ზუგდიდის მერი: ზუგდიდის მერია აუტიზმის სპექტრის დარღვევის მქონე ბავშვთა აბილიტაციის პროგრამა ყოველწლიურად მხარდაჭერილი იქნება
2 აპრილი აუტიზმის ცნობადობის ამაღლების მსოფლიო დღეა.
აღნიშნულ თარიღთან დაკავშირებით, ზუგდიდის მერიაში, მშობლებთან საინფორმაციო შეხვედრა გაიმართა.
შეხვედრაზე აუტიზმის სპექტრის დარღვევის მქონე ბავშვთა აბილიტაციის პროგრამის ეფექტურად განხორციელების გზები განიხილეს, ისაუბრეს გამოწვევევბსა და სამომავლო გეგმებზე.
შეხვედრას ზუგდიდის მერი მამუკა წოწერია, მერის პირველი მოადგილე კონსტანტინე კაკავა და მერიის სოციალური და ჯანდაცვის სამსახურის წარმომადგენლები ესწრებოდნენ.
როგორც შეხვედრაზე მერმა აღნიშნა, აუტიზმის სპექტრის დარღვევის მქონე ბავშვთა აბილიტაციის პროგრამა, უმნიშვნელოვანესია, რაზეც მასში ჩართული ბავშვების რაოდენობაც მიუთითებს. შესაბამისად რეკომენდაციების მოსმენა და ხარვეზებზე საუბარი მნიშვნელოვანია, რომ პროგრამა იყოს შედეგებზე გათვლილი. აღნიშნული პროგრამა ყოველწლიურად იქნება მხარდაჭერილი.
დღეს, ბავშვის უფლებების დაცვისა და მხარდაჭერის განყოფილების წარმომადგნლები დღის ცენტრებს ესტუმრნენ და ბენეფიციარებს სიმბოლური საჩუქრები გადასცეს.
დღესვე, ნეიროგანვითარების ცენტრის ორგანიზებით, ზუგდიდის ბოტანიკურ ბაღში ღონისძიება გაიმართა.
ცნობისთვის, ზუგდიდის მუნიციპალიტეტის მერია აუტიზმის სპექტრის დარღვევის მქონე ბავშვთა აბილიტაციის პროგრამას 2015 წლიდან ახორციელებს. ჩართულია 150 ბენეფიციარი. 2015 წლიდან დღემდე 2 940 471 ლარია გახარჯული.
