გიორგი გუგუჩია რეგიონის პირველ გუბერნატორს 85 წლის იუბილეს ულოცავს
სამეგრელო-ზემო სვანეთის სახელმწიფო რწმუნებული გიორგი გუგუჩია, მის ყოფილ კოლეგას, რეგიონის პირველ გუბერნატორს ბონდო ჯიქიას საიუბილეო თარიღს ულოცავს
85 წლის იუბილეს ვულოცავ სამეგრელო-ზემო სვანეთის მხარეში ყოფილ სახელმწიფო რწმუნებულს, ბატონ ბონდო ჯიქიას. ბატონი ბონდო 10 წლის განმავლობაში, ურთულეს პერიოდში ხელმძღვანელობდა რეგიონს, მისი სიყვარული ჩვენი რეგიონისა და მისი მშობლიური ქალაქის მიმართ განსაკუთრებულია და დღესაც, მასთან შეხვედრის დროს, მისი მრავალწლიანი გამოცდილებიდან გამომდინარე არ იშურებს რჩევებს და სურვილებს სამეგრელო-ზემო სვანეთთან მიმართებაში.
ბატონი ბონდო სხვადასხვა დროს არაერთ საპასუხისმგებლო თანამდებობაზე მუშაობდა: იყო უზენაესი საბჭოს წევრი, ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე, გუბერნატორობამდე იყო საქართველოს სოფლის მეურნეობის მინისტრის მოადგილე. ბონდო ჯიქია არის ვახტანგ გორგასლის პირველი ხარისხის და ღირსების ორდენების კავალერი, ზუგდიდის საპატიო მოქალაქე.
კიდევ ერთხელ ვულოცავ ბატონ ბონდოს საიუბილეო თარიღს, ვუსურვებ ჯანმრთელობას და დიდხანს სიცოცხლეს!“ – წერს სახელმწიფო რწმუნებული.
