ფოთში სტიქიის სალიკვიდაციო სამუშაოები გრძელდება. ქუჩებიდან გააქვთ ძლიერი ქარის შედეგად გადატეხილი ხეები და ტოტები, მოსახლეობას ურიგდება აზბესტის და თუნუქის ფურცელბი, საწვიმარი მილები და სხვა საჭირო მასალა.

იმ უბნებზე, სადაც სტიქიის შედეგად მიყენებული ზარალი დიდია, მობილიზებულია სამშენებლო ბრიგადები. პარალელურ რეჟიმში მუშაობს კომისია, რომელიც მიყენებულ ზარალს ითვლის.

“30 ნოემბრის სტიქიის შედეგად ფოთს მნიშვნელოვანი ზარალი მიადგა. შექმნილია სპეციალური კომისია, რომლის შემადგენლობაშიც შედის მერიის სამსახურები. დღეის მდგომარეობით აღწერილია თითქმის მთელი ქალაქი, მიმდინარეობს დარჩენილი უბნების აღწერა. დაზარალებულ მოსახლეობას ურიგდება სახლების გადასახური მასალა როგორც მთლიანი, ასევე დროებითი გადახურვისთვის.

მობილიზებული არიან მშენებლები. ისინი აღნიშნულ პრობლემებს სწავლობენ და დღის ბოლოსთვის გვეცოდინება, რა ზარალი მიაყენა ძლიერმა ქარმა ფოთის მოსახლეობას. ეს იქნება მიახლოებითი ციფრი, რომელიც ორ-სამ დღეში დაზუსტდება. მაქსიმალურად შევეცდებით, პრობლემები დროულად აღმოვფხვრათ და ზარალი ავანაზღაუროთ”,-განაცხადა ქალაქ ფოთის მუნიციპალიტეტის ვიცე-მერმა კოტე თოფურიამ.