ფოთის საკრებულოს თავმჯდომარე ირაკლი კაკულია და კულტურისა და სპორტის საქალაქო სამსახურის უფროსი ნიკა გრიგოლია საქართველოს ფინანსთა სამინისტროს საგამოძიებო სამსახურის სამეგრელო-ზემო სვანეთის ფოთის სამმართველოდან პოლიციის წინასწარი დაკავების იზოლატორში წუხელ გადაიყვანეს დღეს კი მათ ბრალს ოფიციალურად წაუყენებენ, რაც შეეხება კიდევ ორ დაკავებულს ისინი თბილისში აიყვანეს და მათთვისაც ბრალის წარდგენა დღეს მოხდება.

ფოთის საკრებულოს თავმჯდომარის ირაკლი კაკულიასა და კულტურისა და სპორტის სამსახურის უფროსის ნიკა გრიგოლიას ადვოკატმა, ნუგზარ ტყებუჩავამ განაცხადა, რომ ირაკლი კაკულიას ხუთი მუხლით ედავებიან. მისივე თქმით, დაკავებულები თავს ნირმალურად გრძნობენ. თავად, ირაკლი კაკულია ბრალს არ აღიარებს.

საქართველოს ფინანსთა სამინისტროს საგამოძიებო სამსახურის თანამშრომლებმა ოპერატიულ-სამძებრო და საგამოძიებო მოქმედებების შედეგად, სასამართლოს განჩინების საფუძველზე ოთხი პირი დააკავეს, რომელთაგანაც: სამი მოქმედი, ერთი კი, ყოფილი საჯარო მოხელეა. მათ შორის ქალაქ ფოთის მუნიციპალიტეტის ყოფილი მერი და საკრებულოს ახლანდელი თავმჯდომარე ირაკლი კაკულია.

საგამოძიებო სამსახურის ინფორმაციით, მათ ბრალად ედებათ მართლსაწინააღმდეგო მისაკუთრების მიზნით დიდი ოდენობით სახელმწიფო ქონების თაღლითურად დაუფლებაში დახმარება, სახელმწიფო ქონების გაფლანგვა, განსაკუთრებით დიდი ოდენობით ქრთამის აღება, სამსახურებრივი უფლებამოსილების ბოროტად გამოყენება, სამსახურებრივი გულგრილობა და ყალბი საანგარიშსწორებო დოკუმენტის დამზადება-გამოყენება.