ქართული ჟურნალისტიკის დღეს, ზუგდიდის საკრებულოს თავმჯდომარემ მამუკა წოწერიამ, სამეგრელო-ზემო სვანეთის სახელმწიფო რწმუნებულის ადმინისტრაციასთან და ზუგდიდის მერიასთან ერთად ოფიციალური მიღება გამართა და ადგილობრივ ჟურნალისტებს პროფესიული დღე მიულოცა.

“თქვენი როლი უდიდიესია ჩვენი ქვეყნის დემოკრატიული განვითარების საქმეში, მადლობა ყოველდღიური დაუღალავი მუშაობისთვის! მადლობა, რომ არ გვაძლევთ მოდუნების საშუალებას. ქართულმა ჟურნალისტიკამ ამ 200 წლიანი ისტორიით ნამდვილად შეიტანა დიდი წვლილი ჩვენი ქვეყნის ისტორიაში, მიხარია, რომ ამ დღეს თქვენთან ერთად აღვნიშნავთ!“ – განაცხადა მიღებაზე საკრებულოს თავმჯდომარემ.

საკრებულოს თავმჯდომარესთან ერთად, ჟურნალისტებს პროფესიული დღე სამეგრელო-ზემო სვანეთის სახელმწიფო რწმუნებულის მოადგილემ კობა ქანთარიამ, ზუგდიდის მუნიციპალიტეტის მერის მოვალეობის შემსრულებელმა მაიზერ ნანავამ და მისმა პირველმა მოადგილემ გიორგი შენგელიამ მიულოცეს.

ქართული ჟურნალისტიკის დღე 1993 წლიდან აღინიშნება. ეს დღე 1993 წელს საქართველოს ჟურნალისტთა ფედერაციამ და ივანე ჯავახიშვილის სახელობის თბილისის სახელმწიფო უნივერსიტეტმა 21 მარტს ერთობლივად დააწესეს.

თარიღს სიმბოლური დატვირთვა აქვს. პირველი ქართული გაზეთი „საქართველოს გაზეთი” სწორედ ამ დღეს დაარსდა. გაზეთის პირველი ნომერი 1819 წლის 8 მარტს, ახალი სტილით კი 21 მარტს გამოიცა.