გრძელდება საინფორმაციო შეხვედრები საზაფხულო ბანაკების მონაწილეებთან

საარჩევნო ადმინისტრაცია ახალგაზრდობის სააგენტოსთან თანამშრომლობით აგრძელებს შეხვედრებს საზაფხულო ბანაკების მონაწილეებთან. საარჩევნო საკითხებზე ახალგაზრდებთან შეხვედრები ამჯერად ზუგდიდის საოლქო საარჩევნო კომისიის თავმჯდომარემ გამართა.

მირანდა მესხმა საარჩევნო პროცესში ამომრჩევლის როლისა და უფლებების, ასევე ახალგაზრდების აქტიური ჩართულობის მნიშვნელობაზე ისაუბრა. ახალგაზრდებმა მიიღეს ინფორმაცია საარჩევნო ადმინისტრაციის ინსტიტუციური მოწყობისა და არჩევნების ორგანიზების შესახებ. ზუგდიდის საოლქო საარჩევნო კომისიის თავმჯდომარემ განსაკუთრებული ყურადღება გაამახვილა ელექტრონული საარჩევნო ტექნოლოგიების უპირატესობების, მათი დანერგვის პროცესისა და საარჩევნო ადმინისტრაციის გამოცდილების შესახებ.

ზუგდიდის საოლქო საარჩევნო კომისიის თავმჯდომარემ ბანაკის მონაწილეებს საარჩევნო ადმინისტრაციის ჟურნალი „არჩევნები 360 გრადუსით“ წარუდგინა და აღნიშნა, რომ გამოცემა მკითხველს აქტუალურ საარჩევნო თემებზე მრავალმხრივ, ამომწურავ ინფორმაციას სთავაზობს.

შეხვედრების მიმდინარეობისას ახალგაზრდები აქტიურად ჩაერთნენ დისკუსიაში და მათთვის საინტერესო საკითხებზე ამომწურავი პასუხები მიიღეს.

მირანდა მესხმა ახალგაზრდებთან შეხვედრები 25 და 31 აგვისტოს გამართა. მისი მომდევნო შეხვედრა ახალგაზრდებთან 10 სექტემბერს გაიმართება.

აღსანიშნავია, რომ საზაფხულო ბანაკების პროექტის ფარგლებში საარჩევნო ადმინისტრაციის ხელმძღვანელი პირები და წარმომადგენლები საინფორმაციო შეხვედრებს ქვეყნის სხვადასხვა რეგიონში აქტიურად მართავენ.