ინფრასტრუქტურის სამინისტროს მუნიციპალური განვითარების ფონდი სენაკში 100 ბავშვზე გათვლილი საბავშვო ბაღის მშენებლობას ასრულებს. პროექტს აზიის განვითარების ბანკი ახორციელებს და ჯამური ღირებულება 5 მილიონ ლარს აღემატება.

დასრულებულ სამუშაოებს ინფრასტრუქტურის მინისტრი რევაზ სოხაძე, სამეგრელო-ზემო სვანეთის სახელმწიფო რწმუნებულთან დავით ვერავასთან ერთად გაეცნო.

„სენაკში ერთ-ერთი საუკეთესო საბავშვო ბაღი აშენდა. სამუშაოები მალე დასრულდება და სენაკში გვექნება თანამედროვე სტანდარტებით მოწყობილი ახალი საბავშვო ბაღი. ეს არ ეხება მხოლოდ სენაკს, მნიშვნელოვანია აღინიშნოს, რომ საქართველოს ყველა რეგიონში, თითქმის ყველა მუნიციპალიტეტში, მიმდინარეობს ბაღების, სკოლების და სხვა საჯარო ინფრასტრუქტურის მშენებლობა, ისეთი როგორიც არასდროს ამ ქვეყნის ისტორიაში არ ყოფილა,“- აღნიშნა ინფრასტრუქტურის მინისტრმა, რევაზ სოხაძემ.

პროექტის ფარგლებში, მოეწყო საძინებელი, სათამაშო, გამოსაცვლელი და ადმინისტრაციული ოთახები, სამზარეულო, სასადილო, სამრეცხაო, ლიფტი და საევაკუაციო კიბეები. ეზოში მოეწყო რეკრეაციული სივრცე და სათამაშო მოედნები. საბავშვო ბაღი სრულად ადაპტირებულია შეზღუდული შესაძლებლობის მქონე პირებისთვის.