ზუგდიდის საკრებულოს შემდეგ „ქართული ოცნება“ რუსთავის საკრებულოს თავმჯდომარის იმპიჩმენტს იწყებს
ზუგდიდის საკრებულოს შემდეგ „ქართული ოცნება„ რუსთავის საკრებულოს თავმჯდომარის იმპიჩმენტს იწყება. ორივე საკრებულოს თავმჯდომარე გიორგი გახარიას პარტიის წევრები არიან, ქართულ ოცნებაში აცხადებენ, რომ საკრებულოს თავმჯდომარეების არჩევა გახარიას პარტიის და ნაციონალური მოძრაობის თანამშრომლობით გახდა შესაძლებელი.
„რუსთავის მუნიციპალიტეტის მეშვიდე მოწვევის ანუ ამჟამინდელი საკრებულოს შემადგენლობა უკვე ორ წელზე მეტია, ჯეროვნად ვერ ასრულებს საკუთარ მოვალეობებს.
ამ ხნის განმავლობაში არაერთხელ ჰქონდა ადგილი საკრებულოს მხრიდან საბოტაჟის მცდელობას მუნიციპალიტეტის გამართული მუშაობის და შესაბამისად, ჩვენი თანამოქალაქეების კეთილდღეობის წინააღმდეგ, რაც გამოიხატებოდა ბიუჯეტის დამტკიცების ხელისშეშლაში, ბიუჯეტის შესრულების ანგარიშის უარყოფითად შეფასებაში, კონკრეტული პროექტების შეფერხებაში, მოქალაქეების პოზიციების გაუთვალისწინებლობაში და ა.შ.
საკრებულოს რეგლამენტის უხეში დარღვევების გარდა შრომის ინსპექციამ და შემდეგ უკვე საქალაქო სასამართლომ დაამტკიცა საკრებულოს ხელმძღვანელობის უპასუხისმგებლო და უკანონო ქმედებები აპარატის თანამშრომელთა მიმართაც, თუმცა მათთვის სასამართლოს გადაწყვეტილება შემაფერხებელი არ აღმოჩნდა, რომ კვლავინდებურად გაეგრძელებინათ პოლიტიკური მავნებლობა.
ცოტა ხნის წინ ფრაქცია „ნაციონალურ მოძრაობას“ გამოეყო და პარტიიდან გავიდა ფრაქციის ოთხი წევრი, რაც კიდევ ერთი დამატებითი საფუძველი აღმოჩნდა „ქართული ოცნების“ გუნდისთვის, რომ დავიწყოთ რუსთავის საკრებულოს ოპოზიციური უმრავლესობის თანამდებობებიდან გადაყენების პროცესი.
ამ მიზნით, ჩვენ კანონის შესაბამისად, პროცედურების დაცვით, უკვე მივმართეთ საკრებულოს თავმჯდომარეს, ჩანიშნოს რიგგარეშე სხდომა, რომელზეც ძირითად საკითხებად იქნება სწორედ საკრებულოს თავმჯდომარის, მისი მოადგილეების და საკრებულოს კომისიების თავმჯდომარეების გადაყენების საკითხი.
მიგვაჩნია, რომ არსებულ სიტუაციაში, როდესაც ჩვენი საკრებულოს ოპოზიციური უმრავლესობა ისედაც ყველა შანსს იყენებდა პოლიტიკური რევანშისთვის „ქართული ოცნების“ წინააღმდეგ, ახლა მით უმეტეს არ აქვთ ერთიანი პოზიცია, დაშლილი ნაცმოძრაობის და გახარიას ფრაქციის იმედად ყოფნა ჩვენი ქალაქისთვის არის სრულიად გაუმართლებელი.
ამიტომ მივმართეთ კანონით ჩვენთვის მონიჭებულ უფლებას და ვიწყებთ საკრებულოს თავმჯდომარის იმპიჩმენტის პროცედურას“ – ნათქვამია რუსთავის საკრებულო „ქართული ოცნების“ ფრაქციის მიერ გავრცელებულ განცხადებაში.
შეგახსენებთ, რომ ზუგდიდის საკრებულოს ფრაქცია ,,ქართული ოცნება“ საკრებულოს 9 თანამდებობის პირის, მათ შორის საკრებულოს თავმჯდომარის იმპიჩმენტს ითხოვს. პარტიამ საკითხის ინიცირება 10 აპრილს მოახდინა. იმპიჩმენტი რეგლამენტით გათვალისწინებით, საკრებულოს მორიგ სხდომაზე გავა.
„ქართულ ოცნების“ ზუგდიდის საკრებულოს ფრაქციაში აცხადებენ, რომ გახარიას და ნაცმოძრაობის კოალიციამ, საკრებულო – მუნიციპალიტეტზე მზრუნველი სახელმწიფო ინსტიტუციის ნაცვლად გადაიქცა ოპოზიციური კლანების დასაქმების ადგილად. თავის მხრივ ზუგდიდის საკრებულოს თავმჯდომარემ გიგა ფარულავამ განმართა, რომ „ქართული ოცნება“ „ნაციონალკურ მნოძრაობასთან“ ერთად ცდილობს ზუგდიდის ოპოზიციური საკრებულოს თანამდებობის პირების იმპიჩმენტს.
ამავე თემაზე:
