სენაკელმა თეატრალებმა სეზონი სპექტაკლით “მაცეკვე ტანგო” დახურეს
სენაკის მუნიციპალიტეტის მოსწავლე-ახალგაზრდობისა და კულტურის ცენტრში აკაკი ხორავას სახელობის სენაკის პროფესიული სახელმწიფო დრამატული თეატრის დასი მაყურებელთა წინაშე ნინო მირზაშვილის პიესის ,,მაცეკვე ტანგო’’ მიხედვით დადგმული სპექტაკლით წარსდგა.
სპექტაკლს სენაკის მუნიციპალიტეტის მერის პირველი მოადგილე გრიგოლ ბაღათურია, მერის მოადგილე კახაბერ კუპრეიშვილი, ადგილობრივი თვითმმართველობისა და საზოგადოების წამომადგენლები დაესწრნენ.
,,მაცეკვე ტანგოს“ შეიძლება სიტუაციათა კომედია ეწოდოს, მაგრამ პიესა ბევრად უფრო მნიშვნელოვან სათქმელს შეიცავს. ადამიანთა ურთიერთობება 21-ე საუკუნის ძირითად პრობლემად იქცა და გაუცხოება ჩვენს ცხოვრებაში არა ფილოსოფიური, არამედ ყოფითი სახით შემოიჭრა. პიესაში ორი ოჯახის გზები შემთხვევითობამ გადაკვეთა და სწორედ ამ შემთხვევითობამ ორივეს ცხოვრება შეცვალა.
მსახიობებმა მაყურებელს რეჟისორ და მსახიობ კახა გოგიძესთან ერთად უამბეს იმის შესახებ, თუ რა გადახდათ თავს მათ გმირებს.
გემოვნებიანი მხატვრული კულტურითა და შესრულების მაღალი ხარისხით გამორჩეული სპექტაკლის პრემიერა მიმდინარე წლის 25 ივლისს, ქ. ფოთში, რეგიონალური თეატრების საერთაშორისო ფესტივალზე წარმატებით შედგა.
