასთან და შესაბამისი სამსახურების წარმომადგენლებთან ერთად, მუზეუმის თანამშრომლებს შეხვდა.
მერმა თანამშრომლების საჭიროებები მოისმინა, გაეცნო მათ ყოველდღიურ საქმიანობას და დაათვალიერა მუზეუმში დაცული ისტორიული ექსპონატები. ასევე ბუნების განყოფილების სივრცეში განახლებული ფოტომასალები და სრულიად რეაბილიტირებული საკონფერენციო დარბაზი.
შეხვედრაზე ყურადღება გამახვილდა კულტურული მემკვიდრეობის დაცვისა და მომავალი თაობებისთვის მისი შენარჩუნების მნიშვნელობაზე.
ჯუმბერ იზორიამ მუზეუმის თანამშრომლებს გაწეული საქმიანობისთვის მადლობა გადაუხადა და აღნიშნა, რომ მუნიციპალიტეტი მომავალშიც გააგრძელებს კულტურის სფეროს მხარდაჭერას.
,,მუზეუმი არის ადგილი, სადაც ჩვენი ისტორია ცოცხლობს. თითოეული ექსპონატი, თითოეული ნივთი ჩვენი წინაპრების ცხოვრებას, ტრადიციებსა და წარსულს გვახსენებს.
განსაკუთრებით დასაფასებელია იმ ადამიანების შრომა, ვინც ამ ყველაფერს წლებია სიყვარულით უფრთხილდება. მინდა მადლობა გადავუხადო მუზეუმის თითოეულ თანამშრომელს იმ შრომისა და თავდადებისთვის, რასაც ყოველდღიურად აკეთებენ. ჩვენი ვალდებულებაა, ერთად ვიზრუნოთ კულტურული მემკვიდრეობის დაცვასა და განვითარებაზე“ -აღნიშნა ჩხოროწყუს მერმა ჯუმბერ იზორიამ.
