ზუგდიდის მუნიციპალიტეტის მერიის ბალანსზე 22 მსუბუქი ავტომანქანაა რიცხული. ქაედან ექსპლუატაციაში არ იმყოფება მხოლოდ 4 ავტომანქანა. მიზეზად კი მათი ტექნიკური გაუმართაობა სახელდება.

ახალი ამბების სააგენტო ზუგდიდის მერიიდან ის დოკუმენტები გამოითხოვა, რომლის მიხედვითაც გაწერილია მოქმედი ავტომანქანების მომსახურებაზე გაწეული ხარჯები 2018 წლის 1 იანვრიდან 2018 წლის 1 ოქტომბრამდე.

ზუგდიდის მერიას აღნიშნულ პერიოდში 18 ავტომანქანაზე გაწეული მომსახურება 99.430 ლარი დაუჯდა.

შესაბამისად, 2018 წლის 1 იანვრიდან 2018 წლის 1 ოქტომბრამდე ზუგდიდის მერიაში რიცხულმა ავტომანქანებმა ჯამში 111. 918 ლარის საწვავი დახარჯეს.

ზუგდიდის მერიის მიერ STV-სთვის მოწოდებული დოკუმენტაციის თანახმად, ყველაზე ხარჯიანი ზუგდიდის მუნიციპალიტეტის ყოფილი ვიცე მერის, გია გულორდავას და საკრებულის თავმჯდომარის, მამუკა წოწერიას დროებით სარგებლობაში მყოფი მანქანები აღმოჩნდა.

ზუგდიდის ვიცე მერმა 9 თვის განმავლობაში 14.384 ლარის საწვავი დახარჯა. მის დროებით სარგებლობაში მყოფი ავტომანქანა LEXUS CX470, სახელმწიფო ნომრით TT 011 OO-ს მომსახურებაში 2701 ლარი დაიხარჯა.

უცხოური წარმოების TOYOTA LANDCRUISER PRADO, სახელმწიფო ნომრით QQB-550-ის მომსახურებაზე ზუგდიდის მუნიციპალიტეტის მერიამ 9 თვის განმავლობაში 11. 338 ლარი დახარჯა. ამ დროის განმავლობაში ავტომანქანაზე დაიხარჯა 12039 ლარის საწვავი.