ააიპ “ზუგდიდის ბოტანიკური ბაღის” 26 თანამშროლიდან დიდ ნაწილს 6 თვიანი ხელშეკრულება შეუწყდება. ის თანამშრომლები, რომლებიც მალე დატოვებენ “ბოტანიკურ ბაღს” მიზეზად რეორგანიზაცია დაუსახელეს. ამის შესახებ STV-ს ბოტანიკური ბაღის ერთ-ერთი თანამშრომელი მოუყვა, რომელმაც საკუთარი ვინაობის გამხელა არ ისურვა.

“მკაცრად გაგვაფრთხილეს, რომ ვისაც 6 თვიანი ხელშეკრულება გვქონდა დადებული ბოტანიკურ ბაღთან, აღარ გაგვიგრძელდებოდა. ამის მიზეზად ბოტანიკურ ბაღში რეორგანიზაციის დაწყება დაგვისახელეს. სამი ადამიანი უკვე გაშვებულია დანარჩენი 17 ადამიანი ალბათ დღე დღეზე დატოვებს ბოტანიკურ ბაღში სამსახურს”-აცხადებს ზუგდიდის ბოტანიკური ბაღის ერთ-ერთი თანამშრომელი STV-თან, რომელმაც ინკოგნიტოდ დარჩენა ისურვა.

STV, ააიპ “ზუგდიდის ბოტანიკური ბაღის” დირექტორს, ზვიად ქარჩავას დაუკავშირდა. ქარჩავას განცხადებით სამსახურიდან ჯერ არავინ გაუშვია. რაც შეეხება ხელშეკრულებებს, ბოტანიკური ბაღის დირექტორის განცხადებით, ის ინდივიდუალურია.

“ხელშეკრულება ყველა თანამშრომელს ერთნაირად არ აქვს გაფორმებული. ზოგიერთს ადრე უმთავრდება, ზოგიერთს კი უფრო გვიან. რაც შეეხება სამსახურიდან გათავისუფლებას, არც ერთი თანამშრომელი არ გათავისუფლებულა. შეგიძლიათ მოხვიდეთ და თავად ნახოთ, რომ ყველა თანამშრომელი ადგილზეა”,-განაცხადა ბოტანიკური ბაღის დირექტორმა.

ზუგდიდის მერიაშიც აცხადებენ, რომ ააიპ “ზუგდიდის ბოტანიკური ბაღიდან” არც ერთი თანამშრომელი არ გათავისუფლებულა.

შეგახსენებთ, რომ 16 აგვისტოს სახელმწიფო უსაფრთხოების სამსახურმა ზუგდიდის ბოტანიკური ბაღების მართვის ცენტრის საქმიანობის შესწავლა დაიწყო. საკითხს სუს-ის ანტიკორუფციული სააგენტო სწავლობს.

„სახელმწიფო უსაფრთხოების სამსახურის ანტიკორუფციულმა სააგენტომ შესაძლო დანაშაულის გამოვლენის მიზნით, ააიპ „ზუგდიდის მუნიციპალიტეტის კერძო სამართლის არასამეწარმეო (არაკომერციული) იურიდიული პირის, ბოტანიკური ბაღების მართვის ცენტრი“-ს საქმიანობის შესწავლა დაიწყო“, – ნათქვამია უწყების მიერ 16 აგვისტოს გავრცელებულ ინფორმაციაში.

ცნობისათვის, სუს-ის ანტიკორუფციულმა სააგენტომ ბოტანიკური ბაღის ყველა თანამშრომელი, მათ შორის დირექტორი, ზვიად ქარჩავაც გამოკითხა.