ირაკლი ქარსელაძე: სტიქიის სალიკვიდაციო სამუშაოებში ტექნიკა დიდი ოდენობითაა ჩართული, თუმცა ყოველსაათობრივად კიდევ ემატება, რათა მაქსიმალური ტერიტორია მოვიცვათ

სტიქიის სალიკვიდაციო სამუშაოებში ტექნიკა დიდი ოდენობითაა ჩართული, თუმცა ყოველსაათობრივად კიდევ ემატება, რათა მაქსიმალური ტერიტორია მოვიცვათ, – განაცხადა რეგიონული განვითარებისა და ინფრასტრუქტურის მინისტრმა, ირაკლი ქარსელაძემ „ქრონიკასთან“ საუბრისას.

მან შოვში მიმდინარე სამუშაოებზე ისაუბრა.

„მნიშვნელოვანია ის, რომ დავიწყეთ და ძალიან მალე დავდებთ მთავარ დროებით ხიდს, რომელიც უკვე საშუალებას მოგვცემს, ყველანაირი სახის ტრანსპორტის გადაადგილების. აღნიშნული მობილობას მნიშვნელოვნად გაზრდის. ამასთან, მნიშვნელოვანია, რომ ჩვენ ჯერ კიდევ გუშინ დავიწყეთ, ალტერნატიული გზის მოწყობა, რომელიც საშუალებას გვაძლევს, მეორე ფრონტიდან შევძლოთ, ანუ ქვედა მხრიდან შევძლოთ პერიმეტრთან მიახლოება და სამუშაოები იქიდანაც ვაწარმოოთ. ისევე როგორც, ხიდის დამონტაჟების შემდეგ, გეგმაში გვაქვს, რომ ხიდთან მდებარე შიდასახელმწიფოებრივი გზის გაწმენდით ასევე შევკრათ მესამე ფრონტი, ანუ მთლიანი არეალი მოვიცვათ, რათა მაშველებს, მძიმე ტექნიკას, ცოცხალ ძალას, ჩვენს ჯარს მიეცეს შესაძლებლობა, კიდევ უფრო ინტენსიური გახადოს საძიებო სამუშაოები“, – განაცხადა ქარსელაძემ.

შოვში მეწყერი 3 აგვისტოს ჩამოწვა. ამ დროისთვის არსებული ოფიციალური მონაცემებით, სტიქიის შედეგად 12 ადამიანია დაღუპული, 24 ადამიანს კი ეძებენ.